Johana wa Mbere 5

Mũndũ o wothe wĩtĩkĩtie atĩ Yahshua nĩwe Messiya aciarĩtwo kuumana na Yahweh, nake mũndũ o wothe wendete ũrĩa watũmire gũciarũo kũu gwĩkĩke nĩ endete ũrĩa ũciarĩtwo kuumana na ũcio.

Ũndũ ũyũ nĩguo ũtũmaga tũmenye atĩ nĩ twendete ciana cia Yahweh, twakorũo twendete Yahweh na tũkahingagia Maathani make.

Nĩ gũkorũo kwenda Yahweh nĩ atĩrĩ, tũmenyagĩrĩre Maathani make; na Maathani make ti mũrigo,

tondũ mũndũ o wothe ũciarĩtwo kuumana na Yahweh nĩ atooragia thĩ. Na ũyũ nĩguo ũhootani ũrĩa ũtooretie thĩ, wĩtĩkio witũ.

Nũ ũngĩhota gũtooria thĩ? Na githĩ ti mũndũ ũrĩa wĩtĩkĩtie atĩ Yahshua nĩ Mũrũ wa Yahweh

Ũcio nĩwe wokire na njĩra ya maĩ na thakame, Yahshua Messiya, no ti na maĩ matheri, ĩndĩ nĩ na maĩ na thakame. Na Roho nĩ ũrutaga ũira, tondũ Roho nĩguo ũhoro ũrĩa wa ma

Nĩ gũkorũo kũrĩ indo ithatũ irutaga ũira:

Roho, Maĩ, na Thakame; na icio ithatũ nĩ irĩ ũiguano.

Angĩkorũo nĩ twĩtĩkagĩra ũira wa andũ, ũira wa Yahweh nĩ mũnene makĩria. Nĩ gũkorũo ũyũ nĩguo ũira ũrĩa Yahweh arutaga, ũira ũrĩa arutĩte wĩgiĩ Mũrũ Wake.

Mũndũ ũrĩa ũigaga wĩtĩkio wake harĩ Mũrũ wa Yahweh, arĩ na ũira ũcio thĩinĩ wake. Mũndũ ũrĩa ũtarĩ wĩtĩkio harĩ Yahweh amũtuĩte mũhenania, nĩ gũkorũo ndaigĩte wĩtĩkio wake harĩ ũira ũrĩa Yahweh arutĩte wĩgiĩ Mũrũ Wake.

Na ũira ũcio nĩ atĩ, Yahweh nĩ aatũheire muoyo wa tene na tene, na muoyo ũcio ũrĩ thĩinĩ wa Mũrũ Wake

Ũrĩa ũrĩ na Mũriũ arĩ na muoyo ũcio; ũrĩa ũtarĩ na Mũrũ wa Yahweh ndarĩ na muoyo ũcio.

Ndĩramwandĩkĩra maũndũ maya nĩgetha mũmenye atĩ mũrĩ na muoyo wa tene na tene, inyuĩ arĩa mũigaga wĩtĩkio wanyu harĩ rĩĩtwa rĩa Mũrũ wa Yahweh.

Na ũyũ nĩguo ũũma ũrĩa tũkoragwo naguo harĩ we, atĩ tũngĩhoya ũndũ o na ũrĩkũ kũringana na wendi wake, nĩ atũiguaga.

Na angĩkorũo nĩ tũũĩ atĩ nĩ atũiguaga ũhoro-inĩ o wothe twamũhoya-rĩ, nĩ tũũĩ atĩ nĩ tũkũheo indo iria tũhoyaga, nĩ gũkorũo nĩ tũmũhoete.

Mũndũ o wothe angĩona mũrũ wa Ithe agĩka rĩhia rĩtangĩrehe gĩkuũ, nĩ amũhoere, na Yahweh nĩ ekũmũhe muoyo, acio nĩ arĩa matekaga rĩhia rĩrĩa rĩrehaga gĩkuũ. Nĩ kũrĩ rĩhia rĩrehaga gĩkuũ. Ti ũhoro wĩgiĩ rĩhia ta rĩu ndĩrera mũndũ ũcio amũhoere.

Maũndũ mothe matarĩ ma ũthingu nĩ mehia, no nĩ kũrĩ rĩhia rĩtarehaga gĩkuũ.

Nĩ tũũĩ atĩ mũndũ o wothe ũciarĩtwo kuumana na Yahweh ndehagia, no atĩ ũrĩa ũciarĩtwo kuumana na Yahweh nĩ amũroraga, nake ũrĩa mũũru ndangĩhota kũmũnyita

Nĩ tũũĩ atĩ tuumanĩte na Yahweh, no thĩ yothe ĩkoragwo rungu rwa hinya wa ũrĩa mũũru.

No nĩ tũũĩ atĩ Mũrũ wa Yahweh nĩ okĩte, na nĩ atũheete ũtaũku nĩguo tũgĩe na ũmenyo wĩgiĩ Ũrĩa wa Ma. Na tũrĩ na ũiguano na Ũcio wa Ma, kũgerera Mũrũ Wake Yahshua Messiya. Ũcio nĩwe Kĩhoti ũrĩa wa ma na muoyo wa tene na tene

Twana tũtũ, mwĩthemagei mĩhianano.