Joshua 13

Na rĩrĩ, Joshua nĩ aakũrĩte na agaikangia mĩaka. Kwoguo Yahweh akĩmwĩra ũũ: “Nĩ ũkũrĩte na ũgaikangia mĩaka; no bũrũri ũrĩa ũtigarĩte kwĩgwatĩrũo nĩ mũnene

Ũyũ nĩguo bũrũri ũrĩa ũtigarĩte: icigo ciothe cia Afilisti na Ageshuru othe

(kuuma karũũĩ-inĩ karĩa koimĩte Rũũĩ-inĩ rwa Misri karĩa karĩ mwena wa irathĩro wa Misiri o nginya mũhaka wa Ekironi mwena wa rũgongo, gĩcigo kĩrĩa kĩoĩkaine kĩrĩ kĩa Akanaani) hamwe na icigo cia athani arĩa atano a Afilisti—Agaza, Aashidodi, Aashikeloni, Agiiti, na Aekironi; icigo cia Aavi

mwena wa mũhuro; bũrũri wothe wa Akanaani; Meara ĩrĩa ya Asidoni, gũthiĩ nginya Afeku, o nginya mũhaka-inĩ wa Aamori;

bũrũri wa Agebali na Lebanoni guothe mwena wa irathĩro, kuuma Baali-gadi magũrũ-inĩ ma Kĩrĩma kĩa Herimoni nginya Lebo-hamathu;

aikari othe a gĩcigo kĩrĩa kĩrĩ irĩma kuuma Lebanoni nginya Misirefothu-maimu; na Asidoni othe. Nĩ ngũmaingata mehere mbere ya ciana cia Isiraeli. Wagĩrĩirũo kũheana bũrũri ũcio kũrĩ andũ a Isiraeli ũtuĩke igai rĩao, o ta ũrĩa ngwathĩte

Na no mũhaka ũgayanie bũrũri ũcio harĩ mĩhĩrĩga ĩrĩa kenda o hamwe na nuthu ya mũhĩrĩga wa Manase ũtuĩke igai rĩao.”

Nuthu ĩyo ĩngĩ ya mũhĩrĩga wa Manase, na Arubeni na Agadi maamũkĩrire igai rĩrĩa Musa aamaheire mwena wa irathĩro wa Jorodani, o ta ũrĩa Musa ndungata ya Yahweh aamaheete:

kuuma Aroeru, mũthia-inĩ wa Mũkuru wa Arinoni, na itũũra rĩrĩa rĩrĩ gatagatĩ ka mũkuru ũcio, na kũndũ kwaraganu guothe thĩinĩ wa Medeba gũthiĩ nginya Diboni;

na matũũra mothe ma Mũthamaki Sihoni wa Aamori, ũrĩa wathamakaga Heshiboni, kwambata nginya mũhaka-inĩ wa Aamoni;

o na Gileadi na gĩcigo kĩa Ageshuru na Amaakathi na Kĩrĩma kĩa Herimoni gĩothe na Bashani guothe gũthiĩ nginya Saleka;

ũthamaki wothe wa Ogu kũu Bashani, ũrĩa wathamakaga Ashiterothu na Edirei. (Aarĩ ũmwe wa Arefai arĩa maarĩ a mũico.) Musa akĩmahoota na akĩmaingata

Ĩndĩ ciana cia Isiraeli itiaingatire Ageshuru na Amaakathi, nĩ gũkorũo Geshuru na Maakathi matũire gatagatĩ-inĩ ka Isiraeli nginyagia ũmũthĩ.

Mũhĩrĩga wa Alawii noguo tu ataaheire igai. Magongona ma gũcinwo na mwaki harĩ Yahweh Kĩhoti wa Isiraeli nĩmo igai rĩao, o ta ũrĩa aameerĩire.

Musa agĩcoka akĩhe mũhĩrĩga wa Arubeni igai kũringana na mbarĩ ciao,

na gĩcigo kĩao kĩoimĩte Aroeru, mũthia-inĩ wa Mũkuru wa Arinoni, na itũũra rĩrĩa rĩrĩ gatagatĩ ka mũkuru ũcio, na kũndũ kwaraganu guothe hakuhĩ na Medeba;

Heshiboni na taũni ciakuo ciothe iria irĩ kũndũ kwaraganu, Diboni, Bamothu-baali, Bethi-baali-meoni,

Jahazu, Kedemothu, Mefaathu,

Kiriathaimu, Sibima, na Zerethu-shaharu ĩrĩa ĩrĩ kĩrĩma-inĩ kĩrĩa kĩrĩ hakuhĩ na mũkuru,

Bethi-peori, iharũrũka cia Pisiga, Bethi-jeshimothu,

matũũra mothe ma kũndũ kwaraganu, na ũthamaki wothe wa Mũthamaki Sihoni wa Aamori, ũrĩa wathamakaga Heshiboni. Musa akĩmũhoota we hamwe na atongoria Amidiani, nĩo Evi, Rekemu, Zuru, Huri, na Reba, athamaki arĩa maarĩ rungu rwa Sihoni arĩa maatũũraga bũrũri-inĩ ũcio

Balaamu mũrũ wa Beori, ũrĩa warĩ mũragũri, ooragirũo nĩ ciana cia Isiraeli na rũhiũ rwa njora hamwe na arĩa angĩ mooragirũo

Mũhaka wa Arubeni warĩ Jorodani; na gĩcigo kĩu nĩkĩo kĩarĩ igai rĩa Arubeni kũringana na mbarĩ ciao, hamwe na matũũra na icagi ciamo.

Ningĩ Musa akĩhe mũhĩrĩga wa Gadi igai, akĩrĩheana kũrĩ Agadi kũringana na mbarĩ ciao,

na gĩcigo kĩao kĩarĩ Jazeru na matũũra mothe ma Gileadi na nuthu ya bũrũri wa Aamoni gũthiĩ nginya Aroeru, kũng’ethera Raba;

na kuuma Heshiboni nginya Ramathu-mizipe na Betonimu, na kuuma Mahanaimu nginya mũhaka-inĩ wa Debiri;

na mũkuru-inĩ, Bethi-haramu, Bethi-nimira, Sukothu, na Zafoni, gĩcigo kĩu kĩngĩ kĩa ũthamaki wa Mũthamaki Sihoni wa Heshiboni, mũhaka ũrĩ Jorodani kuuma mwena wa kĩanda wa Iria rĩa Kinerethu mwena wa irathĩro wa Jorodani

Rĩu nĩrĩo rĩarĩ igai rĩa Agadi kũringana na mbarĩ ciao, hamwe na matũũra na icagi ciamo.

Ningĩ Musa akĩheana igai kũrĩ nuthu ya mũhĩrĩga wa Manase, akĩrĩheana kũrĩ nuthu ya mũhĩrĩga wa Manase kũringana na mbarĩ ciao

Na gĩcigo kĩao kĩoimĩte Mahanaimu na Bashani yothe, ũthamaki wothe wa Mũthamaki Ogu wa Bashani, na icagi ciothe cia Jairu cia hema kũu Bashani, taũni 60

Na nuthu ya Gileadi, na Ashiterothu na Edirei, matũũra ma ũthamaki wa Ogu thĩinĩ wa Bashani, gwatuĩkire kwa ariũ a Makiru mũrũ wa Manase, gũgĩtuĩka kwa nuthu ya ariũ a Makiru kũringana na mbarĩ ciao.

Rĩu nĩrĩo igai rĩrĩa Musa aamaheire werũ-inĩ mwaraganu wa Moabi mũrĩmo wa Jorodani, mwena wa irathĩro wa Jeriko.

Ĩndĩ kũrĩ mũhĩrĩga wa Alawii, Musa ndaaheanire igai. Yahweh Kĩhoti wa Isiraeli nĩwe igai rĩao, o ta ũrĩa aameerĩire.