Kohelethu 10

O ta ũrĩa ngi nguũ itũmaga maguta manungi wega manunge ũũru na marute mũhũyũ, no taguo ũrimũ mũnini ũthũkagia ũũgĩ na riri.

Ngoro ya mũndũ mũũgĩ ĩĩ guoko-inĩ gwake kwa ũrĩo, no ngoro ya mũndũ ũrĩa mũkĩgu ĩrĩ guoko-inĩ gwake kwa ũmotho.

Njĩra-inĩ o yothe mũndũ mũkĩgu athiagĩra, ndakoragwo na wĩcirio, na nĩ atũmaga mũndũ o wothe amenye atĩ we nĩ mũkĩgu.

Roho wa mũndũ ũrĩa ũrathana ũngĩgũũkĩrĩra, ndũkehere handũ haku, nĩ gũkorũo wĩnyihia nĩ ũhooragĩria mehia manene.

Nĩ kũrĩ ũndũ nyonete mũhuro wa riũa ũrehaga mĩtangĩko, mahĩtia marĩa mekagwo nĩ arĩa marĩ na ũnene:

Andũ arĩa akĩgu maigagwo kũndũ gũtũũgĩru kwĩ riri, nao andũ arĩa atongu magaikara kũndũ gũtarĩ gũtũũgĩru.

Nĩ nyonete ndungata igĩthiĩ ikuuĩtwo nĩ mbarathi, nao anene magĩthiĩ magũrũ o ta ndungata.

Mũndũ ũrĩa wenjaga irima no agũe thĩinĩ warĩo; na mũndũ ũrĩa ũmomoraga rũthingo rwa ihiga no arũmwo nĩ nyoka.

Mũndũ ũrĩa wenjaga mahiga no agurario nĩmo, nake mũndũ ũrĩa watũraga ndungu no akorũo ũgwati-inĩ nĩ ũndũ wacio.

Ithanwa rĩngĩkorũo rĩrĩ ituhu na mũndũ age kũrĩnoora, angĩbatara kũhũthĩra hinya mũingĩ. No ũũgĩ nĩ ũteithagia kũrehe ũgaacĩru.

Nyoka ĩngĩrũma mũndũ ĩtanathuuthĩrũo-rĩ, ũndũ ũcio ndũngĩkorũo na ũguni harĩ mũndũ ũcio ũrĩ na ũũgĩ wa gũthuuthĩra.

Ciugo cia kanua ka mũndũ ũrĩa mũũgĩ nĩ itũmaga etĩkĩrĩke, no iromo cia kĩrimũ nĩcio cikĩanangaga

Ciugo cia mbere iria ciumaga kanua-inĩ gakĩo nĩ cia ũrimũ, nacio ciugo cia mũthia nĩ cia ũgũrũki mũtheri

Ĩndĩ kĩrimũ gĩthiaga o na mbere kwaria. Mũndũ ndamenyaga ũndũ ũrĩa ũkaahaanĩka; nũũ ũngĩkĩhota kũmwĩra ũndũ ũrĩa ũgooka thutha wake?

Wĩra mũritũ wa mũndũ ũrĩa mũkĩgu nĩ ũmũnogagia, nĩ gũkorũo o na ndamenyaga njĩra ya gũthiĩ thĩinĩ wa itũũra.

Bũrũri nĩ ũkoragwo na thĩna hĩndĩ ĩrĩa mũthamaki waguo arĩ mwana, nao anene aguo makambĩrĩria ndĩa yao o rũcinĩ.

Kũrathimwo nĩ bũrũri hĩndĩ ĩrĩa mũthamaki waguo arĩ mũrũ wa andũ marĩ igweta, na anene aguo marĩaga ihinda rĩrĩa rĩagĩrĩire nĩguo magĩe na hinya, no ti marĩĩo.

Mĩitĩrĩro ya nyũmba nĩ ĩcuhaga tondũ wa ũgũũta mũnene, nayo nyũmba nĩ yuraga tondũ wa moko kũregera.

Mũgate ũthondekagwo nĩguo ũrehe mĩtheko, nayo ndibei nĩ ĩcanjamũraga ũtũũro; no mbeca nĩ ihingagia mabataro mothe.

Ndũkanarume mũthamaki nginya meciria-inĩ maku, na ndũkanarume andũ arĩa atongu ũrĩ rumu-inĩ yaku ya toro; nĩ gũkorũo kanyoni no gatware mũgambo, kana kĩũmbe kĩrĩ na mathagu gĩcokere ũndũ ũrĩa uugĩtwo.