Johana 21

Thutha ũcio Yahshua akĩĩyonithania rĩngĩ kũrĩ arutwo ake Iria-inĩ rĩa Tiberia. Eeyonithanirie na njĩra ĩno

Simoni Kepha, Toma (ũrĩa wetagwo Didymus), Nathanieli wa kuuma Kana ya Galili, ariũ a Zebedi, na arutwo angĩ ake erĩ maarĩ hamwe.

Simoni Kepha akĩmera: “Ndathiĩ gũtega thamaki.” Nao makĩmwĩra: “Tũgũthiĩ nawe.” Makiumagara na makĩingĩra gatarũ, ĩndĩ ũtukũ ũcio gũtirĩ kĩndũ maanyitire.

No rĩrĩa gwathererũkaga, Yahshua akĩrũgama rũteere-inĩ rwa iria, no arutwo acio matiamenyaga atĩ nĩ Yahshua

Yahshua akĩmoria: “Ciana ici, hihi mũrĩ na kĩndũ gĩa kũrĩa?” Makĩmũcokeria: “Aca!”

Nake akĩmera: “Ikiai neti mwena wa ũrĩo wa gatarũ na nĩ mũkũnyita kĩndũ.” Kwoguo magĩikia neti, no matiahotire kũmĩgucia nĩ ũndũ wa ũrĩa thamaki ciarĩ nyingĩ.

Nake mũrutwo ũrĩa weendetwo nĩ Yahshua akĩĩra Kepha ũũ: “Nĩ Yahshua!” Rĩrĩa Simoni Kepha aaiguire atĩ nĩ Yahshua, agĩĩkĩra nguo yake ya igũrũ, tondũ aarĩ njaga, na akĩrũga iria-inĩ

No arutwo acio angĩ magĩũka na gatarũ, magucĩtie neti ĩyo yaiyũrĩte thamaki, tondũ matiarĩ kũraihu na thĩ nyũmũ, maarĩ ta fiti 300.

Rĩrĩa maakinyire rũteere-inĩ rwa iria, makĩona mwaki wa makara na thamaki cigĩrĩirũo igũrũ rĩaguo na hau haarĩ na mũgate

Yahshua akĩmera atĩrĩ: “Rehei thamaki imwe harĩ icio mwanyita.”

Nĩ ũndũ ũcio Simoni Kepha agĩtonya gatarũ-inĩ na akĩgucia neti ĩyo yaiyũire thamaki nene 153, akĩmiumĩria rũteere-inĩ rwa iria. O na irĩ nyingĩ ũguo, neti ĩyo ndĩatuĩkangire.

Yahshua akĩmera: “Ũkai mwĩgagũre.” Na gũtirĩ mũrutwo o na ũmwe warĩ na ũmĩrĩru wa kũmũũria: “Wee nĩwe ũ?” tondũ nĩ maamenyaga nĩ Yahshua

Yahshua akĩoya mũgate na akĩmanengera, agĩcoka agĩka o taguo na thamaki

Rĩu nĩrĩo rĩarĩ riita rĩa gatatũ Yahshua kuumĩrĩra arutwo ake thutha wa kũriũka kuuma kũrĩ arĩa akuũ.

Marĩkia kwĩgagũra, Yahshua akĩũria Simoni Kepha: “Simoni mũrũ wa Jona, nĩ ũnyendete gũkĩra aya?” Kepha akĩmũcokeria: “Ĩĩ nĩ ngwendete Rabbi, wee nĩ ũĩ nĩ ngwendete.” Akĩmwĩra: “Heaga tũgondu twakwa gĩa kũrĩa.”

Ningĩ akĩmũũria riita rĩa kerĩ: “Simoni mũrũ wa Jona, nĩ ũnyendete?” Agĩcokia: “Ĩĩ nĩ ngwendete Rabbi, wee nĩ ũĩ nĩ ngwendete.” Akĩmwĩra: “Rĩithagia ng'ondu ciakwa.”

Ningĩ akĩmũũria riita rĩa gatatũ: “Simoni mũrũ wa Jona, nĩ ũnyendete?” Kepha akĩigua ũũru nĩ ũndũ wa kũũrio riita rĩa gatatũ: “Nĩ ũnyendete?” Nĩ ũndũ ũcio akĩmwĩra atĩrĩ: “Rabbi, wee nĩ ũĩ maũndũ mothe; nĩ ũĩ nĩ ngwendete.” Yahshua akĩmwĩra: “Heaga ng'ondu ciakwa gĩa kũrĩa.

Ngũkwĩra atĩrĩ o ma o ma, rĩrĩa warĩ mũnyinyi, nĩwe weĩkĩraga nguo na ũgathiĩ kũrĩa ũkwenda. No wakũra, ũgaatambũrũkagia moko mũndũ ũngĩ agagwĩkĩra nguo agacoka agagũtwara kũrĩa ũtarenda.”

Ooigire ũguo kuonania nĩ gĩkuũ kĩa mũthemba ũrĩkũ angĩagoocithirie Yahweh nakĩo. Arĩkia kuuga ũguo, akĩmwĩra: “Thiĩ na mbere kũnũmĩrĩra.”

Kepha akĩĩhũgũra akĩona mũrutwo ũrĩa weendetwo nĩ Yahshua amarũmĩrĩire, ũrĩa hĩndĩ ya irio cia hwaĩ-inĩ wetiiranĩtie gĩthũri-inĩ kĩa Yahshua na akĩmũũria: “Rabbi, nũ ũgũgũkunyanĩra?”

Kwoguo rĩrĩa oonire mũrutwo ũcio, Kepha akĩũria Yahshua: “Rabbi, ĩ nake mũndũ ũyũ?”

Yahshua akĩmwĩra: “Angĩkorũo nĩ wendi wakwa aikare nginya ngaacoka-rĩ, ũndũ ũcio ũragũthĩnia nĩkĩ? Wee thiĩ na mbere kũnũmĩrĩra.”

Nĩ ũndũ ũcio ũhoro ũkĩhunja kũrĩ ariũ a Ithe witũ atĩ mũrutwo ũcio ndangĩakuire. No rĩrĩ, Yahshua ndaamwĩrĩte atĩ ndangĩakuire, ĩndĩ ooigĩte: “Angĩkorũo nĩ wendi wakwa aikare nginya ngaacoka-rĩ, ũndũ ũcio ũragũthĩnia nĩkĩ?”

Ũcio nĩwe mũrutwo ũrĩa ũheanĩte ũira wĩgiĩ maũndũ macio na nowe waandĩkire maũndũ macio, na nĩ tũĩ atĩ ũira wake nĩ wa ma.

Ningĩ, nĩ kũrĩ maũndũ mangĩ maingĩ Yahshua eekire, marĩa korũo nĩ maandĩkirũo mothe, ngwĩciria thĩ ndĩngĩaiganĩrire ikũnjo iria ingĩaandĩkirũo.