Johana wa Mbere 4

Arata akwa endwa, mũtigetĩkagie roho o wothe, no mũroragie maroho muone kana moimĩte kũrĩ Yahweh, tondũ anabii aingĩ a maheni nĩ moimagarĩte magathiĩ thĩ yothe.

Ũũ nĩguo mũngĩhota gũkũũrana Roho wa Yahweh: Roho o wothe ũrĩa uumbũraga atĩ Yahshua Messiya nĩ okĩte arĩ na mwĩrĩ, ũcio uumĩte kũrĩ Yahweh,

no roho o wothe ũrĩa ũtoimbũraga Yahshua, ũcio nduumĩte kũrĩ Yahweh. Ũcio nĩ roho wa mũmena-Messiya, ũrĩa mũiguĩte atĩ nĩ ũgoka na o na rĩu nĩ ũrĩkĩtie gũũka gũkũ thĩ.

Inyuĩ twana twakwa nyendete, inyuĩ mũrĩ a Yahweh na nĩ mũmatoretie, tondũ ũrĩa ũrĩ thĩinĩ wanyu nĩ mũnene gũkĩra ũrĩa ũrĩ gũkũ thĩ.

Acio moimĩte gũkũ thĩ, na nĩ ũndũ ũcio maaragia ũhoro wa maũndũ ma gũkũ thĩ, na thĩ na andũ a gũkũ thĩ makamathikĩrĩria.

Ithuĩ tuumĩte kũrĩ Yahweh, nake mũndũ o wothe ũrĩa ũũĩ Yahweh nĩ atũthikagĩrĩria; no ũrĩa wothe ũtoimĩte kũrĩ Yahweh ndatũthikagĩrĩria. Ũguo nĩguo tũkũũranaga Roho ũrĩa wa ma, na roho ũrĩa wa maheni.

Arata akwa endwa, nĩ twendanagei mũndũ na ũrĩa ũngĩ, nĩgũkorwo Wendani uumaga kũrĩ Yahweh. Mũndũ o wothe ũrĩa wendanaga, aciarĩtwo nĩ Yahweh o na nĩ oĩ Yahweh

Mũndũ o wothe ũrĩa ũtendanaga ũcio ndoĩ Yahweh, tondũ Yahweh nĩ Wendo.

Ũũ nĩguo Yahweh oonanirie Wendani wake harĩ ithuĩ: Nĩ atũmire Mũriũ wake, o we wa mũmwe, gũkũ thĩ nĩgetha tũtũũre muoyo nĩ ũndũ wake.

Ũyũ nĩguo Wendani: Ti atĩ nĩ ithuĩ twendire Yahweh, no we nĩwe watwendire, na agĩtũma Mũriũ wake atuĩke igongona rĩa kũhoroheria mehia maitũ

Arata akwa endwa, kuona atĩ Yahweh nĩguo atwendete-rĩ, o na ithuĩ nĩ tũkĩagĩrĩirwo twendanage.

Gũtirĩ mũndũ ũrĩ wona Yahweh; no tũngĩendana mũndũ na ũrĩa ũngĩ-rĩ, Yahweh nĩ atũũraga thĩinĩ witũ, naguo Wendani wake ũgakinyanĩra thĩinĩ witũ.

Ũndũ ũrĩa ũtũmaga tũmenye atĩ tũtũũraga thĩinĩ wake nake agatũũra thĩinĩ witũ, nĩ atĩ nĩ atũheete Roho wake.

Na nĩ tuonete na tũkoimbũra atĩ Ithe witũ nĩ atũmĩte Mũriũ atuĩke Mũhonokia wa thĩ yothe

Mũndũ o wothe angiumbũra atĩ Yahshua nĩ Mũrũ wa Yahweh-rĩ, Yahweh atũũraga thĩinĩ wake, nake agatũũra thĩinĩ wa Yahweh.

Na nĩ ũndũ ũcio nĩ tũmenyete na tũkehoka Wendani ũrĩa Yahweh atwendete naguo.

Ũguo nĩguo wendani ũkinyanagĩra thĩinĩ witũ nĩgetha tũkaagĩa na ũũmĩrĩru mũthenya ũrĩa gũgaatuanĩrwo cira, tondũ tũrĩ gũkũ thĩ nĩ tũhaanaine nake.

Wendani ndũrĩ guoya. No Wendani ũrĩa mũkinyanĩru nĩ ũingataga guoya, tondũ guoya ũkonainie na iherithia. Mũndũ ũrĩa wĩtigagĩra, ndatuagwo mũkinyanĩru thĩinĩ wa Wendani.

Ithuĩ twendanaga tondũ we nĩwe waambire gũtwenda

Mũndũ angiuga atĩrĩ, “Nĩ nyendete Yahweh,” na nĩ athũire mũrũ kana mwarĩ wa ithe-rĩ, ũcio nĩ wa maheni. Nĩgũkorwo mũndũ o wothe ũtendete mũrũ wa ithe, ũrĩa atũire onaga, ndangĩhota kwenda Yahweh, ũrĩa atarĩ oona

Nake nĩ atũheete Rĩathani rĩrĩ: Mũndũ o wothe wendete Yahweh, no nginya ende mũrũ kana mwarĩ wa ithe o nake.