Kĩambĩrĩria 1
Kĩambĩrĩria-inĩ Kîhoti nĩ oombire igũrũ na thĩ..
Na rĩrĩ, thĩ ndĩarĩ ũrĩa yatariĩ na ndĩarĩ kĩndũ, na kwarĩ na nduma maĩ-inĩ mariku, naguo hinya wa Kîhoti wa gwĩka maũndũ wathiangaga kũu igũrũ rĩa maĩ.
Kîhoti agĩcoka akiuga ũũ: “Nĩ kũgĩe ũtheri.” Nakuo gũkĩgĩa ũtheri
Nake Kîhoti akĩona atĩ ũtheri warĩ mwega, na Kîhoti akĩambĩrĩria kũgayũkania ũtheri na nduma
Kîhoti agĩta ũtheri Mũthenya, nayo nduma akĩmĩĩta Ũtukũ.Gũgĩkinya hwaĩ-inĩ na gũgĩkinya rũcinĩ, mũthenya wa mbere.
Kîhoti agĩcoka akiuga ũũ: “Nĩ kũgĩe mũtambũrũko wa rĩera gatagatĩ-inĩ ka maĩ, na maĩ magayũkane na maĩ marĩa mangĩ.”
Kîhoti agĩgĩthondeka mũtambũrũko, namo maĩ ma na thĩ wa mũtambũrũko ũcio akĩmagayũkania na maĩ ma na igũrũ wa mũtambũrũko ũcio. Na gũgĩtuĩka guo
Kîhoti agĩta mũtambũrũko ũcio Igũrũ. Gũgĩkinya hwaĩ-inĩ na gũgĩkinya rũcinĩ, mũthenya wa kerĩ.
Kîhoti agĩcoka akiuga ũũ: “Maĩ marĩa marĩ rungu rwa igũrũ nĩ macokanĩrĩre handũ hamwe, na kũgĩe kũndũ kũũmũ.” Na gũgĩtuĩka guo
Kîhoti agĩta kũndũ kũu kũũmũ Thĩ, namo maĩ macio maacokanĩrĩire akĩmeta Iria. Na Kîhoti akĩona ũndũ ũcio ũrĩ mwega
Kîhoti agĩcoka akiuga ũũ: “Thĩ nĩ ĩmere nyeki, mĩmera ĩraruta mbegũ, na mĩtĩ ya matunda kũringana na mĩthemba yayo, ĩkaruta matunda o hamwe na mbegũ thĩinĩ wa thĩ.” Na gũgĩtuĩka guo
Nayo thĩ ĩkĩambĩrĩria kũmera nyeki, mĩmera ĩraruta mbegũ, na mĩtĩ ĩraciara matunda hamwe na mbegũ, kũringana na mĩthemba yayo. Nake Kîhoti akĩona ũndũ ũcio ũrĩ mwega
Gũgĩkinya hwaĩ-inĩ na gũgĩkinya rũcinĩ, mũthenya wa gatatũ.
Kîhoti agĩcoka akiuga ũũ: “Nĩ kũgĩe imũrĩ mũtambũrũko-inĩ wa igũrũ cia kũgayũkania mũthenya na ũtukũ, na ituĩke imenyithia cia imera na mĩthenya na mĩaka
Igũtuĩka imũrĩ mũtambũrũko-inĩ wa igũrũ imũrĩkage thĩ.” Na gũgĩtuĩka guo
Kîhoti agĩgĩthondeka imũrĩ igĩrĩ nene, kĩmũrĩ kĩnenanene gĩa kũmũrĩkaga mũthenya na kĩmũrĩ kĩninanini gĩa kũmũrĩkaga ũtukũ, na ningĩ agĩthondeka njata
Nĩ ũndũ ũcio Kîhoti agĩciiga mũtambũrũko-inĩ wa igũrũ ciaragĩre thĩ
Na imũrĩkage mũthenya na ũtukũ na igayanagie ũtheri na nduma. Na Kîhoti akĩona ũndũ ũcio ũrĩ mwega
Gũgĩkinya hwaĩ-inĩ na gũgĩkinya rũcinĩ, mũthenya wa kana.
Kîhoti agĩcoka akiuga ũũ: “Maĩ-inĩ nĩ kũiyũre ciũmbe irĩ muoyo, nacio ciũmbe irombũka nĩ ciũmbũke igũrũ rĩa thĩ igereire mũtambũrũko-inĩ wa igũrũ.”
Kîhoti akĩũmba ciũmbe nene cia iria-inĩ na ciũmbe irĩ muoyo iria ciothe ciongoyaga na igathiĩra maĩ-inĩ kũringana na mĩthemba yacio na kĩũmbe gĩothe kĩũmbũkaga kũringana na mũthemba wakĩo. Na Kîhoti akĩona ũndũ ũcio ũrĩ mwega
Nĩ ũndũ ũcio Kîhoti agĩcirathima, akiuga: “Ciaranai na mũingĩhe na mũiyũre maĩ-inĩ ma iria, nacio ciũmbe iria ciũmbũkaga nĩ cingĩhe thĩinĩ wa thĩ.”
Gũgĩkinya hwaĩ-inĩ na gũgĩkinya rũcinĩ, mũthenya wa gatano.
Kîhoti agĩcoka akiuga ũũ: “Thĩ nĩ ĩrute nyamũ irĩ muoyo kũringana na mĩthemba yacio, nyamũ cia mũciĩ na nyamũ iria itambaga thĩ na nyamũ cia gĩthaka kũringana na mĩthemba yacio.” Na gũgĩtuĩka guo
Kîhoti agĩkĩũmba nyamũ cia gĩthaka kũringana na mĩthemba yacio na nyamũ cia mũciĩ kũringana na mĩthemba yacio na nyamũ iria itambaga thĩ kũringana na mĩthemba yacio. Na Kîhoti akĩona ũndũ ũcio ũrĩ mwega.
Kîhoti agĩcoka akiuga atĩrĩ: “Nĩ tũũmbe mũndũ na mũhianĩre witũ, kũringana na ũrĩa tũtariĩ, nao maathage thamaki cia iria-inĩ na ciũmbe iria ciũmbũkaga na nyamũ cia mũciĩ na thĩ yothe o na nyamũ iria itambaga thĩ.”
Kîhoti agĩkĩũmba mũndũ na mũhianĩre wake, akĩmũũmba na mũhianĩre wa Kîhoti; aamombire marĩ mũndũrũme na mũtumia
Ningĩ Kîhoti akĩmarathima, na Kîhoti akĩmeera ũũ: “Ciaranai na mũingĩhe, mũiyũrie thĩ na mũmĩtoorie, mwathage thamaki cia iria-inĩ na ciũmbe iria ciũmbũkaga na kĩũmbe o gĩothe kĩrĩ muoyo gĩthiagĩra thĩ.”
Kîhoti agĩcoka akiuga ũũ: “Nĩ ndamũhe mĩmera yothe ĩrĩa ĩrĩ thĩinĩ wa thĩ, ĩrĩa yothe ĩrutaga mbegũ na mũtĩ o wothe ũrĩ na matunda marutaga mbegũ. Nĩ ituĩke irio cianyu
Nacio nyamũ ciothe cia gĩthaka na nyamũ iria ciũmbũkaga na nyamũ iria ithiagĩra thĩ, nĩ ndacihe mĩmera yothe mĩruru ĩkorũo ĩrĩ irio ciacio.” Na gũgĩtuĩka guo.
Thutha ũcio Kîhoti akĩona indo iria ciothe oombĩte, na rĩrĩ! ciarĩ njega mũno. Gũgĩkinya hwaĩ-inĩ na gũgĩkinya rũcinĩ, mũthenya wa gatandatũ.