Kepha wa Mbere 1

Nĩ niĩ Kepha, mũtũmwo wa Yahshua Messiya, Ngũmwandĩkĩra marũa maya, inyuĩ arĩa Yahweh eyamũrĩire, na mũtũũrĩte mũrĩ ageni gũkũ thĩ, na mũkahurunjũkĩra mabũrũri ma Ponto, na Galatia, na Kapadokia, na Asia, na Bithinia,

o inyuĩ mwathurirwo kũringana na ũrĩa Yahweh Ithe aamũmenyete o mbere, na akamwamũra nĩ ũndũ wa Roho, nĩguo mwathĩkagĩre Yahshua Messiya, na mũminjaminjĩrio thakame yake: Wega na thayũ iromũingĩhĩra.

Yahweh, o we Ithe wa Mwathi witũ Yahshua Messiya, arorathimwo! Yahweh nĩ atũciarĩte rĩngĩ nĩ ũndũ wa tha ciake nyingĩ nĩguo tũgĩe na kĩĩrĩgĩrĩro kĩrĩ muoyo, nĩ ũndũ wa ũrĩa Yahshua Messiya aariũkire akiuma kũrĩ arĩa akuũ.

Aatũciarire nĩguo tũgĩe na igai rĩrĩa rĩtangĩbutha, kana rĩthũke, kana rĩhwerereke, rĩrĩa mũigĩirwo kũu igũrũ,

o inyuĩ mũgitĩirwo nĩ hinya wa Yahweh nĩ ũndũ wa gwĩtĩkia, o nginya hĩndĩ ĩrĩa ũhonokio ũgoka ũrĩa ũhaarĩirio gũkaaguũranĩrio ihinda rĩa mũthia.

Ũhoro ũcio nĩguo mũkenagĩra mũno, o na gwatuĩka rĩu nĩ mũiguithĩtio kĩeha kahinda kanini nĩ kũgerio na magerio ma mĩthemba yothe.

Maũndũ maya mokĩte nĩgetha wĩtĩkio wanyu woneke nĩ wa goro mũno gũkĩra thahabu, ĩrĩa ĩthiraga o na yakorwo ĩtheragio na mwaki, ningĩ ũmenyeke atĩ nĩ wa ma, na atĩ nĩ ũkarehe ũgooci, na riri, na gĩtĩo hĩndĩ ĩrĩa Yahshua Messiya akaaguũranĩrio.

Nĩ mũmwendete o na gũtuĩka mũtirĩ mwamuona; ningĩ mũkamwĩtĩkia o na gũtuĩka rĩu mũtiramuona, na mũkaiyũrwo nĩ gĩkeno gĩtangĩheanĩka ũhoro wakĩo, o kĩrĩa kĩrĩ riri,

nĩgũkorwo nĩ mũraamũkĩra ũndũ ũrĩa mũtanyaga kuona nĩ ũndũ wa wĩtĩkio wanyu, na nĩguo ũhonokio wa ngoro cianyu.

Ũhoro ũcio wa ũhonokio-rĩ, nĩguo anabii, arĩa maarathaga ũhoro wa wega wa Yahweh ũrĩa warĩ ũũke kũrĩ inyuĩ, maacaragia na kĩyo, na makaũtuĩria na ũmenyereri mũnene,

makĩgeria kũmenya nĩ hĩndĩ ĩrĩkũ Roho wa Messiya ũrĩa warĩ thĩinĩ wao orotaga rĩrĩa aarathaga ũhoro wa kũnyarirĩka kwa Messiya na riri ũrĩa ũkaarũmĩrĩra.

Nao nĩ maguũrĩirio atĩ to o ene meetungatagĩra, no nĩ inyuĩ maatungatagĩra, hĩndĩ ĩrĩa maaragia ũhoro wa maũndũ marĩa mwĩrĩtwo rĩu nĩ arĩa maamũhunjĩirie Ũhoro-ũrĩa-Mwega na ũndũ wa Roho Mwamũre ũrĩa watũmirwo kuuma igũrũ. Maũndũ macio nĩmo araika meriragĩria mũno kuona.

Nĩ ũndũ ũcio, ikaragai mwĩhaarĩirie meciria-inĩ manyu; tuĩkai andũ a kwĩrigagĩrĩria merirĩria ma mwĩrĩ; na mũige kĩĩrĩgĩrĩro kĩanyu biũ harĩ wega ũrĩa mũkaaheo hĩndĩ ĩrĩa Yahshua Messiya akaaguũranĩrio.

Tuĩkai ciana cia gwathĩka, na mũtigatongoragio nĩ merirĩria moru marĩa mwatũire namo mbere hĩndĩ ĩrĩa mũtaamenyete Yahweh.

No tondũ ũrĩa wamwĩtire nĩ mwamũre-rĩ, o na inyuĩ tuĩkai aamũre maũndũ-inĩ mothe marĩa mũrĩĩkaga;

nĩgũkorwo nĩ kwandĩkĩtwo atĩrĩ: “Tuĩkai aamũre, tondũ o na niĩ ndĩ mwamũre.”

Na rĩrĩ, tondũ inyuĩ mũkayagĩra Yahweh mũkĩmwĩtaga Ithe wanyu, o we ũrĩa ũtuagĩra o mũndũ o mũndũ kũringana na wĩra wake ategũthutũkania-rĩ, gĩikaragei mũmwĩtigĩrĩte na mũikarage ta mũrĩ agendi gũkũ thĩ.

Nĩgũkorwo nĩ mũũĩ atĩ rĩrĩa mwakũũrirwo mũtigane na mũtũũrĩre wa tũhũ ũrĩa mwatigĩirwo nĩ maithe manyu-rĩ, ti indo iria ibuthaga ta betha kana thahabu mwakũũrirwo nacio,

no mwakũũrirwo na thakame ya goro mũno ya Messiya, ũrĩa wahaanaga ta gatũrũme gatarĩ na kĩmeni kana kaũgũ.

Nake nĩwe wathurĩtwo thĩ ĩtanombwo, no nĩ aguũranĩirio mahinda maya ma kũrigĩrĩria nĩ ũndũ wanyu

Na inyuĩ nĩ mwĩtĩkĩtie Yahweh nĩ ũndũ wake, Kĩhoti ũrĩa wamũriũkirie kuuma kũrĩ arĩa akuũ na akĩmũhe riri, nĩgetha wĩtĩkio wanyu na mwĩhoko ikorwo irĩ o harĩ Yahweh.

Na tondũ rĩu nĩ mũtheretie ngoro cianyu nĩ ũndũ wa gwathĩkĩra ũhoro ũrĩa wa ma, na mũgatuĩka a kwendana kũna na ariũ na aarĩ a Ithe wanyu hatarĩ ũhinga-rĩ, inyuĩ ene endanagai biũ na ngoro cianyu.

Nĩgũkorwo nĩ mũciarĩtwo rĩngĩ, no mũticiarĩtwo kuuma kũrĩ mbeũ ĩrĩa ĩbuthaga, no nĩ ĩrĩa ĩtarĩ ya kũbutha, na ũndũ wa kiugo kĩa Yahweh kĩrĩa kĩrĩ muoyo na gĩtũũraga tene na tene.

Tondũ rĩrĩ, “Andũ othe mahaana ta nyeki, na ũthaka wao wothe ũhaana ta mahũa ma mũgũnda; nyeki nĩ ĩhohaga, namo mahũa magaitĩka,

no kiugo kĩa Yahweh gĩtũũraga nginya tene.” Na kiugo kĩu nĩkĩo mwahunjĩirio.