Kĩambĩrĩria 6

Na rĩrĩ, hĩndĩ ĩrĩa andũ maambĩrĩirie kũingĩha gũkũ thĩ na makĩgĩa ciana cia airĩtu-rĩ,

ariũ a Kĩhoti ũrĩa wa ma makĩambĩrĩria kuona atĩ airĩtu a andũ maarĩ athaka. Nĩ ũndũ ũcio makĩambĩrĩria kwĩyoera arĩa othe meethuuragĩra makamatua atumia ao

Nake Yahweh akiuga atĩrĩ: “Roho wakwa ndũgũtũũra ũkirĩrĩirie mũndũ, tondũ mũndũ no mwĩrĩ wa nyama tu. Nĩ ũndũ ũcio, matukũ make megũkorũo marĩ mĩaka 120.”

Matukũ-inĩ macio o na thutha ũcio, nĩ kwarĩ na Anefili gũkũ thĩ. Mahinda-inĩ macio ariũ a Kĩhoti ũrĩa wa ma nĩ maathiire na mbere gũkoma na airĩtu a andũ, nao makĩmaciarĩra ariũ. Nĩo maarĩ njamba iria ciarĩ hinya cia mahinda ma tene, arũme maarĩ igweta.

Nĩ ũndũ ũcio, Yahweh akĩona atĩ waganu wa mũndũ warĩ mũingĩ mũno gũkũ thĩ na atĩ mwerekera wothe wa methugunda ma ngoro yake warĩ mũũru hingo ciothe

Yahweh akĩĩrira nĩ ũndũ wa kũũmba andũ gũkũ thĩ, na akĩigua ũũru ngoro

Kwoguo Yahweh akiuga atĩrĩ: “Nĩ ngũniina andũ aya ndombire mathire thĩinĩ wa thĩ, niine mũndũ o hamwe na nyamũ cia mũciĩ, nyamũ iria itambaga thĩ, na ciũmbe iria ciũmbũkaga rĩera-inĩ, nĩ gũkorũo nĩ ndĩrerira nĩ ũndũ wa gũciũmba.”

No Nuhu agĩtĩkĩrĩka maitho-inĩ ma Yahweh.

Ũyũ nĩ ũhoro wĩgiĩ Nuhu. Nuhu aarĩ mũndũ mũthingu. Aarĩ mũndũ ũtarĩ ũcuke gatagatĩ-inĩ ka andũ arĩa aatũũranagia nao. Nuhu nĩ aatwaranaga na Kĩhoti ũrĩa wa ma.

Nuhu nĩ aagĩire na ariũ atatũ, Shemu, Hamu, na Jafethu

No thĩ nĩ yathũkĩtio mũno maitho-inĩ ma Kĩhoti ũrĩa wa ma, na thĩ yaiyũrĩte ũhinya

Yahweh akĩrora thĩ akĩona ũrĩa yathũkĩtio; kĩũmbe gĩothe kĩa mwĩrĩ wa nyama nĩ gĩathũkĩtie mĩthiĩre yakĩo gũkũ thĩ.

Thutha ũcio Yahweh akĩra Nuhu ũũ: “Nĩ nduĩte itua rĩa kũniina ciũmbe ciothe cia mwĩrĩ wa nyama, tondũ thĩ ĩiyũire ũhinya nĩ ũndũ wacio, kwoguo nĩ ngũciniina o hamwe na thĩ

Wĩyakĩre thabina na mbaũ cia mũthithinda. Na ũthondeke tũnyũmba kũu thĩinĩ wa thabina na ũmĩhumbĩre na rami mwena wa thĩinĩ na wa na nja

Ũũ nĩguo ũkũmĩthondeka: Thabina ĩyo yagĩrĩire gũkorũo na ũraihu wa mĩkono 300, wariĩ wa mĩkono 50, na ũraihu wa na igũrũ mĩkono 30

Na ũthondeke ndirica ya ũtheri wa thabina, ĩkorũo ĩrĩ ya mũkono ũmwe kuuma mwena wa igũrũ. Wagĩrĩirũo gũthondeka mũromo wa thabina mwena-inĩ wayo na ũmĩake ĩrĩ na ngoroba ya thĩ, ngoroba ya kerĩ, na ngoroba ya gatatũ.

“Na niĩ nĩ ngũrehe mũiyũro wa maĩ thĩinĩ wa thĩ nĩguo ũniine ciũmbe ciothe cia mwĩrĩ wa nyama iria irĩ mũhuro wa riũa iria irĩ mĩhũmũ ya muoyo. Kĩndũ gĩothe kĩrĩ thĩinĩ wa thĩ nĩ gĩkũniinwo

Na nĩ ndathondeka kĩrĩkanĩro hamwe nawe, no mũhaka ũtonye thabina, wee, ariũ aku, mũtumia waku, o hamwe na atumia a ariũ aku

Na ũingĩrie thabina-inĩ nyamũ igĩrĩ kuuma harĩ o mũthemba wa ciũmbe ciothe iria irĩ muoyo nĩguo ihonokio itũũre muoyo hamwe na inyuĩ, nyamũ ya njamba na ya mũgoma;

kuuma harĩ ciũmbe iria ciũmbũkaga kũringana na mĩthemba yacio, nyamũ cia mũciĩ kũringana na mĩthemba yacio, na nyamũ ciothe iria itambaga thĩ kũringana na mĩthemba yacio, nyamũ igĩrĩ kuuma harĩ o mũthemba wa ciũmbe icio nĩcio ikaaingĩra nĩguo ihonokio itũũre muoyo

Nawe ũcokanĩrĩrie irio cia mĩthemba yothe cia kũrĩa ũtonye nacio, nĩguo ikorũo irĩ irio ciaku hamwe na nyamũ icio.”

Nake Nuhu agĩka kũringana na ũrĩa wothe Yahweh aamwathĩte. Ũguo noguo eekire.