Joeli 1

Gĩkĩ nĩkĩo kiugo kĩa Yahweh kĩrĩa gĩakinyĩire Joeli mũrũ wa Pethueli:

“Thikĩrĩriai ũhoro ũyũ, inyuĩ athuri, Na mũtege matũ, inyuĩ aikari othe a bũrũri. Hihi nĩ kũrĩ gwekĩka ũndũ ta ũyũ matukũ-inĩ manyu Kana matukũ-inĩ ma maithe manyu ma tene?

Ĩrai ariũ anyu ũhoro ũcio, Nao ariũ anyu meere ariũ ao, Nao ariũ ao makeera rũciaro rũrĩa rũgooka.

Kĩrĩa gĩatigirio nĩ ngigĩ iria itamburaga, nĩ kĩrĩtwo nĩ ngigĩ iria ithiaga irĩ gĩkundi; Na kĩrĩa gĩatigirio nĩ ngigĩ iria ithiaga irĩ gĩkundi, nĩ kĩrĩtwo nĩ ngigĩ iria itarĩ mathagu; Na kĩrĩa gĩatigirio nĩ ngigĩ iria itarĩ mathagu, nĩ kĩrĩtwo nĩ ngigĩ iria irĩ mũkoroko.

Arahũkai, inyuĩ arĩĩu, na mũrĩre! Cakayai inyuothe arĩa mũnyuaga ndibei, Tondũ ndibei ĩrĩa ĩrĩ cama nĩ yeheretio kuuma tũnua-inĩ twanyu.

Tondũ nĩ kũrĩ rũrĩrĩ rũkĩte bũrũri-inĩ wakwa, rũrĩrĩ rũrĩ hinya na rũtangĩtarĩka. Magego maruo nĩ ta magego ma mũrũthi, nacio thĩa ciaruo nĩ ta cia mũrũthi.

Nĩ rwanangĩte mũthabibũ wakwa na rũgatũma mũtĩ wakwa wa mũkũyũ ũtuĩke gĩthukĩ, Rũũnũrĩte biũ ũgatigwo ũtheri na rũkaũte, Rũgatiga honge ciaguo irĩ cia rangi mwerũ.

Cakayai o ta ũrĩa mũirĩtu gathirange ekaga ehumbĩte nguo ya ikũnia akĩrĩrĩra mũthuri wa wĩthĩ wake.

Magongona ma mũtu na magongona ma ndibei nĩ mathirĩte thĩinĩ wa nyũmba ya Yahweh; Athĩnjĩri-Yahweh, o acio ndungata cia Yahweh, nĩ gũcakaya maracakaya.

Mũgũnda nĩ ũthũkangĩtio, nayo thĩ nĩ gũcakaya ĩracakaya; Nĩ gũkorũo ngano nĩ ĩthũkangĩtio, ndibei ya mũhihano nĩ ĩniarĩte, namo maguta nĩ mathirĩte.

Arĩmi nĩ mamakĩte, arĩmi a thabibũ nĩ maracakaya, Tondũ wa ngano na cairi; Nĩ gũkorũo magetha ma mũgũnda nĩ mathũkangĩte.

Mũthabibũ nĩ ũũmĩte, Mũkũyũ nĩ ũhoohete. Mũkomamanga, mũkĩndũ, na mũtĩ wa ĩpũ, Mĩtĩ yothe ya mũgũnda nĩ yũmĩte; Nĩ gũkorũo gĩkeno nĩ kĩgarũrũkĩte gĩgatuĩka gĩconoko gatagatĩ-inĩ ka andũ.

Mwĩhumbei nguo cia makũnia na mũcakae inyuĩ athĩnjĩri-Yahweh; Rĩrai, inyuĩ mũtungataga kĩgongona-inĩ. Tonyai na mũraare mwĩhumbĩte nguo cia makũnia, inyuĩ ndungata cia Kĩhoti wakwa; Nĩ gũkorũo magongona ma mũtu na magongona ma ndibei nĩ matigĩte gũtwarũo thĩinĩ wa nyũmba ya Kĩhoti wanyu.

Anĩrĩrai ihinda rĩa kwĩhinga; ĩtai kĩgomano kĩamũre. Cokanĩrĩriai athuri, hamwe na aikari othe a bũrũri, Moke thĩinĩ wa nyũmba ya Yahweh Kĩhoti wanyu, na mũkaĩre Yahweh amũteithie.

Kaĩ kũrĩ na haaro nĩ ũndũ wa mũthenya ũcio-ĩ! Nĩ gũkorũo mũthenya wa Yahweh ũrĩ hakuhĩ, Na ũgooka o ta mwanangĩko kuuma kũrĩ El Shaddai!

Na githĩ irio itieheretio tũkĩĩyonagĩra na maitho maitũ, Na gĩkeno na gũcanjamũka ikeherio kuuma nyũmba-inĩ ya Kĩhoti witũ?

Mbeũ nĩ ihoohete rungu rwa icakũri ciao. Makũmbĩ nĩ matiganĩirio. Makũmbĩ nĩ mamomoretwo, nĩ gũkorũo ngano nĩ yũmĩte.

Nginya mahiũ nĩ maracaya! Ndũũru cia ngʼombe irorũra itukanĩirũo, nĩ gũkorũo itirĩ na ũrĩithio! Nacio ndũũru cia ngʼondu nĩ irathĩnĩka.

Wee Yahweh nĩwe ngũkaĩra; Nĩ gũkorũo mwaki nĩ wanangĩte ũrĩithio wa werũ-inĩ, Na rũrĩrĩmbĩ nĩ rũcinĩte mĩtĩ yothe ya gĩthaka.

O na nyamũ cia gĩthaka nĩ ikwanagĩria, Tondũ tũrũũĩ twa maĩ nĩ tũhũĩte Na mwaki nĩ wanangĩte ũrĩithio wa werũ-inĩ.”