Kepha wa Mbere 5

Nĩ ũndũ ũcio, ndĩ mũthuri o tao, o niĩ mũira wa mĩnyamaro ya Messiya na mũgai wa riri ũrĩa ũkaaguũrio-rĩ, ndĩrataara athuri arĩa marĩ gatagatĩ-inĩ kanyu ũũ:

Rĩithagiai rũũru rwa Yahweh rũrĩa mwĩhokeirũo, mũgĩtungataga mũrĩ arori, ti tondũ wa kũringĩrĩrio, no nĩ tondũ wa kwĩyendera mũrĩ mbere ya Yahweh; ti tondũ wa kwenda uumithio ũtarĩ wa kĩhooto, ĩndĩ nĩ mũrĩ na wendi;

ti gwĩtua anene igũrũ rĩa andũ arĩa matuĩkĩte igai rĩa Yahweh, ĩndĩ mũtuĩke cionereria harĩ rũũru

Na rĩrĩa mũrĩithi ũrĩa mũnene akaaguũrio, nĩ mũkaaheo thũmbĩ ĩrĩ na riri ĩrĩa ĩtangĩthira.

O ta ũguo-rĩ, inyuĩ anake mwĩnyihagĩriei athuri arĩa akũrũ. No inyuothe mwĩhumbei wĩnyihia kwerekera mũndũ na ũrĩa ũngĩ, tondũ Yahweh nĩ areganaga na arĩa etĩi, no nĩ aheaga arĩa enyihia ũtugi mũnene.

Nĩ ũndũ ũcio, mwĩnyihiei rungu rwa guoko kũrĩ hinya kwa Yahweh, nĩguo akaamũtũũgĩria ihinda rĩrĩa rĩagĩrĩire rĩakinya,

o mũkĩmũikagĩria mĩtangĩko yanyu yothe amĩkue, tondũ nĩ amũrũmbũyagia

Tũũriai ũhoti wanyu wa gwĩciria, ikaragai mwĩiguĩte! Thũ yanyu, Ũrĩa Mũũru, acangacangaga ta mũrũthi ũrararama, agĩetha mũndũ wa gũtambura.

No rũgamai mwĩhandĩte mũregane nake, mũrũmĩte thĩinĩ wa wĩtĩkio, mũkĩmenyaga atĩ thiritũ yothe ya ariũ a Ithe wanyu nĩ ĩracemania na mĩnyamaro o ta ĩyo thĩinĩ wa thĩ.

No thutha wa kũnyamarĩka kahinda kanini, Yahweh mwene ũtugi wothe mũnene, ũrĩa wamwĩtire thĩinĩ wa riri wake wa tene na tene mũrĩ na ũiguano na Messiya, we mwene nĩ ekũrĩkia kũmũmenyeria. Nĩ egũtũma mũrũme, nĩ ekũmwĩkĩra hinya, na nĩ egũtũma mwĩhande wega

Hinya ũrotuĩka wake tene na tene. Amein.

Ndamwandĩkĩra ciugo nyinyi kũgerera harĩ Silvano, ũrĩa nyonaga arĩ mũrũ wa Ithe witũ mwĩhokeku, nĩguo ndĩmwĩkĩre hinya ngoro na ndute ũira mũrũmu atĩ ũyũ nĩguo ũtugi mũnene ũrĩa wa ma wa Yahweh. Rũgamai mwĩhandĩte thĩinĩ waguo.

Mũndũ-wa-nja ũrĩa ũrĩ Babuloni, mũthure o ta inyuĩ, nĩ amũgeithia, na Mariko mũrũ wakwa o nake nĩ amũgeithia.

Geithaniai na ngeithi cia kũmumunyana irĩ na wendani. Inyuothe arĩa mũrĩ na ũiguano na Messiya mũrogĩa na thayũ.