Jeremiya 5

Tateng'erai ũũ na ũũ barabara-inĩ cia itũũra rĩa Yahrushalayim. Rorai na mwĩcũranie. Cariai kũndũ kwarĩo kwa mũingĩ Mũrore kana nĩ mũkuona mũndũ wĩkaga matua ma cira marũngĩrĩru, Mũndũ ũgeragia gũkorũo arĩ ũhoro-inĩ wa Ma, Na nĩ nguohera itũũra rĩu.

O na mangiuga atĩrĩ: “O ta ũrĩa Yahweh atũũraga muoyo!” O na hĩndĩ ĩyo no mekwĩhĩta ũndũ wa maheeni.

Yahweh-ĩĩ, na githĩ maitho maku matiroragĩrĩria Ũhoro wa ma? Nĩ wamagũthire, ĩndĩ ũndũ ũcio ndwamahutirie. Nĩ wamaniinire, no nĩ maaregire kũrũngwo. Moomirie mothiũ mao o na gũkĩra rwaro rwa ihiga, Na makĩrega kũgarũrũka.

No niĩ ngĩĩra ũũ: “Aya no mũhaka makorũo nĩ andũ matarĩ kĩene. Mekaga maũndũ ma ũrimũ, tondũ matiũĩ njĩra ya Yahweh, Matiũĩ ituĩro rĩa Kĩhoti wao.

Ngũthiĩ kũrĩ andũ arĩa marĩ igweta njarie nao, Tondũ no mũhaka makorũo nĩ meecũranagia njĩra ya Yahweh, Magecũrania ituĩro rĩa Kĩhoti wao. Ĩndĩ othe nĩ moinangĩte icoki Na magatuanga mĩkwa.”

Nĩkĩo matharĩkagĩrũo nĩ mũrũthi wa mũtitũ, Njũi ya werũ-inĩ mwaraganu ĩikaraga ĩkĩmatamburaga, Ngarĩ ĩikaraga yarahũkĩte matũũra-inĩ mao. Mũndũ wothe uumaga nja ya matũũra macio atamburangagwo tũcunjĩ. Nĩ gũkorũo kwagarara watho kwao nĩ kũingĩ; Maita marĩa manjehereire makandiganĩria matingĩtarĩka.

Ingĩgĩkuohera maũndũ macio nĩkĩ? Ariũ aku nĩ mandiganĩirie, Na mehĩtaga na kĩndũ gĩtarĩ kĩhoti. Nĩ ndamahingĩirie mabataro mao, No o magĩthiĩ o na mbere gwĩka ũtharia, Na makĩrũrũngana nyũmba-inĩ ya mũmaraya.

Matariĩ ta mbarathi irahĩahĩa irĩ na thuti, O ũmwe wao akĩanĩria mũka wa mũndũ ũngĩ.

“Na githĩ ndikĩagĩrĩirũo kũmacirithia nĩ ũndũ wa maũndũ macio?” Ũguo nĩguo Yahweh ekũũria. “Na githĩ ndiagĩrĩirũo kwĩrĩhĩria harĩ rũrĩrĩ ta rũu?”

“Ũkai mĩhari-inĩ ya mũgũnda wake wa mĩthabibũ na mũũthũkangie, No mũtikawanange biũ. Kahũrai thuuna ciake iria iratherema mũcieherie, Tondũ ti cia Yahweh.

Nĩ gũkorũo nyũmba ya Isiraeli na nyũmba ya Yahuda Nĩ cindirikĩte ikangunyanĩra o biũ,” ũguo nĩguo Yahweh ekuuga.

“Nĩ makaanĩte Yahweh, na maikaraga makiugaga, ‘Gũtirĩ ũndũ egwĩka. Gũtirĩ ũndũ mũũru ũgũtũkora; Tũtikuonana na rũhiũ rwa njora kana ng’aragu.’

Anabii makahana o ta rũhuho, Na kiugo gĩtirĩ thĩinĩ wao. Reke ũndũ ũcio ũmakore!”

Kwoguo, ũũ nĩguo Yahweh, Kĩhoti wa ita ekuuga: “Tondũ ũguo nĩguo andũ aya maroiga-rĩ, Nĩ ngũtũma ciugo ciakwa ikorũo irĩ mwaki kanua-inĩ gaku, Nao andũ aya nĩo ngũ, Naguo nĩ ũkũmacina mathire.”

“Nĩ ngũmũrehera rũrĩrĩ kuuma kũndũ kũraya, inyuĩ nyũmba ya Isiraeli,” ũguo nĩguo Yahweh ekuuga. “Na rũrĩrĩ rũu rũtũire kuo kuuma tene. Nĩ rũrĩrĩ rwa tene, Rũrĩrĩ inyuĩ mũtoĩ rũthiomi rwaruo, Na mũtangĩhota gũtaũkĩrũo nĩ mwarĩrie waruo.

Thiaka wao ũtariĩ ta mbĩrĩra gĩceng'ũ; Othe nĩ njamba cia ita.

Nĩ magaatambura magetha manyu o na mũgate wanyu. Nĩ magaatambura ariũ anyu o na aarĩ anyu. Nĩ magaatambura ndũũru cianyu cia mbũri na ng’ombe. Nĩ magaatambura mĩthabibũ yanyu o na mĩkũyũ yanyu. Nĩ makaananga na rũhiũ rwa njora matũũra manyu marĩa marĩ na ũgitĩri o macio mwĩhokete.”

“Ĩndĩ o na matukũ-inĩ macio, ndikamũniina mũthire biũ,” ũguo nĩguo Yahweh ekuuga

“Na rĩrĩa makoria atĩrĩ, ‘Nĩ kĩĩ gĩtũmĩte Yahweh Kĩhoti witũ atwĩke maũndũ maya mothe?’ wagĩrĩirũo kũmeera ũũ, ‘O ta ũrĩa mwandiganĩirie nĩgetha mũtungatĩre ihoti ng’eni bũrũri-inĩ wanyu, no taguo mũgaatungatĩra andũ a kũngĩ bũrũri-inĩ ũtarĩ wanyu.’”

Menyithaniai ũndũ ũyũ nyũmba-inĩ ya Jakubu, Na mũũhunjie thĩinĩ wa Yahuda, muuge atĩrĩ:

“Iguai ũndũ ũyũ, inyuĩ andũ aya ariitu na mũtarĩ wĩcirio: Mũrĩ na maitho no mũtionaga; Mũrĩ na matũ no mũtiiguaga.

‘Kaĩ mũtanjĩtigĩrĩte?’ Ũguo nĩguo Yahweh ekũũria, ‘Na githĩ mũtiagĩrĩirũo kũinaina mũrĩ mbere yakwa? Niĩ nĩ niĩ ndaigire mũthanga ũtuĩke mũhaka wa iria, Ũrĩ watho wa gũtũũra nĩguo rĩtikanakĩre ho. O na makũmbĩ ma rĩo maambatĩra, matingĩhota gũkĩra; O na maahũyũka, o na hĩndĩ ĩyo matingĩhota gũkĩra hau.

No andũ aya makoragwo na ngoro nyũmũ na nemi; Nĩ mahũgũkĩte na makarũmĩrĩra njĩra yao ene.

Na matiugaga ũũ ngoro-inĩ ciao: “Reke rĩu twĩtigĩre Yahweh Kĩhoti witũ, O ũcio ũheanaga mbura ihinda rĩayo rĩakinya, Mbura ya mbere o na ya kũrigĩrĩria, O we ũtigagĩrĩra atĩ nĩ twagĩa na ihinda ritũ rĩa magetha.”

Mahĩtia manyu nĩmo matũmĩte maũndũ macio matigoke; Mehia manyu nĩmo matũmĩte mwage kuona maũndũ mega.

Tondũ thĩinĩ wa andũ akwa kũrĩ na andũ aganu. Maikaraga macũthĩrĩirie, o ta ũrĩa ategi a nyoni makumagĩrĩra thĩ. Mambaga mũtego ũrĩa ũrehaga gĩkuũ. Na manyitagia andũ.

O ta kĩaga kĩiyũrĩte nyoni, No taguo nyũmba ciao ciyũrĩte maheeni. Nĩkĩo magĩĩte na hinya na magatonga.

Manorete na makanyoroka; Maiyũrĩrĩirũo nĩ maũndũ moru. Matitetagĩra ciana iria itarĩ maithe cira-inĩ wacio, Nĩguo o magaacĩre; Na nĩ maimaga andũ arĩa athĩni matua ma cira marũngĩrĩru.’”

“Na githĩ ndikĩagĩrĩirũo kũmacirithia nĩ ũndũ wa maũndũ macio?” ũguo nĩguo Yahweh ekũũria. “Na githĩ ndiagĩrĩirũo kwĩrĩhĩria harĩ rũrĩrĩ ta rũu?”

Ũndũ wa kũmakania na mũũru mũno nĩ wĩkĩkĩte bũrũri-inĩ:

Anabii marathaga maũndũ ma maheeni, Na athĩnjĩri-Yahweh mahũthagĩra wathani wao kũhinyĩrĩria andũ. Na andũ akwa makenaga rĩrĩa maũndũ matariĩ ũguo. No hihi mũgeeka atĩa rĩrĩa mũthia ũgaakinya?”