Kepha wa Mbere 4
Nĩ ũndũ ũcio, tondũ Messiya nĩ anyaririrwo mwĩrĩ-inĩ-rĩ, o na inyuĩ kĩĩhotorei mũrĩ na meciria o ta macio aarĩ namo, tondũ mũndũ ũrĩa ũrĩkĩtie kũnyarirwo mwĩrĩ nĩ atiganĩte na mehia
Nĩ ũndũ wa ũguo, mũtũũrĩre wake ũrĩa ũtigarĩte wa gũtũũra gũkũ thĩ ndarĩtũũraga nĩguo ahingagie merirĩria moru ma mwĩrĩ, no arĩtũũraga nĩguo ekage ũrĩa Yahweh endaga.
Tondũ nĩ mũtũũrĩte ihinda rĩa kũigana mũgĩkaga maũndũ marĩa andũ arĩa matetĩkĩtie Yahweh mendaga gwĩka, namo nĩ ta mĩtũũrĩre ya ũũra-thoni, na merirĩria moru ma mwĩrĩ, na ũrĩu, na gũthiaga maruga-inĩ ma waganu, o na ciathĩ-inĩ cia kũnyua njohi, o na kũhoyaga mĩhianano ĩĩ magigi.
Nao andũ acio nĩ magegaga mona atĩ mũtiranyitanĩra nao hĩndĩ ĩrĩa marakĩrĩrĩria ũmaramari-inĩ ũcio wao, nao magakĩmũcambagia.
Nao no nginya makaaheana ũhoro wa maũndũ mao kũrĩ ũrĩa wĩhaarĩirie gũtuĩra cira arĩa marĩ muoyo na arĩa makuĩte.
Nĩgũkorwo gĩkĩ nĩkĩo gĩtũmi kĩrĩa gĩatũmire Ũhoro-ũrĩa-Mwega ũhunjĩrio o na andũ arĩa makuĩte, nĩgetha ha ũhoro wa mwĩrĩ magaatuĩrwo cira o ta ũrĩa andũ arĩa angĩ magaatuĩrwo, no ha ũhoro wa roho matũũre muoyo o ta ũrĩa Yahweh atũũraga.
Ithirĩro rĩa maũndũ mothe nĩ rĩkuhĩrĩirie. Nĩ ũndũ ũcio ikaragai mũrĩ na ũũgĩ wa ngoro, na mũikarage mũterigĩtwo nĩguo mũhotage kũhoya.
Ningĩ gũkĩra maũndũ mothe, ikaragai mwendaine mũno mũndũ na ũrĩa ũngĩ, tondũ wendani nĩ ũhumbagĩra mehia maingĩ
Ningĩ mũtuganage mũtekũnuguna.
O mũndũ nĩ ahũthĩre kĩheo o gĩothe kĩrĩa amũkĩrĩte nĩguo atungatagĩre andũ arĩa angĩ, arĩ ta mũramati mwĩhokeku wa wega wa Yahweh wa mĩthemba mĩingĩ
Mũndũ o wothe angĩkorwo akĩaria-rĩ, nĩ aarie ta arĩ mũndũ ũkũheana ciugo cia Yahweh. Nake mũndũ o wothe angĩkorwo agĩtungata-rĩ, nĩ atungate na hinya ũrĩa ũheanagwo nĩ Yahweh, nĩgetha Yahweh agoocagwo maũndũ-inĩ mothe thĩinĩ wa Yahshua Messiya. Nake nĩwe ũgũtũũra arĩ na riri na hinya nginya tene na tene. Amein.
Arata akwa nyenda mũno, mũtikagegio nĩ magerio marĩa mũranyarirwo namo, ta arĩ ũndũ mũgeni ũrekĩka thĩinĩ wanyu.
No kenagai nĩgũkorwo nĩ mũgwatanĩire thĩinĩ wa kũnyarirĩka kwa Messiya, nĩgetha mũkaiyũrĩrĩrwo nĩ gĩkeno hĩndĩ ĩrĩa riri wake ũkaaguũranĩrio.
Kũrathimwo-rĩ, nĩ inyuĩ mũngĩrumwo nĩ ũndũ wa rĩĩtwa rĩa Messiya, nĩ ũndũ Roho ũrĩa ũrĩ na riri, o we Roho wa Yahweh, arĩ igũrũ rĩanyu.
Mũndũ wanyu ndakananyarirwo ta mũũragani, kana mũici, kana mũgeri ngero ĩngĩ o yothe, o na kana ta mũndũ ũrĩa wĩtonyagĩrĩria maũndũ-inĩ ma andũ angĩ.
No rĩrĩ, mũndũ angĩnyarirwo tondũ wa gũtuĩka MũMessiya-rĩ, ndakanaconoke, no nĩ agooce Yahweh tondũ nĩ aheetwo rĩĩtwa rĩu.
Nĩgũkorwo ihinda nĩ ikinyu cira wambĩrĩrie gũtuĩrwo andũ a nyũmba ya Yahweh; na angĩkorwo ũkwambĩrĩria na ithuĩ-rĩ, gũgaagĩtuĩka atĩa harĩ arĩa mataathĩkagĩra Ũhoro-ũrĩa-Mwega wa Yahweh?
Na rĩrĩ, “Angĩkorwo nĩ ũndũ ũrĩ hinya mũndũ ũrĩa mũthingu kũhonoka-rĩ, naguo ũhoro wa mũndũ ũrĩa ũtetĩkĩtie Yahweh na ũrĩa mwĩhia ũgaakĩhaana atĩa?”
Nĩ ũndũ ũcio-rĩ, andũ arĩa manyarirĩkaga kũringana na ũrĩa Yahweh endete, nĩ maheane mĩoyo yao kũrĩ Mũũmbi wao ũrĩa wa kwĩhokeka, na mathiĩ na mbere gwĩkaga maũndũ mega.