Johana wa Mbere 3

Onei wendo mũnene ũrĩa Ithe witũ atuonetie, atĩ tũgeetwo ciana cia Yahweh! Na ũguo nĩguo tũtariĩ. Nĩkĩo thĩ ĩtatũũĩ, tondũ ndĩmũmenyete.

Endwa akwa, ithuĩ rĩu tũrĩ ciana cia Yahweh, no gũtirĩ kũraguũrio ũrĩa tũgaatuĩka. Nĩ tũũĩ atĩ rĩrĩa akaaguũrio tũkaahaanana nake, tondũ tũkaamuona o ta ũrĩa atariĩ

Na mũndũ o wothe ũrĩ na kĩĩrĩgĩrĩro kĩu thĩinĩ wake nĩ etheragia akeyamũrĩra Yahweh, o ta ũrĩa ũcio nake arĩ Mwamũre.

Mũndũ o wothe ũmenyerete kwĩhia ningĩ nĩ amenyerete kwagarara Watho, tondũ kwĩhia nĩ kwagarara-Watho.

Ningĩ nĩ mũũĩ atĩ aaguũririo nĩguo eherie mehia maitũ, na ndarĩ mehia thĩinĩ wake

Mũndũ wothe ũtũũraga arĩ na ũiguano nake ndehagia; gũtirĩ mũndũ ũmenyerete kwĩhia ũrĩ wamuona kana akamũmenya.

Twana tũtũ, mũndũ o na ũrĩkũ ndakanamũhĩtithie; mũndũ ũrĩa ũmenyerete gwĩka maũndũ ma ũthingu nĩ mũthingu, o ta ũrĩa ũcio arĩ mũthingu.

Mũndũ ũrĩa ũmenyerete kwĩhia oimanĩte na ũrĩa mũũru, tondũ ũrĩa mũũru akoretwo akĩĩhia kuuma o kĩambĩrĩria. Na ũndũ ũcio nĩguo watũmire Mũrũ wa Yahweh aguũrio, nĩguo oinange mawĩra ma ũrĩa mũũru.

Mũndũ wothe ũciarĩtwo kuumana na Yahweh ndehagia, nĩ ũndũ mbeũ Yake ĩtũũraga thĩinĩ wa mũndũ ta ũcio, na ndangĩhota kwĩhia nĩ gũkorũo aciarĩtwo kuumana na Yahweh

Ciana cia Yahweh na ciana cia ũrĩa mũũru imenyekaga na ũndũ ũyũ: Mũndũ o wothe ũtemenyeragia gwĩka maũndũ ma ũthingu ndoimanĩte na Yahweh, o na kana mũndũ ũrĩa ũtendete mũrũ wa Ithe o nake.

Tondũ ĩno nĩyo ndũmĩrĩri ĩrĩa mwaiguire kuuma o kĩambĩrĩria, atĩ nĩ twagĩrĩirũo kwendana;

ti ta Kaini, ũrĩa woimanĩte na ũrĩa mũũru na akĩũraga mũrũ wa nyina. Na nĩ kĩ gĩatũmire amũũrage? Nĩ tondũ ciĩko ciake ciarĩ njũru, nacio cia mũrũ wa nyina ciarĩ cia ũthingu.

Ariũ a Ithe witũ, mũtikagege atĩ tondũ thĩ nĩ ĩmũthũire

Nĩ tũũĩ atĩ nĩ tuumĩte thĩinĩ wa gĩkuũ tũgatonya muoyo-inĩ, tondũ nĩ twendete ariũ a Ithe witũ. Ũrĩa ũtendanaga atũũraga thĩinĩ wa gĩkuũ

Mũndũ o wothe ũthũire mũrũ wa Ithe nĩ mũũragani, na nĩ mũũĩ atĩ gũtirĩ mũũragani ũrĩ na muoyo wa tene na tene thĩinĩ wake.

Ũndũ ũyũ nĩguo ũtũmĩte tũmenye ũhoro wa Wendani, tondũ ũcio nĩ aarutire muoyo wake nĩ ũndũ witũ, na ithuĩ nĩ twagĩrĩirũo kũruta mĩoyo itũ nĩ ũndũ wa ariũ a Ithe witũ.

No mũndũ o wothe ũrĩ na indo cia thĩ ĩno na akona mũrũ wa Ithe arĩ na thĩna no akarega kũmũcaĩra-rĩ, Wendani wa Yahweh ũngĩgĩkorũo thĩinĩ wake atĩa?

Twana tũtũ, ithuĩ tũtiagĩrĩirũo kwendana na ciugo kana na kanua tu, ĩndĩ twagĩrĩirũo kwendana na ciĩko na ma.

Ũndũ ũcio nĩguo ũrĩtũmaga tũmenye atĩ tuumanĩte na ũhoro ũrĩa wa ma, na tũkagĩa na ũũma thĩinĩ wa ngoro ciitũ tũrĩ mbere yake

ũhoro-inĩ wĩgiĩ ũndũ o wothe ũrĩa ngoro ciitũ ingĩtũtuĩra, tondũ Yahweh nĩ mũnene gũkĩra ngoro ciitũ na nĩ oĩ maũndũ mothe

Endwa akwa, ngoro ciitũ ingĩaga gũtũtuĩra-rĩ, no tũkorũo na wĩyathi wa kwaria na Yahweh;

na kĩrĩa gĩothe tũmũhoyaga nĩ atũheaga, tondũ nĩ tũmenyagĩrĩra Maathani make na tũgeka maũndũ marĩa maagĩrĩru maitho-inĩ make

Na rĩrĩ nĩrĩo Rĩathani rĩake: Atĩ tũgĩe na wĩtĩkio harĩ rĩĩtwa rĩa Mũrũwe Yahshua Messiya na twendanage, o ta ũrĩa aatũheire Rĩathani

Makĩria ma ũguo, mũndũ ũrĩa ũmenyagĩrĩra Maathani make atũũraga arĩ na ũiguano hamwe nake, nake agatũũra arĩ na ũiguano hamwe na mũndũ ta ũcio. Na kũgerera Roho ũrĩa aatũheire, nĩ tũmenyaga atĩ atũũraga arĩ na ũiguano hamwe na ithuĩ.