Kohelethu 6

Nĩ harĩ thĩna ũngĩ nyonete mũhuro wa riũa, na nĩ wonekaga kaingĩ harĩ andũ:

Kĩhoti aheaga mũndũ ũtonga na indo na riri, ũũ atĩ ndagaga kĩndũ o gĩothe kĩrĩa eriragĩria; ĩndĩ Kĩhoti ndarekaga mũndũ ũcio acikenere, gũtuĩka atĩ mũgeni niwe ũcirĩaga . Ũndũ ũcio nĩ wa tũhũ na nĩ ihũũra inene mũno

Mũndũ angĩgĩa ciana igana rĩmwe na atũũre mĩaka mĩingĩ na akũre, o na ningĩ age wa kũmũthika-rĩ, nguuga atĩ kĩhuno gĩkĩrĩte mũndũ ũcio

Nĩ gũkorũo mwana ũcio ookire o ũguo tũhũ na agĩthiĩ nduma-inĩ, na rĩĩtwa rĩake rĩkĩhumbwo nĩ nduma

O na gũtuĩka ndoonire riũa kana akĩmenya ũndũ o wothe, nĩ mwega gũkĩra mũndũ ũcio

Hakĩrĩ na ũguni ũrĩkũ wa gũtũũra mĩaka ngiri ĩmwe maita merĩ ĩndĩ mũndũ age gũkorũo na gĩkeno? Githĩ othe matithiaga kũndũ kũmwe?

Wĩra wothe ũrĩa mũndũ arutaga na kĩyo nĩ wa kũiyũria kanua gake; ĩndĩ mĩĩto yake ya kũrĩa gũtirĩ hĩndĩ ĩthiraga

Tondũ rĩrĩ, nĩ ũndũ ũrĩkũ mũndũ ũrĩa mũũgĩ akĩrĩte ũrĩa mũkĩgu naguo, na harĩ na ũguni ũrĩkũ mũndũ mũthĩni kũmenya ũrĩa angĩhiũrania na ũtũũro

Nĩ kaba mũndũ gũkenera kĩrĩa maitho make marona handũ ha kũũrũra agĩthingata merirĩria make. Ũndũ ũcio o naguo no wa tũhũ, o ta gũteng’erania na rũhuho.

Kĩndũ gĩothe kĩrĩa kĩrĩ kuo nĩ kĩrĩkĩtie kũheo rĩĩtwa, na nĩ kũĩkaine ũrĩa mũndũ atariĩ; na ndangĩhota gũkararania na ũrĩa wĩ na hinya kũmũkĩra

O ũrĩa ciugo irĩ nyingĩ, noguo ikoragwo irĩ cia tũhũ; na hihi nĩ ũguni ũrĩkũ irehagĩra mũndũ

Nũũ ũĩ ũndũ ũrĩa mwega makĩria mũndũ agĩrĩirũo gwĩka ũtũũro-inĩ, matukũ-inĩ manini ma ũtũũro wake wa tũhũ, marĩa mathiraga o ta kĩĩruru? Tondũ rĩrĩ, nũũ ũngĩhota kwĩra mũndũ ũrĩa gũgaathiĩ rĩrĩa atagaakorũo ho?