Joeli 3

“Na rĩrĩ, matukũ-inĩ macio na ihinda-inĩ rĩu, Rĩrĩa ngaacokia andũ arĩa matahĩtwo a Yahuda na Yahrushalayim,

Nĩ ngaacokanĩrĩria ndũrĩrĩ ciothe hamwe Na ndĩciikũrũkie ndĩcitware Mũkuru-inĩ wa Jehoshafatu. Nĩ ngaaciciirithia irĩ kũu Nĩ ũndũ wa andũ akwa na igai rĩakwa Isiraeli, Tondũ nĩ maamahurunjire gatagatĩ-inĩ ka ndũrĩrĩ, Na makĩgayana bũrũri wakwa.

Maacukagĩra andũ akwa mĩtĩ; Maaneanaga kamwana magagakũũrania na mũmaraya Na makendia kairĩtu nĩguo mone ndibei ya kũnyua.

Ningĩ-rĩ, nĩ kĩĩ mũranjũria, Inyuĩ Turo na Sidoni na icigo ciothe cia Filistia? Kaĩ arĩ kwĩrĩhĩria mũrerĩhĩria harĩ niĩ tondũ wa ũndũ njĩkĩte? Angĩkorũo nĩ kwĩrĩhĩria mũrerĩhĩria harĩ niĩ, Nĩ ngaahiũha o na ihenya ndĩmũrehere kwĩrĩhĩria kũu kwanyu igũrũ rĩa mĩtwe yanyu.

Tondũ nĩ muoete betha na thahabu ciakwa, Na mũgatwara mĩthithũ yakwa ĩrĩa mĩega biũ thĩinĩ wa hekarũ cianyu;

Na andũ a Yahuda na a Yahrushalayim nĩ mũmendetie kũrĩ Angiriki, Nĩgetha mũmeherie mũmatware kũraihu na gĩcigo kĩao;

Nĩ ngaamaarahũra moime kũndũ kũrĩa mwamendirie, Na nĩ ngaamũrehera kwĩrĩhĩria kũu kwanyu igũrũ rĩa mĩtwe yanyu.

Nĩ ngeendia ariũ anyu o na aarĩ anyu ndĩmaneane guoko-inĩ kwa andũ a Yahuda, Nao nĩ makaamendia kũrĩ andũ a Sheba, mamendie kũrĩ rũrĩrĩ rwa kũndũ kũraya; Nĩ gũkorũo Yahweh we mwene nĩwe warĩtie ũndũ ũcio.

Anĩrĩrai ũndũ ũyũ gatagatĩ-inĩ ka ndũrĩrĩ: ‘Mwĩhaarĩriei nĩ ũndũ wa mbaara! Arahũrai andũ arĩa marĩ hinya! Thigari ciothe nĩ ikuhĩrĩrie na itharĩkĩre!

Turai hiũ cianyu cia mĩraũ ituĩke hiũ cia njora nacio hiũ cianyu cia gũceha ituĩke matimũ. Mũndũ ũrĩa ũtarĩ hinya nĩ oige atĩrĩ: “Ndĩ na hinya.”

Ũkai mũteithie, inyuĩ ndũrĩrĩ ciothe iria ithiũrũrũkĩirie, cokanĩrĩrai hamwe!’” Atĩrĩrĩ Yahweh, harũrũkia njamba ciaku cia ita kũndũ kũu.

“Ndũrĩrĩ nĩ ciarahũrũo na ithiĩ Mũkuru-inĩ wa Jehoshafatu; Tondũ kũu nĩkuo ngaaikara thĩ nĩgetha nduĩre ndũrĩrĩ ciothe iria ithiũrũrũkĩirie.

Hiũriai rũhiũ rwa kũgetha, tondũ magetha nĩ makũrũ. Ikũrũkai mũrangarange thabibũ, tondũ kĩhihĩro kĩa ndibei nĩ kĩiyũru. Mĩtũngi nĩ mĩiyũru, nĩ gũkorũo ũũru wao nĩ mũingĩ.

Irĩndĩ-rĩ, irĩndĩ irĩ mũkuru-inĩ wa ituĩro, Tondũ mũthenya wa Yahweh ũrĩ hakuhĩ mũkuru-inĩ wa ituĩro.

Riũa na mweri nĩ ikaagĩa nduma, Nacio njata itigaakorũo na ũtheri wacio.

Nake Yahweh nĩ akaararama arĩ Zayuni, Nĩ akaanĩrĩra na mũgambo mũnene arĩ Yahrushalayim. Na igũrũ na thĩ nĩ igaathingitha; Ĩndĩ Yahweh agaatuĩka rĩũrĩro harĩ andũ ake, Atuĩke handũ hairigĩre harĩ andũ a Isiraeli.

Na nĩ mũkaamenya atĩ niĩ nĩ niĩ Yahweh Kĩhoti wanyu, o niĩ ndũũraga Zayuni, kĩrĩma gĩakwa kĩrĩa kĩamũre. Yahrushalayim gũgaatuĩka kũndũ kwamũre, Na ageni matigaacoka gũtuĩkanĩria kuo rĩngĩ.

Mũthenya ũcio irĩma igaataatia ndibei ĩrĩ na cama, Tũthũngũri tũthererie iria, Natuo tũrũũĩ tuothe twa Yahuda tũthererie maĩ. Itherũkĩro rĩa maĩ nĩ rĩgaatherera kuuma nyũmba-inĩ ya Yahweh, Na rĩnyuithie Mũkuru wa Mĩtĩ ya Mĩgaa.

No Misiri ĩgaatuĩka kũndũ gũtiganĩrie, Nayo Edomu ĩtuĩke werũ mũtiganĩrie, Tondũ wa maũndũ ma ũhinya marĩa andũ a Yahuda mekĩtwo, O acio bũrũri wao waitirũo thakame ĩtarĩ na mahĩtia nĩo.

Ĩndĩ Yahuda gũgaatũũra gũikaragwo nĩ andũ, Nakuo Yahrushalayim gũtũũrũo nginya njiarũa na njiarũa.

Thakame yao ĩrĩa ndonaga ĩrĩ na mahĩtia nĩ ngaamĩona ĩtarĩ na mahĩtia; Na Yahweh nĩ agaatũũra thĩinĩ wa Zayuni.”