Joshua 24

Thutha ũcio Joshua agĩcokanĩrĩria mĩhĩrĩga yothe ya Isiraeli Shekemu na agĩta athuri othe a Isiraeli, atongoria ao, atuanĩri ciira ao, na anene ao, makĩrũgama mbere ya Kĩhoti ũrĩa wa ma

Joshua akĩra andũ acio othe atĩrĩ: “Yahweh Kĩhoti wa Isiraeli ekuuga ũũ, ‘Maithe manyu ma tene maatũũraga mwena ũrĩa ũngĩ wa Rũũĩ mahinda-inĩ ma tene—Tera ithe wa Iburahimu o we ithe wa Nahori—na maatungatagĩra ihoti ingĩ.

“‘Thutha wa ihinda ngĩruta Iburahimu ithe wanyu wa tene kuuma mwena ũrĩa ũngĩ wa Rũũĩ na ngĩtũma atuĩkanie bũrũri wothe wa Kanaani na ngĩtũma mbeũ yake ĩingĩhe. Ngĩmũhe Isaaka;

nake Isaaka ngĩmũhe Jakubu na Esau. Thutha-inĩ ngĩhe Esau Kĩrĩma gĩa Seiru gĩtuĩke igai rĩake; nake Jakubu na ariũ ake magĩikũrũka magĩthiĩ Misiri

Thutha ũcio ngĩtũma Musa na Haruni, na ngĩhũũra Misiri na maũndũ marĩa ndekire gatagatĩ-inĩ kao, na inyuĩ ngĩcoka ngĩmũruta kuo

Rĩrĩa ndarutaga maithe manyu Misiri na mũgĩkinya iria-inĩ, Amisiri maateng’eretie maithe manyu na ngaari cia mbaara na thigari ciahaicĩte mbarathi, o nginya Iria-inĩ Itune

Nao makĩambĩrĩria gũkaĩra Yahweh, na nĩ ũndũ ũcio akĩrehe nduma gatagatĩ kanyu na Amisiri na akĩrehe iria igũrũ rĩao rĩkĩmahumbĩra, na mũkĩĩyonera na maitho manyu ũrĩa ndekire Misiri. Mũgĩcoka mũgĩtũũra werũ-inĩ ihinda iraihu.

“‘Na ngĩmũkinyia bũrũri-inĩ wa Aamori arĩa maaikaraga mwena ũrĩa ũngĩ wa Jorodani, na makĩrũa na inyuĩ. No ngĩmaneana moko-inĩ manyu nĩguo mwĩgwatĩre bũrũri wao, na ngĩmaniina makĩehera mbere yanyu

Na Balaki mũrũ wa Ziporu, mũthamaki wa Moabi, akĩarahũka na agĩtharĩkĩra Isiraeli. Nĩ ũndũ ũcio agĩta Balaamu mũrũ wa Beori nĩguo oke amũrume

No ndiathikĩrĩirie Balaamu. Na nĩ ũndũ ũcio agĩikara o akĩmũrathimaga, na ngĩmũhonokia kuuma guoko-inĩ gwake.

“‘Mũgĩcoka mũkĩringa Jorodani mũgĩkinya Jeriko. Nao atongoria a Jeriko, Aamori, Aperizi, Akanaani, Ahiti, Agirigashi, Ahivi, na Ajebusi makĩrũa na inyuĩ, no ngĩmaneana guoko-inĩ kwanyu

Nĩ ũndũ ũcio ngĩtũma andũ acio magĩe na kĩeha mũtanakinya kuo, na kĩeha kĩu gĩgĩtũma mamweherere—o ta athamaki erĩ a Aamori. Ti tondũ wa rũhiũ rwanyu rwa njora na ti tondũ wa ũta wanyu

Nĩ ũndũ ũcio ngĩmũhe bũrũri mũtaanogeire na matũũra mũtaakĩte, na mũgĩikara kuo. Rĩu mũrarĩa kuuma mĩgũnda-inĩ ya mĩthabibũ na mĩgũnda-inĩ ya mĩtamaiyũ mũtaahandire.’

“Kwoguo, mwĩtigĩrei Yahweh na mũmũtungatagĩre mũrĩ na wĩkindĩru na wĩhokeku, na mweherie ihoti iria maithe manyu ma tene maatungatagĩra mwena ũrĩa ũngĩ wa Rũũĩ na thĩinĩ wa Misiri, na mũtungatagĩre Yahweh

Rĩu angĩkorũo nĩ mũkuona ũrĩ ũndũ mũũru gũtungatĩra Yahweh, mwĩthuurĩrei ũmũthĩ nũũ mũrĩtungatagĩra, kana nĩ ihoti iria maithe manyu ma tene maatungatagĩra mwena ũrĩa ũngĩ wa Rũũĩ kana nĩ ihoti cia Aamori arĩa mũikaraga bũrũri-inĩ wao. No niĩ na andũ a nyũmba yakwa, tũrĩtungatagĩra Yahweh.”

Nao andũ maigua ũguo makiuga: “Kũroaga gũtuĩka ũguo, atĩ no tũhutatĩre Yahweh tũtungatagĩre ihoti ingĩ

Yahweh Kĩhoti witũ nĩwe watũrutire bũrũri wa Misiri o hamwe na maithe maitũ, kuuma nyũmba-inĩ ya ũkombo, na nĩwe waringire ciama nene tũkĩĩyonagĩra na maitho maitũ na agĩikara agĩtũgitagĩra njĩra-inĩ ĩyo yothe ĩrĩa twagereire na gatagatĩ-inĩ ga ikundi ciothe cia andũ a kũrĩa twatuĩkanĩirie

Yahweh aaingatire ikundi ciothe cia andũ, o nginya Aamori, arĩa maaikaraga bũrũri ũyũ mbere itũ. Nĩ ũndũ ũcio, o na ithuĩ tũrĩtungatagĩra Yahweh, tondũ nĩwe kĩhoti witũ.”

Joshua agĩcoka akĩra andũ acio ũũ: “Mũtingĩhota gũtungatĩra Yahweh, nĩ gũkorũo nĩ Kĩhoti mwamũre; we nĩ Kĩhoti wĩ ũiru. Ndekũmuohera mahĩtia manyu na mehia manyu

Mũngĩtiganĩria Yahweh na mũtungatĩre ihoti ng’eni, o nake nĩ ekũmũũkĩrĩra na amũniine o na thutha wa kũmwĩka maũndũ mega.”

No andũ acio makĩra Joshua ũũ: “Aca, ithuĩ tũrĩtungatagĩra Yahweh!”

Nĩ ũndũ ũcio Joshua akĩra andũ atĩrĩ: “Mũrĩ aira anyu inyuĩ ene a ũguo mwoiga, nĩ mwethuurĩra gũtungatagĩra Yahweh.” Nao makiuga: “Ĩĩ tũrĩ aira.”

“Nĩ ũndũ ũcio, eheriai ihoti ng’eni iria irĩ gatagatĩ-inĩ kanyu, na mwerekerie ngoro cianyu harĩ Yahweh Kĩhoti wa Isiraeli.”

Nao andũ acio makĩra Joshua ũũ: “Nĩ tũrĩtungatagĩra Yahweh Kĩhoti witũ, na nĩ tũrĩathĩkagĩra mũgambo wake!”

Kwoguo Joshua agĩthondeka kĩrĩkanĩro hamwe na andũ acio mũthenya ũcio na akĩmahe watho wa kũrũmĩrĩrũo na matuĩro ma ciira marĩ kũu Shekemu

Joshua agĩcoka akĩandĩka ciugo icio ibuku-inĩ rĩa Watho wa Kĩhoti na akĩoya ihiga inene mũno na akĩrĩhanda rungu rwa mũtĩ mũnene ũrĩa ũrĩ hakuhĩ na handũ harĩa hamũre ha Yahweh.

Joshua agĩthiĩ na mbere kwĩra andũ acio ũũ: “Atĩrĩrĩ, ihiga rĩrĩ rĩgũtuĩka mũira witũ, nĩ gũkorũo nĩ rĩaigua ũrĩa wothe Yahweh atwĩra, na rĩgũtuĩka mũira harĩ inyuĩ, nĩgetha mũtikanae gũkaana Kĩhoti wanyu.”

Thutha ũcio Joshua akĩra andũ mathiĩ, o mũndũ igai-inĩ rĩake.

Thutha wa maũndũ macio, Joshua mũrũ wa Nuni, ndungata ya Yahweh, agĩkua arĩ na ũkũrũ wa mĩaka 110

Nĩ ũndũ ũcio makĩmũthika gĩcigo-inĩ kĩa igai rĩake Timinathu-sera, ĩrĩa ĩrĩ gĩcigo-inĩ kĩrĩa kĩrĩ irĩma kĩa Efiraimu, mwena wa rũgongo wa Kĩrĩma kĩa Gaashu

Andũ a Isiraeli magĩthiĩ na mbere gũtungatĩra Yahweh matukũ mothe ma Joshua na matukũ mothe ma athuri arĩa maatigirũo muoyo thutha wa Joshua gũkua, arĩa mooĩ mawĩko mothe marĩa Yahweh eekĩire ciana cia Isiraeli.

Mahĩndĩ ma Jusufu, marĩa ciana cia Isiraeli ciokĩte namo kuuma Misiri, maathikirũo Shekemu gĩcigo-inĩ kĩa mũgũnda ũrĩa Jakubu aagũrĩte kuuma kũrĩ ariũ a Hamoru, ithe wa Shekemu, na icunjĩ 100 cia mbeca; na ũgĩtuĩka igai rĩa ariũ a Jusufu.

O nake Eliazaru mũrũ wa Haruni agĩkua. Nĩ ũndũ ũcio makĩmũthika Karĩma-inĩ ka Phinehasi mũrũwe, karĩa aaheetwo gĩcigo-inĩ kĩrĩa kĩrĩ irĩma kĩa Efiraimu.