Johana wa Mbere 2
Twana twakwa nyendete, ngũmwandĩkĩra maũndũ maya nĩgetha mũtikehagie. No mũndũ o na ũ angĩĩhia-rĩ, nĩ tũrĩ na mũtũcirĩrĩri harĩ Ithe witũ, na nĩwe Yahshua Messiya, Ũrĩa Mũthingu.
We nĩwe igongona rĩa kũhoroheria mehia maitũ, na to mehia maitũ moiki, no nĩ mehia ma andũ othe a thĩ.
Na ithuĩ nĩ tũmenyaga atĩ nĩ tũmũũĩ, angĩkorwo nĩ twathĩkagĩra Maathani make.
Mũndũ ũrĩa uugaga atĩrĩ, “Nĩ ndĩmũũĩ,” no ndekaga ũrĩa aathanaga-rĩ, ũcio nĩ wa maheni, na ũhoro wa ma ndũrĩ thĩinĩ wake.
No mũndũ o wothe angĩathĩkĩra kiugo gĩake-rĩ, ti-itherũ wendo wa Yahweh nĩ mũkinyanĩru kũna thĩinĩ wake. Ũndũ ũyũ nĩguo ũtũmaga tũmenye atĩ tũrĩ thĩinĩ wake:
Ũrĩa wothe uugaga atĩ nĩ atũire thĩinĩ wake-rĩ, no nginya athiĩ na mĩthiĩre ta ĩrĩa Yahshua aarĩ nayo.
Arata akwa endwa, ti Rĩathani rĩerũ ndĩramwandĩkĩra, no nĩ Rĩathani rĩrĩa rĩa tene, o rĩrĩa mũtũire narĩo kuuma o kĩambĩrĩria. Rĩathani rĩrĩ rĩa tene nĩrĩo ndũmĩrĩri ĩrĩa mũiguĩte.
No rĩu nĩ Rĩathani rĩerũ ndĩramwandĩkĩra; naguo ũhoro wa ma warĩo wonekaga thĩinĩ wake na thĩinĩ wanyu, tondũ nduma no ĩrathira, naguo ũtheri ũrĩa wa ma nĩ ũrĩkĩtie kwara.
Mũndũ ũrĩa uugaga atĩ arĩ ũtheri-inĩ no nĩ athũire mũrũ kana mwarĩ wa ithe-rĩ, ũcio arĩ o nduma-inĩ.
Ũrĩa wothe wendete mũrũ na mwarĩ wa ithe atũũraga ũtheri-inĩ, na thĩinĩ wake gũtirĩ ũndũ ũngĩtũma ahĩngwo.
No ũrĩa wothe ũthũire mũrũ kana mwarĩ wa ithe, arĩ nduma-inĩ na athiaga na nduma; ndamenyaga kũrĩa arathiĩ, tondũ nduma nĩ ĩmũtuĩte mũtumumu.
Ndĩramwandĩkĩra, inyuĩ twana twakwa nyendete, tondũ nĩ mũrekeirwo mehia manyu nĩ ũndũ wa rĩĩtwa rĩake.
Ndĩramwandĩkĩra, inyuĩ maithe, tondũ nĩ mũmenyete ũrĩa warĩ kuo kuuma o kĩambĩrĩria. Ndĩramwandĩkĩra, inyuĩ andũ ethĩ, tondũ nĩ mũtooretie ũrĩa mũũru. Ndĩramwandĩkĩra, inyuĩ twana twakwa nyendete, tondũ nĩ mũmenyete Ithe witũ.
Ndĩramwandĩkĩra, inyuĩ maithe, tondũ nĩ mũmenyete ũrĩa warĩ kuo kuuma o kĩambĩrĩria. Ndĩramwandĩkĩra, inyuĩ andũ ethĩ, tondũ mũrĩ na hinya, nakĩo kiugo kĩa Yahweh nĩ gĩtũũraga thĩinĩ wanyu, na nĩ mũtooretie ũrĩa mũũru.
Mũtikende thĩ kana kĩndũ o gĩothe kĩrĩ thĩinĩ wa thĩ. Mũndũ o na ũ angĩkorwo nĩ endete thĩ-rĩ, wendo wa Ithe witũ ndũrĩ thĩinĩ wake.
Nĩgũkorwo ũndũ o wothe ũrĩ gũkũ thĩ, na nĩmo merirĩria ma mwĩrĩ, na merirĩria ma maitho , na mwĩraho wa kĩrĩa mũndũ arĩ nakĩo na ũrĩa ekaga: maũndũ macio matiumanĩte na Ithe witũ, no moimanĩte na thĩ.
Thĩ na merirĩria mayo nĩ ithiraga, no mũndũ ũrĩa wĩkaga ũrĩa Yahweh endaga atũũraga nginya tene.
Twana twakwa nyendete, rĩrĩ nĩ ithaa rĩa kũrigĩrĩria; na o ta ũrĩa mũiguĩte atĩ mũmena-Messiya nĩ aroka, o na rĩu amena-Messiya aingĩ nĩ mokĩte. Na nĩ ũndũ ũcio nĩ tũmenyete atĩ rĩrĩ nĩrĩo ithaa rĩa kũrigĩrĩria.
Kuuma nĩ moimire kũrĩ ithuĩ, no matiarĩ aitũ. Nĩgũkorwo mangĩarĩ aitũ-rĩ, nĩ mangĩaikarire hamwe na ithuĩ; no gũthiĩ kwao kuonanirie atĩ gũtiarĩ o na ũmwe wao warĩ witũ.
No rĩrĩ, inyuĩ mũrĩ ahake maguta nĩ Ũrĩa Mwamũre, na inyuĩ inyuothe nĩ mũũĩ ũhoro wa ma.
Ndiramwandĩkĩra tondũ mũtiũĩ ũhoro wa ma, no ngũmwandĩkĩra tondũ nĩ mũũĩ ũhoro wa ma, na tondũ gũtirĩ ũhoro wa maheni uumanaga na ũhoro wa ma.
Nũ ũkĩrĩ mũhenania? Nĩ mũndũ ũrĩa ũkaanaga atĩ Yahshua nĩwe Messiya. Mũndũ ta ũcio nĩwe mũmena-Messiya: Mũndũ ũcio nĩ akaanaga Ithe o na Mũriũ
Gũtirĩ mũndũ ũkaanaga Mũriũ ũkĩrĩ na Ithe witũ; ũrĩa wothe uumbũraga Mũriũ arĩ na Ithe o nake.
Mwĩmenyererei nĩguo ũndũ ũrĩa mũrĩkĩtie kũigua kuuma o kĩambĩrĩria ũikarage thĩinĩ wanyu. Ũndũ ũcio ũngĩikara thĩinĩ wanyu-rĩ, o na inyuĩ mũrĩikaraga thĩinĩ wa Mũriũ, o na mũrĩ thĩinĩ wa Ithe.
Na ũndũ ũyũ nĩguo atwĩrĩire: O muoyo wa tene na tene.
Ndĩramwandĩkĩra maũndũ maya makoniĩ ũhoro wa andũ arĩa marageria kũmũhĩtithia.
Na inyuĩ-rĩ, maguta marĩa mwahakirwo nĩwe-rĩ, megũtũũra thĩinĩ wanyu, na mũtibatairio nĩ mũndũ o na ũ wa kũmũruta ũhoro. No rĩrĩ, o ta ũrĩa ihaka rĩake rĩa maguta rĩmũrutaga ũhoro wa maũndũ mothe, na o ta ũrĩa rĩrĩ rĩa ma, na ti rĩa maheni: o ta ũrĩa rĩmũrutĩte-rĩ, tũũrai thĩinĩ wake.
Na rĩu, inyuĩ twana twakwa nyendete, kĩrĩrĩriai gũikara thĩinĩ wake nĩgetha rĩrĩa akoonithanio tũgaakorwo tũrĩ na ũũmĩrĩru na tũtegũconoka mbere yake hĩndĩ ĩrĩa agoka.
Angĩkorwo nĩ mũũĩ atĩ we nĩ mũthingu, kĩmenyei atĩ mũndũ ũrĩa wĩkaga maũndũ marĩa maagĩrĩire nĩ aciarĩtwo nĩwe.