Kohelethu 5

Menyagĩrĩra makinya maku rĩrĩa rĩothe ũrathiĩ nyũmba-inĩ ya Kĩhoti; nĩ kaba gũkuhĩrĩria nĩguo ũthikĩrĩrie gũkĩra kũruta igongona rĩa irimũ, tondũ itimenyaga atĩ ũndũ ũrĩa ireka nĩ mũũru.

Ndũkanahĩke kanua gaku, kana ũreke ngoro yaku ĩhiũhe kwaria ũrĩ mbere ya Kĩhoti, nĩ gũkorũo Kĩhoti arĩ igũrũ, no wee ũrĩ gũkũ thĩ. Nĩkĩo ciugo ciaku ibatiĩ gũkorũo irĩ nini

Tondũ kĩroto kiumanaga na mũndũ gũkorũo arĩ na mĩhang’o mĩingĩ, na ndeto cia mũndũ ũrĩa mũkĩgu ciumanaga na ciugo nyingĩ

Rĩrĩa rĩothe wehĩta mwĩhĩtwa harĩ Kĩhoti, ndũkahũthagĩrĩrie kũũhingia, nĩ gũkorũo we ndakenagio nĩ irimũ. Ũndũ ũrĩa wehĩta, ũhingie

Nĩ kaba wage kwĩhĩta gũkĩra wĩhĩte na wage kũhingia

Ndũkanareke kanua gaku gatũme wĩhie, na ndũkanoige ũrĩ mbere ya mũraika atĩ nĩ kũhĩtia wahĩtĩtie. Nĩ kĩĩ kĩngĩgĩtũma ũrakarie Kĩhoti tondũ wa ũndũ ũrĩa uugĩte, ũtũme anange wĩra wa moko maku

Tondũ o ta ũrĩa mĩhang’o mĩingĩ ĩrehaga iroto, no taguo ciugo nyingĩ irehaga maũndũ ma tũhũ. Ĩndĩ wĩtigagĩre Kĩhoti.

Ũngĩkona thĩinĩ wa gĩcigo kĩanyu athĩni makĩhinyĩrĩrio na gũtarĩ na kĩhooto na ũthingu, ndũkagegio nĩ ũndũ ũcio. Tondũ mũnene ũcio nĩ aroragwo nĩ ũrĩa ũrĩ na ũnene kũmũkĩra, na kũrĩ o na angĩ makoragwo marĩ anene gũkĩra acio.

Ningĩ, uumithio wa bũrũri ũgayanagio gatagatĩ-inĩ kao othe; o na mũthamaki arĩaga irio ciumĩte mũgũnda-inĩ.

Ũrĩa wendete betha ndarĩ hĩndĩ akaigania betha, na ũrĩa wendete ũtonga ndarĩ hĩndĩ akaigania uumithio ũrĩa onaga. Ũndũ ũcio o naguo no wa tũhũ.

Rĩrĩa indo njega ciongerereka, arĩa macirĩaga o nao nĩ mongererekaga. Na rĩrĩ, nĩ ũguni ũrĩkũ mwene cio onaga, tiga o gũciĩrorera na maitho make?

Toro wa mũndũ ũrĩa ũtungataga ũkoragwo na cama, o na angĩkorũo arĩaga irio nini kana nyingĩ, ĩndĩ indo nyingĩ iria mũndũ mũtongu akoragwo nacio itirekaga one toro.

Nĩ kũrĩ thĩna mũnene nyonete mũhuro wa riũa: ũtonga ũrĩa waigĩtwo nĩ mwene guo ũgĩcoka gũtũma one ũũru

Ũtonga ũcio wathirire tondũ wa kũrutithio wĩra ũtaarĩkĩrĩirie wega, na rĩrĩa aagĩire mwana, ndaarĩ na kĩndũ gĩatigarĩte.

O ta ũrĩa mũndũ ooimire nda ya nyina, agaathiĩ arĩ njaga, o ta ũguo ookire. Na ndarĩ kĩndũ o na kĩ angĩkuua kiumanĩte na wĩra wake wothe mũritũ.

Ũndũ ũyũ o naguo nĩ thĩna mũnene: O ta ũrĩa ookire, no taguo agaathiĩ; na hihi gũkoragwo na uumithio ũrĩkũ harĩ mũndũ ũrĩa ũrutaga wĩra na kĩyo o ta gũteng’erania na rũhuho

Ningĩ o mũthenya arĩagĩra nduma-inĩ, arĩ na kĩeha kĩingĩ na mũrimũ na marakara.

Ũndũ ũyũ nĩguo nyonete ũrĩ mwega na mwagĩrĩru: atĩ mũndũ agĩrĩirũo kũrĩa na kũnyua na gũkenera wĩra wake wothe mũritũ ũrĩa etungumanagia naguo mũhuro wa riũa, matukũ-inĩ manini ma gũtũũra muoyo marĩa Kĩhoti amũheete, tondũ rĩu nĩrĩo irĩhi rĩake

Ningĩ rĩrĩa Kĩhoti ahe mũndũ ũtonga na indo o hamwe na ũhoti wa gũcikenera, nĩ agĩrĩirũo kwamũkĩra irĩhi rĩake na akenere wĩra wake mũritũ. Kĩu nĩ kĩheo kuuma kũrĩ Kĩhoti

Tondũ no hinya amenye matukũ ma ũtũũro wake magĩthiĩ, nĩ gũkorũo Kĩhoti atũmaga aikare akenete thĩinĩ wa ngoro yake.