Kĩambĩrĩria 13

Nake Aburamu agĩkiuma Misiri akĩambata Negebu, we na mũtumia wake na kĩrĩa gĩothe maarĩ nakĩo, o hamwe na Loti

Aburamu aarĩ na ũtonga mũingĩ mũno wa mahiũ, betha, na thahabu

Aathiaga agĩthaamaga kuuma handũ hamwe nginya harĩa hangĩ kuuma Negebu nginya Betheli, o nginya rĩrĩa aakinyire handũ harĩa hema yake yarĩ gatagatĩ ka Betheli na Ai,

kũrĩa aakĩte kĩgongona mbere ĩyo. Hau nĩho Aburamu aakaĩire rĩĩtwa rĩa Yahweh.

Na rĩrĩ, Loti ũcio maathiaga na Aburamu, o nake nĩ aarĩ na ng’ondu, ng’ombe, na hema ciake

Kwoguo matingĩahotire gũikara kũndũ kũu marĩ hamwe othe; indo ciao nĩ ciaingĩhĩte mũno ũũ atĩ matingĩathiire na mbere gũikara hamwe

Nĩ ũndũ ũcio, gũkiumĩra ngucanio gatagatĩ-inĩ ka arĩithi a mahiũ ma Aburamu na arĩithi a mahiũ ma Loti. (Hĩndĩ ĩyo Akanaani na Aperizi maaikaraga bũrũri-inĩ ũcio.)

Kwoguo Aburamu akĩra Loti atĩrĩ: “Ndagũthaitha, nĩ hatige kũgĩa ngucanio gatagatĩ-inĩ gakwa nawe na gatagatĩ-inĩ ka arĩithi akwa na arĩithi aku, nĩ gũkorũo ithuĩ tũrĩ ariũ a ithe ũmwe

Na githĩ to ũthuure harĩa hothe ũngĩenda bũrũri-inĩ ũyũ wothe? Ndagũthaitha, reke tweheranĩre. Ũngĩthiĩ mwena wa ũmotho, niĩ ngũthiĩ wa ũrĩo; no wathiĩ mwena wa ũrĩo, niĩ ngũthiĩ wa ũmotho.”

Nĩ ũndũ ũcio Loti agĩtiira maitho make na akĩona atĩ kĩanda gĩothe kĩa Jorodani kĩarĩ na maĩ maingĩ (mbere ya Yahweh kũniina Sodomu na Gomora), o ta mũgũnda wa Yahweh, o ta bũrũri wa Misiri, o nginya Zoaru

Loti agĩgĩĩthuurĩra kĩanda gĩothe kĩa Jorodani, na Loti agĩthaamĩria kambĩ yake mwena wa irathĩro. Kwoguo makĩeheranĩra

Aburamu agĩgĩikara bũrũri wa Kanaani, no Loti agĩikara matũũra-inĩ ma gĩcigo kĩu. Mũthia-inĩ akĩamba hema yake hakuhĩ na Sodomu

Andũ a Sodomu maarĩ aganu mũno, magakĩria njano harĩ kwĩhĩria Yahweh.

Yahweh akĩra Aburamu atĩrĩ thutha wa Loti kweheranĩra nake: “Ta tiira maitho maku, na ũrĩ o hau ũrĩ ũrore mwena wa rũgongo na wa mũhuro, mwena wa irathĩro, na wa ithũĩro,

tondũ bũrũri ũyũ wothe ũrona nĩ ngũkũhe, wee o hamwe na mbeũ yaku naguo ũtuĩke igai rĩa gũtũũra

Na nĩ ngaatũma mbeũ yaku ĩingĩhe o ta rũkũngũ rwa thĩ, nĩguo angĩkorũo nĩ harĩ mũndũ ũngĩhota gũtara rũkũngũ rwa thĩ, o na mbeũ yaku no ĩtarĩke

Ũkĩra, ũtuĩkanie ũraihu na wariĩ wa bũrũri ũyũ, tondũ nĩ ngũkũhe guo.”

Nĩ ũndũ ũcio Aburamu agĩthiĩ na mbere gũikara hema-inĩ. Thutha ũcio agĩthiĩ gũikaraga gatagatĩ-inĩ ka mĩtĩ ya mĩkĩndũ ya Mamure, ĩrĩa ĩrĩ Hebironi, na agĩakĩra Yahweh kĩgongona kũu