Kepha wa Mbere 2

Nĩ ũndũ ũcio-rĩ, eheriai rũmena ruothe na maheni mothe, na ũhinga, na ũiru, na gũcambania o guothe.

Na mũtuĩke ta tũkenge mwĩriragĩrie iria rĩrĩa ikinyanĩru rĩa kĩugo, nĩgetha rĩmũkũragie ũhonokio-inĩ wanyu,

tondũ rĩu nĩ mũcamĩte, mũkaigua atĩ Yahweh nĩ mwega.

Ũkai kũrĩ we, o ũcio Ihiga rĩrĩ muoyo, o rĩu rĩaregirwo nĩ andũ, no Yahweh akĩrĩthura, na nĩ rĩa goro harĩ we,

o na inyuĩ, ta mahiga marĩ muoyo-rĩ, nĩ gwakwo mũraakwo mũtuĩke nyũmba ya kĩĩroho, na mũtuĩke gĩkundi kĩamũre kĩa athĩnjĩri-Yahweh gĩa kũrutaga magongona ma kĩĩroho marĩa mangĩĩtĩkĩrĩka nĩ Yahweh nĩ ũndũ wa Yahshua Messiya.

Nĩgũkorwo Maandĩko moigĩte atĩrĩ: “Nĩ njigĩte ihiga Zayuni, ihiga ithure rĩa koine na rĩa goro, na mũndũ ũrĩa ũmwĩhokete ndagaaconorithio.”

Na rĩu kũrĩ inyuĩ arĩa mwĩtĩkĩtie, ihiga rĩrĩ nĩ rĩa goro. No kũrĩ arĩa matetĩkĩtie, “Ihiga rĩrĩa aaki maaregire nĩrĩo rĩtuĩkĩte ihiga inene rĩa koine,”

na ningĩ atĩrĩ, “Nĩrĩo ihiga rĩrĩa rĩtũmaga andũ mahĩngwo, na rwaro rwa ihiga rũrĩa rũtũmaga magũe.” Mahĩngagwo tondũ wa kũrega gwathĩkĩra ũhoro, na noguo maathĩrĩirio.

No inyuĩ-rĩ, mũrĩ rũruka rũthurĩtwo, na thiritũ ya athĩnjĩri-Yahweh ya nyũmba ya ũthamaki, ningĩ mũrĩ rũrĩrĩ rwamũre, o na andũ kĩũmbe matahana arĩa angĩ, nĩguo mwanagĩrĩre ũgooci wa ũcio wamwĩtire muume nduma-inĩ mũtonye ũtheri-inĩ wake wa magegania.

Kũrĩ hĩndĩ mwarĩ andũ mataarĩ kĩene, no rĩu mũrĩ andũ a Yahweh; kũrĩ hĩndĩ mwaagĩte kũiguĩrwo tha, no rĩu nĩ mũiguĩrĩirwo tha.

Arata akwa nyenda mũno, ndamũthaitha mũrĩ ta ageni na agendi gũkũ thĩ, mwĩrigagĩrĩrie merirĩria marĩa moru ma mwĩrĩ, o marĩa marũaga na roho wanyu.

Tũũragai na mĩtũũrĩre mĩega mũrĩ gatagatĩ-inĩ ka andũ arĩa matoĩ Yahweh, nĩgetha o na mangĩmũigĩrĩra atĩ nĩ mwĩkĩte ũũru, meonagĩre ciĩko cianyu njega na magakumia Yahweh mũthenya ũrĩa agoka.

Nĩ ũndũ wa Yahweh-rĩ, athĩkagĩrai wathani o wothe ũrĩa ũheanĩtwo thĩinĩ wa andũ: o na wakorwo nĩ wa mũthamaki, arĩ we mũnene igũrũ rĩa anene arĩa angĩ othe,

o na kana nĩ wa abarũthi arĩa matũmagwo nĩwe nĩguo maherithagie arĩa mekaga ũũru na makagaathĩrĩria arĩa mekaga wega.

Nĩgũkorwo ũrĩa Yahweh endaga nĩ atĩ mwĩkage wega nĩguo mũkiragie mĩario ya ũrimũ ya andũ arĩa matarĩ ũndũ moĩ.

Tũũrai ta andũ matarĩ ngombo, no mũtikanareke wĩyathi wanyu ũtuĩke wa kũhithĩrĩra waganu; tũũragai mũrĩ ndungata cia Yahweh.

Heagai mũndũ o wothe gĩtĩo kĩrĩa kĩmwagĩrĩire: Endagai ngwatanĩro ya andũ arĩa etĩkia, na mwĩtigagĩre Yahweh, o na mũtĩage mũthamaki.

Inyuĩ ngombo-rĩ, athĩkagĩrai anene anyu na mũmatĩage mũno, na to arĩa ega na maiguanagĩra tha, no nĩ o na arĩa mataiguanagĩra tha

Nĩgũkorwo nĩ ũndũ mwega mũndũ angĩkirĩrĩria ruo o na akĩnyariragwo hatarĩ kĩhooto tondũ wa kũmenya ũrĩa Yahweh endaga

No ũngĩhũũrwo nĩ ũndũ wa gwĩka ũũru o na ũkirĩrĩrie-rĩ, ũngĩkĩgaathĩrwo kĩ? No ũngĩnyarirwo nĩ ũndũ wa gwĩka wega na ũkirĩrĩrie-rĩ, ũcio nĩ ũndũ mwega maitho-inĩ ma Yahweh

Ũndũ ũyũ nĩguo mwetĩirwo, tondũ Messiya aanyaririrwo nĩ ũndũ wanyu, akĩmũtigĩra kĩonereria nĩguo mũgeragĩre o makinya-inĩ make.

“We ndaigana kwĩhia, o na kanua gake gatiigana kwaria maheni.”

Hĩndĩ ĩrĩa andũ maamũrumaga, we ndaigana kwĩrumĩra; rĩrĩa aanyariragwo, we ndaigana kũmehĩtĩra. Handũ ha ũguo-rĩ, we nĩ kwĩneana eneanaga kũrĩ ũrĩa ũtuaga cira na ũthingu.

We mwene nĩ akuuire mehia maitũ na mwĩrĩ wake mũtĩ-igũrũ, nĩgetha na ithuĩ tũkue ũhoro-inĩ wa mehia, na tũtũũre muoyo nĩ ũndũ wa ũthingu; mĩtũnda ĩrĩa aahũũrirwo nĩyo ĩtũmĩte mũhone.

Nĩgũkorwo mwatariĩ ta ngʼondu itururĩte, no rĩu nĩ mũcokereire Mũrĩithi na Mũrori wa mĩoyo yanyu.