Joeli 2

“Huuhai coro kũu Zayuni! Ugĩrĩriai mbugĩrĩrio ya mbaara kĩrĩma-inĩ gĩakwa kĩrĩa kĩamũre. Aikari othe a bũrũri nĩ mainaine, Nĩ gũkorũo mũthenya wa Yahweh nĩ ũroka! Ũrĩ hakuhĩ!

Nĩ mũthenya mũtumanu na mũthimbu, Mũthenya wa matu na nduma ndumanu, Ta ũtheri wa rũcinĩ gũgĩkĩa ũgĩtherema irĩma-inĩ. Kũrĩ na gĩkundi kĩa andũ aingĩ na marĩ hinya; Gũtirĩ kwagĩa kĩngĩ ta kĩo hau kabere, Na gũtikaagĩa kĩngĩ ta kĩo Mĩaka-inĩ ya njiarũa ciothe.

Mbere yakĩo kũrĩ na mwaki ũraniina, Na thutha wakĩo rũrĩrĩmbĩ rũracina. Bũrũri ũrĩa ũrĩ mbere yakĩo ũhaana ta mũgũnda wa Edeni, No thutha wakĩo kũrĩ na werũ mũtiganĩrie, Na gũtirĩ kĩndũ kĩngĩhonoka.

Mũhianĩre wakĩo nĩ ta mũhianĩre wa mbarathi, Na matengʼeraga ta mbarathi cia mbaara.

Mũgambo wao nĩ ta wa ngaari cia mbarathi makĩrũga tũcũmbĩrĩ-inĩ twa irĩma, O ta gũtũratũrĩka kwa mwaki ũrarĩrĩmbũka ũrĩa ũcinaga mahuti. Nĩ ta gĩkundi kĩa andũ marĩ hinya mebangĩte nĩ ũndũ wa mbaara.

Ikundi cia andũ nĩ igaatangĩka nĩ ũndũ wao. Mothiũ mothe nĩ magaathita.

Matharĩkagĩra ta njamba cia ita, Mahaicaga rũthingo ta thigari, O ũmwe wao athiagĩra njĩra-inĩ yake mwene, Na matieheraga njĩra-inĩ ciao.

Matitindĩkanaga; O mũndũ athiagĩra njĩra-inĩ yake arũngĩrĩirie. Amwe mangĩgũithio nĩ matharaita, Acio angĩ matieheraga ikundi-inĩ ciao.

Mahanyũkaga thĩinĩ wa itũũra, magatengʼera rũthingo igũrũ. Mahaicaga igũrũ rĩa nyũmba, makaingĩrĩra ndirica-inĩ ta mũici.

Bũrũri nĩ ũrainaina mbere yao, narĩo igũrũ rĩgathingitha. Riũa na mweri nĩ igĩĩte nduma, Nacio njata itirĩ na ũtheri wacio.

Yahweh nĩ akaanĩrĩra na mũgambo mũnene mbere ya mbũtũ yake, tondũ thigari ciake nĩ nyingĩ mũno. Nĩ gũkorũo ũrĩa ũrahingia kiugo Gĩake nĩ arĩ hinya; Tondũ mũthenya wa Yahweh nĩ mũnene na wa kũmakania mũno. Nũũ ũngĩhota kũwĩtiiria?”

“Ĩndĩ o na rĩu, njokererai na ngoro cianyu ciothe,” ũguo nĩguo Yahweh ekuuga, “Mũkĩĩhingaga kũrĩa na mũkĩrĩraga o na mũgĩcakayaga.

Tembũrai ngoro cianyu, no ti nguo cianyu, Na mũcokerere Yahweh Kĩhoti wanyu, Nĩ gũkorũo nĩ mũcayanĩri na mũigua tha, ndahiũhaga kũrakara na aiyũirũo nĩ ũtugi, Nake nĩ ekwĩricũkwo ũũru ũcio.

Nũũ ũĩ kana nĩ ekũgarũrũka ericũkwo Na amũtigĩre kĩrathimo, Igongona rĩa mũtu na igongona rĩa ndibei nĩ ũndũ wa Yahweh Kĩhoti wanyu?

Huuhai coro kũu Zayuni! Anĩrĩrai ihinda rĩa kwĩhinga; ĩtai kĩgomano kĩamũre.

Cokanĩrĩriai andũ; amũrĩrai Yahweh kĩũngano. Cokanĩrĩriai athuri arĩa akũrũ; cokanĩrĩriai ciana na tũkenge tũrĩa tũronga. Mũhikania nĩ oime kanyũmba-inĩ gake ga thĩinĩ, nake mũhiki oime kanyũmba-inĩ gake.

Gatagatĩ ga gĩthaku na kĩgongona Athĩnjĩri-Yahweh arĩa matungatagĩra Yahweh nĩ marĩre na moige atĩrĩ: ‘Iguĩra andũ aku tha, wee Yahweh; Ndũgatũme igai rĩaku rĩtuĩke kĩndũ gĩa kũnyararũo, Na njĩra ya kũreka ndũrĩrĩ imaathage. Nĩ kĩĩ kĩngĩgĩtũma ikundi cia andũ ciũrie atĩrĩ, “Kĩhoti wao arĩ ha?”’

Nake Yahweh nĩ agaakorũo na kĩyo nĩ ũndũ wa bũrũri wake Na acaĩre andũ ake.

Yahweh nĩ agaacokeria andũ ake ameere atĩrĩ: ‘Nĩ ngũmũtũmĩra ngano na ndibei ya mũhihano na maguta, Na inyuĩ nĩ mũkũhũna biũ; Ndigacoka gũtũma mũtuĩke kĩndũ gĩa kũnyũrũrio gatagatĩ-inĩ ka ndũrĩrĩ.

Nĩ ngaaingata mũndũ wa mwena wa rũgongo athiĩ kũraihu mũno na inyuĩ; Ngaamũhurunja athiĩ bũrũri-inĩ mũũmũ, bũrũri mũtiganĩrie na mwanangĩku, Na thigari ciake iria itongoragia ndĩcihurunje kwerekera iria rĩa mwena wa irathĩro Nacio iria ithiaga irĩ thutha ndĩcihurunje kwerekera iria rĩa mwena wa ithũĩro. Mũnungo mũũru kuuma harĩ we nĩ ũkaambata, Kĩheera kiumĩte harĩ we gĩgaaikara gĩkĩambataga; Nĩ gũkorũo Kĩhoti nĩ ageeka maũndũ manene.’

Ndũgetigĩre, wee bũrũri, Kena na ũcanjamũke, nĩ gũkorũo Yahweh nĩ ageeka maũndũ manene.

Mũtigetigĩre, inyuĩ nyamũ cia gĩthaka, Nĩ gũkorũo ũrĩithio wa werũ-inĩ nĩ ũkaarura, Nayo mĩtĩ nĩ ĩkaaruta maciaro; Mũtĩ wa mũkũyũ hamwe na mũthabibũ no mũhaka ĩkaaruta maciaro mayo biũ.

Inyuĩ ariũ a Zayuni, kenai na mũcanjamũke nĩ ũndũ wa Yahweh Kĩhoti wanyu; Tondũ nĩ akaamũhe mbura ya mbere mũigana ũrĩa wagĩrĩire, Na nĩ akaamũtũmĩra mbura nene, Mbura ya mbere na mbura ya kũrigĩrĩria, o ta hau kabere.

Ihuuhĩro igaakorũo ciyũire ngano theru, Nacio ihihĩro ciyũre ndibei ya mũhihano na maguta.

Na nĩ ngaamũrĩha nĩ ũndũ wa mĩaka ĩrĩa mĩmera yanyu ĩrĩĩtwo nĩ ngigĩ iria ithiaga irĩ gĩkundi, ngigĩ iria itarĩ mathagu, ngigĩ iria irĩ mũkoroko, na ngigĩ iria itamburaga, O icio mbũtũ yakwa nene ĩrĩa ndatũmire gatagatĩ-inĩ kanyu.

Hatarĩ nganja nĩ mũkaarĩa na mũhũne, Na nĩ mũgaakumia rĩĩtwa rĩa Yahweh Kĩhoti wanyu, O ũcio wĩkĩte maũndũ ma magegania nĩ ũndũ wanyu; Andũ akwa matigaacoka gũconorithio rĩngĩ.

Na nĩ mũkaamenya atĩ ndĩ thĩinĩ wa Isiraeli Na atĩ niĩ nĩ niĩ Yahweh Kĩhoti wanyu—gũtirĩ ũngĩ! Andũ akwa matigaacoka gũconorithio rĩngĩ.

Thutha ũcio nĩ ngaaitĩrĩria andũ a mĩthemba yothe roho wakwa, Na ariũ anyu na aarĩ anyu nĩ makaaratha mohoro, Athuri anyu arĩa akũrũ nĩ makaarota iroto, Nao anake anyu nĩ makoona cioneki.

O na ngombo ciakwa cia arũme na cia andũ-a-nja Nĩ ngaaciitĩrĩria roho wakwa matukũ-inĩ macio.

Na nĩ ngoonania maũndũ ma magegania igũrũ na thĩ. Gũgaakorũo na thakame na mwaki na itugĩ cia ndogo.

Riũa nĩ rĩkaagarũrũo rĩtuĩke nduma na mweri ũtuĩke thakame Mũthenya ũrĩa mũnene na wa kũmakania wa Yahweh ũtanakinya.

Na mũndũ o wothe ũkayagĩra rĩĩtwa rĩa Yahweh nĩ akaahonokio; Tondũ igũrũ rĩa Kĩrĩma gĩa Zayuni na thĩinĩ wa Yahrushalayim nĩ gũgaakorũo na arĩa makaahonoka, o ta ũrĩa Yahweh oigĩte, Arĩa magaatigara, o acio Yahweh etaga.”