Kohelethu 11

Ikia mũgate waku igũrũ rĩa maĩ maingĩ, tondũ thutha wa matukũ maingĩ nĩ ũkaawona rĩngĩ.

Gaĩra andũ mũgwanja rwĩga rwao o na wa kanana o nake rwake, nĩ gũkorũo ndũĩ thĩna ũrĩa ũrĩũka thĩinĩ wa thĩ.

Matu mangĩiyũra maĩ, nĩ moiragia mbura igũrũ rĩa thĩ; na mũtĩ ũngĩgũa mwena wa mũhuro kana mwena wa rũgongo, handũ harĩa mũtĩ ũcio wagũa noho ũkomaga.

Mũndũ ũrĩa ũroraga rũhuho ndakaahanda mbeũ, na ũrĩa ũroraga matu ndakaagetha.

O ta ũrĩa ũtamenyaga ũrĩa roho ũrutaga wĩra mahĩndĩ-inĩ ma mwana ũrĩa ũrĩ thĩinĩ wa nda ya mũtumia mũritũ, no taguo ũtangĩmenya wĩra wa Kĩhoti, o ũcio wĩkaga maũndũ mothe.

Handaga mbeũ ciaku rũcinĩ na ndũkarekage guoko gwaku kũhurũke nginya hwaĩ-inĩ; tondũ ndũĩ nĩ ĩrĩkũ ĩkaagĩra, kana nĩ ĩno kana nĩ ĩyo ĩngĩ, kana hihi cierĩ nĩ ikaagĩra.

Ũtheri nĩ mwega, na nĩ ũndũ wa kũiguithia maitho wega kuona riũa

Tondũ mũndũ angĩtũũra mĩaka mĩingĩ, nĩ agĩrĩirũo kũmĩkenera yothe. Ĩndĩ nĩ abatiĩ kũririkana atĩ matukũ ma nduma no makorũo marĩ maingĩ; maũndũ mothe marĩa marĩũka nĩ ma tũhũ.

Kenaga, wee mwanake ũyũ, rĩrĩa ũrĩ mũnyinyi, na ũrekage ngoro yaku ĩkene matukũ-inĩ maku ma wĩthĩ. Rũmagĩrĩra njĩra cia ngoro yaku na ũthiage kũrĩa maitho maku makwerekeria; no ũmenye atĩ Kĩhoti nĩ agaagũciirithia nĩ ũndũ wa maũndũ macio mothe

Nĩ ũndũ ũcio eheria mĩtangĩko ngoro-inĩ yaku, na weherie maũndũ moru mwĩrĩ-inĩ waku, tondũ ũnyinyi o na wĩthĩ nĩ cia tũhũ.