Joshua 23

Na rĩrĩ, thutha wa matukũ maingĩ kuuma rĩrĩa Yahweh aaheire andũ a Isiraeli ũhurũko kuuma harĩ thũ ciao iria ciamarigicĩirie, na Joshua agĩkorũo arĩ mũkũrũ na agaikangia mĩaka,

Joshua agĩta andũ othe a Isiraeli, athuri ao, atongoria ao, atuanĩri ciira ao, na anene ao, akĩmeera atĩrĩ: “Rĩu ndĩ mũkũrũ; na ngaikangia mĩaka

Na nĩ mwĩyoneire maũndũ marĩa mothe Yahweh Kĩhoti wanyu eekire ndũrĩrĩ ici ciothe nĩ ũndũ wanyu tondũ Yahweh Kĩhoti wanyu nĩwe wamũrũagĩrĩra

Na nĩ ndamũgayanirie na njĩra ya gũcuka mĩtĩ bũrũri wa ndũrĩrĩ iria itigarĩte ũtuĩke igai rĩa mĩhĩrĩga yanyu, o hamwe na bũrũri wa ndũrĩrĩ iria ingĩ ndaniinire, kuuma Jorodani o nginya Iria-inĩ Rĩrĩa Inene mwena wa ithũĩro

Na Yahweh nĩwe wathiaga agĩcieheragia mbere yanyu, na agĩcingata nĩ ũndũ wanyu, na mũkĩĩgwatĩra bũrũri wacio, o ta ũrĩa Yahweh Kĩhoti wanyu aamwĩrĩire.

“Rĩu no mũhaka mũgĩe na ũmĩrĩru biũ harĩ kũrũmĩrĩra na kũhingia maũndũ marĩa mothe mandĩkĩtwo ibuku-inĩ rĩa Watho wa Musa na njĩra ya kwaga gũkaanaregana namo mũrore mwena wa ũrĩo kana wa ũmotho,

na njĩra ya kwaga gũkeeingĩrania na ndũrĩrĩ ici itigarĩte gatagatĩ-inĩ kanyu. O na mũtikanagwete marĩĩtwa ma ihoti ciacio kana mwĩhĩte nacio, mũtikanacitungatĩre kana mũcinamĩrĩre

No mwagĩrĩirũo kwĩgwatania na Yahweh Kĩhoti wanyu, o ta ũrĩa mũtũire mwĩkĩte nginyagia ũmũthĩ ũyũ

Yahweh nĩ ekũingata ndũrĩrĩ nene na irĩ hinya ciehere mbere yanyu, nĩ gũkorũo gũtirĩ mũndũ ũrĩ wahota kũmwĩtiiria nginyagia ũmũthĩ ũyũ

Mũndũ wanyu ũmwe tu arĩingatithagia andũ ngiri, tondũ Yahweh Kĩhoti wanyu nĩwe ũramũrũĩrĩra, o ta ũrĩa aamwĩrĩire

Nĩ ũndũ ũcio mwĩmenyagĩrĩrei hingo ciothe na njĩra ya kwenda Yahweh Kĩhoti wanyu.

“No mũngĩkagarũrũka mwĩgwatanie na matigari ma ndũrĩrĩ ici itigarĩte gatagatĩ-inĩ kanyu na mũthondeke ũiguano wa kũhikanagia nacio na mũnyitanagĩre nacio, nacio ikanyitanagĩra na inyuĩ,

mwagĩrĩirũo kũmenya wega atĩ Yahweh Kĩhoti wanyu ndagaathiĩ na mbere kũingata ndũrĩrĩ icio nĩ ũndũ wanyu. Ikaamũhenereria na ituĩke mũtego na iboko cia kũmũhũũra mwena na mwena na mĩigua maitho-inĩ manyu o nginya mũthire thĩinĩ wa bũrũri ũyũ mwega Yahweh Kĩhoti wanyu amũheete.

“Atĩrĩrĩ, rĩu ndĩ hakuhĩ gũkua, na nĩ mũĩ wega na ngoro yanyu yothe na muoyo wanyu wothe atĩ gũtirĩ kiugo o na kĩmwe harĩ ciĩranĩro ciothe njega iria Yahweh Kĩhoti wanyu aamwĩrĩire kĩagĩte kũhinga. Ihingĩte ciothe harĩ inyuĩ. Gũtirĩ kiugo o na kĩmwe kĩagĩte kũhinga

No o ta ũrĩa ciĩranĩro ciothe njega iria Yahweh Kĩhoti wanyu aamwĩrĩire cimũkorete, noguo Yahweh akaamũrehera mwanangĩko wothe ũrĩa aamwĩrĩire na amũniine mũthire thĩinĩ wa bũrũri ũyũ mwega Yahweh Kĩhoti wanyu amũheete

Mũngĩkaaga kũhingia kĩrĩkanĩro kĩa Yahweh Kĩhoti wanyu kĩrĩa aamwathire mũhingagie na mũngĩgathiĩ gũtungatĩra ihoti ingĩ na mũcinamĩrĩre, namo marakara ma Yahweh nĩ makaamũrĩrĩmbũkĩra na mũthire o na ihenya thĩinĩ wa bũrũri ũyũ mwega amũheete.”