Kĩambĩrĩria 2

Kwoguo igũrũ na thĩ na indo ciothe iria irĩ thĩinĩ wacio ikĩrĩka

Na gũkinyĩria mũthenya wa mũgwanja, Kîhoti nĩ aarĩkĩtie wĩra ũrĩa aakoretwo akĩruta, na akĩambĩrĩria kũhurũka mũthenya wa mũgwanja kuuma wĩra-inĩ wake wothe ũrĩa aakoretwo akĩruta

Kîhoti agĩkĩrathima mũthenya ũcio wa mũgwanja na akĩũtua mwamûre, nĩ gũkorũo mũthenya ũcio Kîhoti nĩ akoretwo ahurũkĩte kuuma wĩra-inĩ wothe wa ũũmbi, kĩrĩa gĩothe aabangĩte kũũmba.

Ũyũ nĩ ũhoro wĩgiĩ igũrũ na thĩ ihinda-inĩ rĩrĩa ciombirũo, mũthenya ũrĩa Yahweh Kîhoti oombire thĩ na igũrũ.

Gũtirĩ kĩhinga o na kĩmwe gĩa gĩthaka kĩarĩ kuo thĩinĩ wa thĩ na gũtirĩ mũmera o na ũmwe wa gĩthaka waambĩrĩirie kũmera, nĩ gũkorũo Yahweh Kîhoti ndaatũmĩte kuure mbura thĩinĩ wa thĩ na gũtiarĩ mũndũ wa kũrĩma kũu

Ĩndĩ kĩbii nĩ kĩoimaga na thĩ, gĩkaihũgia thĩ yothe.

Nake Yahweh Kîhoti akĩũmba mũndũ kuuma rũkũngũ-inĩ rwa thĩ na akĩhuhĩrĩria mĩhũmũ ya muoyo maniũrũ-inĩ make, nake mũndũ ũcio agĩtuĩka mũndũ ũrĩ muoyo

Ningĩ Yahweh Kîhoti agĩthondeka mũgũnda thĩinĩ wa Edeni, mwena wa irathĩro; na kũu nĩkuo aaigire mũndũ ũcio oombĩte

Kwoguo Yahweh Kîhoti agĩtũma gũkũre mũtĩ o wothe mũthaka wa kwĩrorerũo na mwega wa kuuma irio hamwe na mũtĩ wa muoyo gatagatĩ ka mũgũnda ũcio na mũtĩ wa kũmenyithania wega na ũũru.

Na rĩrĩ, nĩ kwarĩ na rũũĩ rwathereraga ruumĩte Edeni rwa kũhe mũgũnda ũcio maĩ, na kuuma kũu rwagayũkanire rũgĩtuĩka njũũĩ inya

Rwa mbere rwĩtagwo Pishoni; nĩruo rũthiũrũrũkĩirie bũrũri wothe wa Havila, kũrĩa gũkoragwo na thahabu

Nayo thahabu ya bũrũri ũcio nĩ njega. Ningĩ nĩ kũrĩ ngamu ya bendora na ihiga rĩa onigithi

Rũũĩ rwa kerĩ rwĩtagwo Gihoni; nĩruo rũthiũrũrũkĩirie bũrũri wothe wa Kushi

Rũũĩ rwa gatatũ rwĩtagwo Hidekeli; nĩruo rũgereire mwena wa irathĩro wa Ashuri. Naruo rũũĩ rwa kana nĩ Farati.

Nake Yahweh Kîhoti akĩoya mũndũ ũcio na akĩmũiga mũgũnda-inĩ wa Edeni nĩguo aũrĩmage na aũrũmbũyagie

Ningĩ Yahweh Kîhoti akĩhe mũndũ ũcio watho ũyũ: “Matunda ma mũtĩ o wothe wa mũgũnda ũyũ no ũrĩage ũkaigania

No mũtĩ wa kũmenyithania wega na ũũru, ndũkanarĩe matunda maguo, nĩ gũkorũo mũthenya ũrĩa ũkaamarĩa, hatirĩ nganja no gũkua ũgaakua.”

Yahweh Kîhoti agĩcoka akiuga ũũ: “Ti wega mũndũ ũyũ athiĩ na mbere gũikara arĩ wiki. Nĩ ngũmũũmbĩra mũteithia, ũrĩa maganĩrĩirũo nake.”

Na rĩrĩ, Yahweh Kîhoti nĩ aakoretwo akĩũmba nyamũ ciothe cia gĩthaka kuuma harĩ thĩ na ciũmbe ciothe iria ciũmbũkaga rĩera-inĩ, nake akĩambĩrĩria gũcirehe kũrĩ mũndũ ũcio nĩguo one ũrĩa angĩetire o kĩũmbe; na rĩĩtwa rĩrĩa mũndũ ũcio angĩaheire kĩũmbe o gĩothe kĩrĩ muoyo, nĩrĩo rĩatuĩkaga rĩĩtwa rĩakĩo

Kwoguo mũndũ ũcio akĩhe nyamũ ciothe cia mũciĩ marĩĩtwa o hamwe na ciũmbe iria ciũmbũkaga rĩera-inĩ na nyamũ ciothe cia gĩthaka, ĩndĩ mũndũ ũcio ndaarĩ na mũteithia maganĩrĩirũo nake

Nake Yahweh Kîhoti agĩtũma mũndũ ũcio akome toro mũnene, na rĩrĩa aakomete, akĩruta rũbaru rũmwe rwa mũndũ ũcio na agĩcokia nyama hau rwarĩ

Na Yahweh Kîhoti agĩthondeka rũbaru rũu aarutĩte harĩ mũndũrũme ũcio na rũgĩtuĩka mũtumia, na akĩmũtwara kũrĩ mũndũrũme ũcio.

Nake mũndũrũme ũcio akiuga atĩrĩ: “Ũyũ nĩwe ihĩndĩ rĩa mahĩndĩ makwa Na nyama cia nyama ciakwa. Ũyũ arĩĩtagwo Mũndũ mũka, Nĩ gũkorũo arutĩtwo harĩ mũndũrũme.”

Nĩ ũndũ ũcio mũndũrũme nĩ agaatiga ithe na nyina manyitane na mũtumia wake, nao matuĩke mwĩrĩ ũmwe

Nao eerĩ, mũndũrũme ũcio na mũtumia wake, magĩthiĩ na mbere gũkorũo marĩ njaga; no matiaiguaga thoni.