Jona 1
Kiugo kĩa Yahweh nĩ gĩakinyĩire Jona mũrũ wa Amitai akĩrũo atĩrĩ:
“Ũkĩra ũthiĩ Nineve itũũra rĩrĩa inene, na ũhunjie ũhoro wa gũtuĩrũo kwarĩo, nĩ gũkorũo waganu wa aikari a rĩo nĩ ũnginyĩire.”
No Jona agĩũkĩra nĩguo orĩre Yahweh, athiĩ Tarishishi; agĩikũrũka nginya Jopa agĩkora meri yathiaga kuo. Akĩrĩha na agĩtonya nĩguo athiĩ hamwe nao Tarishishi, orĩre Yahweh.
Nake Yahweh agĩtũma rũhuho rũnene rũhurutane iria-inĩ, na gũkĩgĩa kĩhuhũkanio kĩnene kũu iria-inĩ ũũ atĩ meri yarĩ hakuhĩ gũthũkanga
Aruti wĩra ayo magĩĩtigĩra mũno nginya o mũndũ akĩambĩrĩria gũkaĩra kĩhoti wake amũteithie. Makĩambĩrĩria gũikia indo iria ciarĩ thĩinĩ wa meri iria-inĩ nĩguo ĩhũthe. No Jona nĩ aaikũrũkĩte thĩinĩ biũ na agakoma toro mũritũ
Mũnene wa meri ĩyo agĩthiĩ harĩ we akĩmwĩra atĩrĩ: “Ũkomete nĩkĩ? Ũkĩra ũkaĩre kĩhoti waku! Kwahoteka Kĩhoti nĩ egũtũiguĩra tha, twage gũthira.”
Magĩcoka makĩrana atĩrĩ: “Ũkai tũcuke mĩtĩ nĩgetha tũmenye nũũ ũtũmĩte thĩna ũyũ ũtũkore.” Magĩgĩcuka mĩtĩ, naguo mũtĩ ũkĩgwĩra Jona
Makĩmũũria atĩrĩ: “Ta twĩre nũũ ũtũmĩte thĩna ũyũ ũtũkore? Ũrutaga wĩra ũrĩkũ, na uumĩte kũ? Uumĩte bũrũri ũrĩkũ, na wĩ wa rũrĩrĩ rũrĩkũ?”
Akĩmacokeria: “Niĩ ndĩ Mũhibirania, na ndĩ mwĩtigĩri Yahweh Kĩhoti wa igũrũ, Ũrĩa wombire iria na thĩ nyũmũ.”
Rĩrĩa ooigire ũguo arũme acio magĩĩtigĩra makĩria, makĩmũũria: “Nĩ atĩa ũũ wĩkĩte?” (Andũ acio nĩ maamenyete atĩ nĩ kũũrĩra ooragĩra Yahweh, tondũ nĩ aamerĩte.)
Nĩ ũndũ ũcio makĩmũũria atĩrĩ: “Ũkwenda tũgwĩke atĩa nĩguo iria rĩhoorere?” Nĩ gũkorũo kĩhuhũkanio no kũneneha kĩanenehaga
Nake akĩmacokeria akĩmeera: “Njoyai mũnjikie iria-inĩ, narĩo nĩ rĩkũhoorera; nĩ gũkorũo nĩ njũĩ atĩ nĩ niĩ ndũmĩte kĩhuhũkanio gĩkĩ kĩnene ũũ kĩmũkore.”
No andũ acio makĩgeria mũno gũtwarithia meri ĩcoke thĩ nyũmũ, no makĩremwo tondũ kĩhuhũkanio kĩu kĩarĩ iria-inĩ no kũneneha kĩanenehaga.
Magĩcoka magĩkaĩra Yahweh makĩmwĩra: “Wũi Yahweh, twagũthaitha ndũkareke tũthire nĩ ũndũ wa mũndũ ũyũ! Ndũgatũcokererie thakame ĩtarĩ na mahĩtia, nĩ gũkorũo wee Yahweh, wĩkĩte o ũrĩa wonete kwagĩrĩire.”
Makĩoya Jona makĩmũikia iria-inĩ; narĩo rĩkĩhoorera
Mona ũguo, magĩĩtigĩra Yahweh mũno, makĩrutĩra Yahweh igongona na makĩĩhĩta mĩĩhĩtwa.
Yahweh agĩtũma thamaki nene ĩmerie Jona, nake Jona agĩikara thĩinĩ wa nda ya thamaki ĩyo thikũ ithatũ ũtukũ na mũthenya.