Kepha wa Mbere 3
O ũguo noguo o na inyuĩ atumia, mwagĩrĩirwo nĩ gwathĩkagĩra athuri anyu, nĩguo hangĩkorwo harĩ amwe ao matetĩkĩtie kiugo kĩa Yahweh, mahote kũgarũrwo ngoro o na hatarĩ ciugo nĩ ũndũ wa mĩtugo ya atumia ao,
nĩ ũndũ wa kuonaga mĩtũũrĩre yanyu ya ũthingu na ya gĩtĩo.
Kwĩgemia kwanyu gũtigatuĩke kwa mwĩrĩ, ta kũrama njuĩrĩ, na kwĩhumba mathaga ma thahabu na nguo thaka,
no handũ ha ũguo-rĩ, gemagiai mũndũ ũrĩa wa hitho wa ngoro thĩinĩ, na ũgemu ũrĩa ũtathũkaga wa roho wa ũhoreri na wa gũkindĩria. Kwĩgemia kũu nĩkuo kũrĩ bata mũno maitho-inĩ ma Yahweh.
Nĩgũkorwo ũguo nĩguo atumia arĩa aamũre a tene arĩa mehokete Yahweh meegemagia, na ũndũ wa gwathĩkagĩra athuri ao ene,
o ta Sara, ũrĩa waathĩkagĩra Iburahĩmu na akamwĩtaga mwathi wake. Inyuĩ mũrĩ ciana ciake mũngĩĩka ũrĩa kwagĩrĩire mũtegwĩtigĩra.
O ũguo noguo o na inyuĩ athuri mwagĩrĩirwo nĩ gũtũũrania na atumia anyu na njĩra ya ũũgĩ, mũkĩmatĩaga tondũ nĩ aruti a wĩra hamwe na inyuĩ, na tondũ matirĩ hinya mũingĩ wa mwĩrĩ ta inyuĩ, ningĩ tondũ mũrĩ agai hamwe na atumia anyu a kĩheo kĩa ũtugi wa muoyo. Ĩkagai ũguo nĩguo gũtikagĩe ũndũ ũngĩgirĩrĩria mahoya manyu.
Ngĩrĩkĩrĩria, ngũmwĩra inyuothe atĩrĩ, mũtũũranagie mũiguanĩte mũndũ na ũrĩa ũngĩ; mũiguanagĩre tha, ningĩ mwendanage ta ciana cia ithe ũmwe, na mũtuĩke atana, na mũikarage mwĩnyihĩtie.
Tigagai kwĩrĩhĩria ũũru na ũũru, kana kwĩrumĩra mwarumwo, no nĩ kaba mũrathimanage, tondũ ũguo nĩguo mwetĩirwo, nĩgetha mũkaagaĩrwo kĩrathimo.
Nĩgũkorwo, “Mũndũ ũrĩa wothe ũngĩenda gũtũũra muoyo na one matukũ mega, no nginya arigĩrĩrie rũrĩmĩ rwake kwaria ũũru, na mĩromo yake kwaragia maheni.
No nginya agarũrũke atige gwĩka ũũru, na ekage o wega; no nginya acaragie thayũ na aũthingatage.
Nĩgũkorwo maitho ma Yahweh maikaraga macũthĩrĩirie andũ arĩa athingu, na matũ make magathikagĩrĩria mahoya mao, no andũ arĩa mekaga ũũru, ũthiũ wa Yahweh nĩ kũmookĩrĩra ũmookagĩrĩra.”
Nũ ũngĩmwĩka ũũru mũngĩkorwo mũrĩ na kĩyo gĩa gwĩka wega?
No rĩrĩ, o na mũngĩnyarirwo nĩ ũndũ wa gwĩka ũrĩa kwagĩrĩire-rĩ, inyuĩ mũrĩ arathime. “Tigagai gwĩtigĩra maũndũ marĩa mũrĩĩkagwo ma kũmũmakia; mũtikanatangĩke.”
No ngoro-inĩ cianyu-rĩ, mwĩyamũrĩrei Yahweh atuĩke Kĩhoti. Ikaragai mwĩhaarĩirie hĩndĩ ciothe gũcokeria mũndũ wothe ũrĩa ũngĩmũũria gĩtũmi gĩa kĩĩrĩgĩrĩro kĩrĩa mũrĩ nakĩo. No ĩkagai ũguo mũrĩ na ũhoreri na gĩtĩo,
mũrĩ na thamiri ĩtegwĩcuka, nĩgetha arĩa macambagia mĩtugo yanyu mĩega tondũ mũrĩ thĩinĩ wa Messiya, maconokage nĩ ũndũ wa gĩcambanio kĩu kĩao
Nĩ kaba kũnyarirwo nĩ ũndũ wa gwĩka wega, angĩkorwo nĩ kwenda kwa Yahweh, handũ ha kũnyarirwo nĩ gwĩka ũũru.
Tondũ Messiya aakuire nĩ ũndũ wa mehia ihinda o rĩmwe rĩa kũigana, ũrĩa mũthingu agĩkua nĩ ũndũ wa arĩa matarĩ athingu, nĩguo atũtware kũrĩ Yahweh. Ooragirwo arĩ thĩinĩ wa mwĩrĩ, no ha ũhoro wa Roho, agĩcokio muoyo,
agĩthiĩ arĩ na muoyo ũcio wa Roho akĩhunjĩria maroho marĩa maarĩ njera,
marĩa maaremete kuuma o tene rĩrĩa Yahweh aatũire etereire akirĩrĩirie matukũ-inĩ ma Nuhu, rĩrĩa thabina yaakagwo. Thĩinĩ wayo haarĩ o andũ anini, nao othe maarĩ andũ anana tu, arĩa maahonokirio maĩ-inĩ,
namo maĩ macio nĩmo ngerekano ya ũbatithio ũrĩa o na inyuĩ ũmũhonokagia, na ti ũhoro wa kweheria o gĩko kĩa mwĩrĩ, no nĩ mwĩhĩtwa wa thamiri ĩtarĩ na ũcuke kũrĩ Yahweh. Kũbatithio kũu nĩkuo kũmũhonokagia nĩ ũndũ wa kũriũkio kwa Yahshua Messiya,
ũrĩa wathiire igũrũ na rĩu aikaraga guoko-inĩ kwa ũrĩo kwa Yahweh, nao araika, na aathani, o na mahinya magatuĩka ma gwathagwo nĩwe.