Jona 2

Nake Jona akĩhoya Yahweh Kĩhoti wake arĩ thĩinĩ wa nda ya thamaki ĩyo,

akiuga atĩrĩ: “Ndakaĩire Yahweh rĩrĩa ndarĩ na mĩtangĩko, nake akĩnjigua. Ndahoire ũteithio ndĩ thĩinĩ wa Mbĩrĩra kũrĩa kũriku. Nawe ũkĩigua mũgambo wakwa.

Rĩrĩa wanjikirie kũrĩa kũriku, o kũu iria-inĩ gatagatĩ, Nĩ ndathiũrũrũkĩirio nĩ maĩ maingĩ. Namo makũmbĩ maku mothe marĩa manene makĩhumbĩra.

Na niĩ ngiuga atĩrĩ, ‘Nĩ ndeherio mbere ya maitho maku! Hihi nĩ ngaacoka kwĩrorera hekarũ yaku nyamũre rĩngĩ?’

Ndathiũrũrũkĩirio nĩ maĩ, na maarĩ hakuhĩ kũnduta muoyo; Maĩ ma kũrĩa kũriku maandigicĩirie mĩena yothe. Mũtwe wakwa woohanĩtio nĩ mahuti ma iria-inĩ.

Ndarikĩire nginya rungu rwa irĩma. Nayo mĩgamba ya thĩ ĩkĩĩhingĩrĩria tene na tene. No nĩ warutire muoyo wakwa thĩinĩ wa irima, wee Yahweh Kîhoti wakwa.

Rĩrĩa muoyo wakwa wathiraga, Yahweh nĩwe ndaririkanire. Narĩo ihoya rĩakwa rĩgĩgũkinyĩra, o kũu hekarũ-inĩ yaku nyamũre.

Arĩa mathathayagia mĩhianano ĩtarĩ kĩene makoragwo matiganĩirie ũrĩa ũmaiguagĩra tha.

No niĩ-rĩ, ngũkũrutĩra igongona ngĩgũcokagĩria ngatho. Nĩ ngũhingia mwĩhĩtwa wakwa. Ũhonokio uumaga kũrĩ Yahweh.”

Thutha wa ihinda Yahweh agĩatha thamaki ĩyo, nayo ĩgĩtahĩka Jona thĩ nyũmũ.