Kohelethu 12

Nĩ ũndũ ũcio, ririkanaga Mũkũũmbi matukũ-inĩ maku ma wĩthĩ, kamũira matukũ ma ũũru moke, nayo mĩaka ĩkinye rĩrĩa ũkoiga atĩrĩ: “Kaĩ ndikenagio nĩyo-ĩĩ!”;

riũa na ũtheri na mweri o na njata itanagĩa nduma, na matu matanacoka thutha wa mbura kuura;

mũthenya ũrĩa arangĩri a nyũmba mainainaga, na arũme arĩa marĩ hinya makainama, na andũ-a-nja magatiga gũthĩa nĩ ũndũ wa gũkorũo marĩ anini, na airĩtu arĩa macũthagĩrĩria ndirica-inĩ makona nduma;

rĩrĩa mĩrango ya gũthiĩ barabara-inĩ ĩkoragwo ĩhingĩtwo, rĩrĩa mũgambo wa gĩthĩi ũnyihaga, rĩrĩa mũndũ okĩragio nĩ mũgambo wa nyoni, na airĩtu othe a nyĩmbo makaga kũiguĩka wega

Ningĩ mũndũ agetigĩra kũndũ gũtũũgĩru, na gũgakorũo na maũndũ ma gwĩkĩra andũ guoya barabara-inĩ. Na mũtĩ wa mũrothi ũkaruta kĩro, na ndaahi ĩgekururia ĩgĩthiĩ, na itunda rĩrĩa rĩarahũraga mĩĩto ya kũrĩa rĩgatumũka, tondũ mũndũ arathiĩ nyũmba yake ĩrĩa egũtũũra ihinda iraya nao arĩa maracakaya makarũmanĩrĩra barabara-inĩ;

mũkanda wa betha ũtaneherio, na mbakũri ya thahabu ĩtanahehenjeka, na ndigithũ ĩrĩa ĩrĩ itherũkĩro-inĩ rĩa maĩ ĩtanakua, na kũgũrũ gwa kũgucia maĩ irima-inĩ gũtanoinĩkanga

Naruo rũkũngũ rũcoke tĩri-inĩ, o kũrĩa ruoimire, na roho ũcoke kũrĩ Kĩhoti o ũcio waũheanire.

“Nĩ tũhũ mũtheri!” ũguo nĩguo mũrutani ekuuga. “Maũndũ mothe nĩ ma tũhũ.”

Mũrutani to kũũhĩga aarĩ mũũgĩ, no nĩ aarutaga andũ hĩndĩ ciothe maũndũ marĩa oĩ, na nĩ eecũranagia na agathuthuria mũno nĩgetha acokanĩrĩrie thimo nyingĩ

Mũrutani nĩ aacaririe nĩguo one ciugo njega na andĩke ciugo itarĩ na mahĩtia cia ũhoro wa ma.

Ciugo cia andũ arĩa ogĩ itariĩ ta mĩcengi, na ciugo ciao icokanĩrĩirio itariĩ ta mĩcumarĩ ĩhũũrĩirũo ĩkarũma wega; ciumĩte harĩ mũrĩithi ũmwe

Ha ũhoro ũngĩ ũkĩrĩte maũndũ macio, reke ngũtaare mũrũ wakwa: Gũthondeka mabuku maingĩ gũtirĩ mũthia, na kũmathoma mũno nĩ kũnogagia mwĩrĩ.

Thutha wa maũndũ mothe kũiguo, kĩrĩkĩrĩro kĩa ũhoro nĩ gĩkĩ: Wĩtigĩre Kĩhoti na wathĩkagĩre maathani make, nĩ gũkorũo gwĩka ũguo nĩ kũhingia maũndũ mothe marĩa mũndũ agĩrĩirũo nĩ gwĩka

Tondũ Kĩhoti nĩ agaatuĩra ũndũ o wothe wĩkĩtwo, nginya ũndũ o wothe mũhithe, woneke kana nĩ mwega kana nĩ mũũru.