Jeremiya 6

lnyuĩ ariũ a Benjamini, ta mwĩtharei mwehere Yahrushalayim! Huuhai coro mũrĩ Tekoa; Akiai kĩmenyithia kĩa mwaki kũu Bethi-hakeremu! Nĩ gũkorũo kũrĩ thĩna ũroka kuuma mwena wa rũgongo, mwanangĩko mũnene.

Mwarĩ wa Zayuni ahaana ta mũndũ-wa-nja mũthaka na ũtũnĩtio.

Arĩithi nĩ magooka marĩ na ndũũru ciao. Nĩ makaamba hema ciao mamũthiũrũrũkĩrie kũndũ guothe, O ũmwe wao akĩrĩithia rũũru rwake.

“Mwĩhaarĩriei nĩ ũndũ wa mbaara mũmũũkĩrĩre! Ũkĩrai, nĩ tũmũtharĩkĩrei mũthenya gatagatĩ!” “Kaĩ tũrĩ na haaro-ĩ, tondũ nĩ kũratuka, Nĩ gũkorũo ciĩruru cia hwaĩ-inĩ irathiĩ ikĩraihaga!”

“Ũkĩrai, nĩ tũmũtharĩkĩrei ũtukũ Na twanange nyũmba ciake iria ndaya na igũrũ irĩ na ũgitĩri.”

Nĩ gũkorũo ũũ nĩguo Yahweh mũnene wa ita ekuuga: “Temai mĩtĩ na mũthondeke hĩba ya kũrigicĩria mũũkĩrĩre Yahrushalayim. Rĩu nĩ itũũra arĩ o mũhaka rĩciirithio; Thĩinĩ warĩo kũiyũire ũhinyanĩrĩria.

O ta ũrĩa irima rĩtothoraga maĩ mahehu, No taguo itũũra rĩu rĩthothokaga waganu. Thĩinĩ warĩo nĩ kũiguagwo maũndũ ma ũhinya na ma mwanangĩko; Mũrimũ na ihũũra ikoragwo mbere yakwa hingo ciothe.

Wee Yahrushalayim Wee! Taathĩkĩra mũkaana, kwaga ũguo nĩ ngũkweherera nĩ ũndũ wa kũnjiria ngoro; Nĩ ngũtũma ũtuĩke kũndũ gũtiganĩrie, bũrũri ũtaikaragwo nĩ andũ.”

Yahweh mũnene wa ita ekuuga ũũ: “Nĩ makaahaara matigari ma Isiraeli biũ o ta thabibũ cia mũthia mũthabibũ-inĩ. Hĩtũkia guoko gwaku rĩngĩ o ta mũndũ ũracokanĩrĩria thabibũ kuuma mĩthabibũ-inĩ.”

“Hihi nũũ njagĩrĩirũo kwarĩria na ndĩmũhe mũkaana? Nũũ ũgũthikĩrĩria? Onee! Matũ mao ti maruithie, nĩguo mamenye ũhoro. Tarorai mwĩyonere! Kiugo kĩa Yahweh nĩ gĩtuĩkĩte kĩndũ gĩa kũnyararũo nĩo; Matigĩkenagĩra.

Nĩ ũndũ ũcio, njiyũrĩtwo nĩ matũkũya ma Yahweh, Na nĩ nogetio nĩ kũmahingĩrĩria.” “Maitũrũrĩre ciana irĩ barabara-inĩ, Ũmaitũrũrĩre ikundi cia andũ ethĩ arĩa macemanĩtie hamwe. Othe nĩ makaanyitwo, mũthuri hamwe na mũka, Athuri akũrũ o hamwe na arĩa akũrũ mũno.

Nyũmba ciao nĩ ikaaneanwo kũrĩ andũ angĩ, Hamwe na mĩgũnda yao na atumia ao. Nĩ gũkorũo nĩ ngaatambũrũkia guoko gwakwa njũkĩrĩre aikari a bũrũri ũcio,” ũguo nĩguo Yahweh ekuuga.

“Tondũ o ũmwe wao, kuuma ũrĩa mũnini nginya ũrĩa mũnene, areguna na uumithio ũtarĩ wa kĩhooto; Kuuma mũnabii nginya mũthĩnjĩri-Yahweh, o mũndũ areka maũndũ ma ũtunyani.

Na mageragia kũhonia nguraro ya andũ akwa o igũrũ tu, makoiga ũũ, ‘Kũrĩ na thayũ! Kũrĩ na thayũ!’ Na hĩndĩ ĩyo gũtirĩ na thayũ.

Hihi nĩ maconokaga nĩ ũndũ wa maũndũ marĩ magigi marĩa mekĩte? Maticonokaga o na hanini! O na matiũĩ kũigua thoni nĩ kuuga atĩa! Nĩ ũndũ ũcio, makaagũa gatagatĩ-inĩ ka arĩa magũĩte. Rĩrĩa ngaamaherithia nĩ makaahĩngĩka,” ũguo nĩguo Yahweh oigĩte.

Yahweh oigĩte ũũ: “Rũgamai magomano-inĩ ma njĩra muone. Ũrĩrĩriai ũhoro wa njĩra iria cia tene, Ũrĩrĩriai kũrĩa njĩra ĩrĩa njega ĩrĩ, na mũmĩgerere, Nĩguo mwĩyonere ũhurũko.” No o moigaga atĩrĩ: “Tũtikũmĩgerera.”

“Na niĩ ngĩamũra arangĩri na makiuga atĩrĩ, ‘Thikĩrĩriai mũgambo wa coro!’” No o makiuga ũũ: “Tũtigũthikĩrĩria.”

“Nĩ ũndũ ũcio, thikĩrĩriai inyuĩ ndũrĩrĩ! Inyuĩ kĩrĩndĩ gĩkĩ, menyai Ũndũ ũrĩa ũkaamakora.

Wee thĩ-rĩ, thikĩrĩria! Nĩ ngũrehera andũ aya thĩna ũrĩ maciaro ma njama ciao ene, Nĩ gũkorũo matiathikĩrĩirie ciugo ciakwa Na nĩ maaregire Watho wakwa.”

“Niĩ ndĩ na bata ũrĩkũ na ũbani ũcio mũrarehe kuuma Sheba Na karamathi ĩyo ĩrĩ cama kuuma bũrũri wa kũraya? Magongona manyu magima ma njino matingĩtĩkĩrĩka, Na magongona manyu matingenagia.”

Nĩ ũndũ ũcio, ũũ nĩguo Yahweh ekuuga: “Nĩ ngũigĩra andũ aya mĩhĩnga, Na nĩ makaahĩngwo nĩyo, Maithe hamwe na ariũ ao, Mũndũ wa itũũra o hamwe na mũratawe, Na othe nĩ magaathira.”

Yahweh oigĩte ũũ: “Ta mwĩrorerei muone! Andũ nĩ maroka moimĩte bũrũri wa mwena wa rũgongo, Na rũrĩrĩ rũnene nĩ rũkaarahũrũo kuuma icigo-inĩ iria irĩ kũraya mũno thĩinĩ wa thĩ.

Nĩ makaanyita ũta na itimũ. Maticayanagĩra na matigaakorũo na tha. Mũgambo wao ũkaaruruma o ta iria, Na mathiaga matwarithĩtie mbarathi. Mebangĩte nĩ ũndũ wa mbaara o ta njamba cia ita nĩguo magũũkĩrĩre, wee mwarĩ wa Zayuni.”

Nĩ tũiguĩte ũhoro ũcio. Moko maitũ nĩ morĩtwo nĩ hinya; Nĩ tũgĩĩte na mĩtangĩko, Tũkagĩa na ruo ta rwa mũtumia akĩgĩa mwana.

Ndũkoime ũthiĩ mũgũnda-inĩ, Na ndũkagerere njĩra-inĩ, Nĩ gũkorũo thũ ĩrĩ na rũhiũ rwa njora; Kũrĩ na guoya kũndũ guothe.

Wee mwarĩ wa andũ akwa, Wĩhumbe nguo ya ikũnia na wĩgaragarie mũhu-inĩ. Cakaya ta ũrĩa mũrũ wa mũmwe acakayagĩrũo, na ruo rũingĩ, Nĩ gũkorũo mũniinani nĩ agaatũtharĩkĩra o rĩmwe.

“Wee nĩ ngũtuĩte mũturi wa cuma gatagatĩ-inĩ ka andũ akwa, Itũũra irũmu biũ; No mũhaka ũrorage na ũgathuthuria njĩra yao.

Othe nĩ aremi nema-kũhĩa iria njũru biũ! Mathiaga magĩcambanagia. Matariĩ ta gĩcango na kĩgera; Mĩtugo yao othe nĩ mĩũru.

Ihurutĩri cia mwaki ihurutĩtwo na hinya mũno, na cuma ya lidi nĩ ĩtũekete ĩkahĩa ĩgathira. Mũtheria arutĩte wĩra mũnene wa gũtheria o tũhũ, Nĩ tondũ andũ arĩa aganu matiamũranĩtio.

Andũ marĩmetaga betha ĩrĩa ĩregetwo, Nĩ gũkorũo Yahweh nĩ amaregete.”