Kũguũrĩrio Kwa Johana 1

Ũyũ nĩguo ũguũrio wa Yahshua Messiya, ũrĩa Yahweh aamũheire, nĩgetha onie ngombo ciake maũndũ marĩa arĩ o mũhaka mekĩke ica ikuhĩ. Na agĩtũma mũraika wake na akĩwonania na njĩra ya imenyithia kũgerera harĩ we kũrĩ Johana ngombo yake,

nake akĩruta ũira wĩgiĩ kiugo kĩrĩa Yahweh aaheanire na wĩgiĩ ũira ũrĩa Yahshua Messiya aaheanire, wĩgiĩ maũndũ mothe marĩa oonire

Kũrathimwo-rĩ, nĩ mũndũ ũrĩa ũthomaga na arĩa maiguaga ciugo cia ũrathi ũyũ o na arĩa marũmagĩrĩra maũndũ marĩa maandĩkĩtwo thĩinĩ waguo, nĩ gũkorũo ihinda rĩrĩa rĩtuĩtwo rĩrĩ hakuhĩ.

Nĩ niĩ Johana, kũrĩ ciũngano iria mũgwanja irĩ gĩcigo-inĩ kĩa Asia:

na kuuma kũrĩ Yahshua Messiya, ũrĩa arĩ we Mũira Ũrĩa Mwĩhokeku, o we irigithathi kuuma kũrĩ arĩa akuũ, na Mwathi wa athamaki a thĩ. Ũcio ũtwendete na watũkũũrire kuuma mehia-inĩ maitũ kũgerera thakame yake mwene

na agĩtũtua athamaki, na athĩnjĩri-Yahweh tũtungatagĩre Kĩhoti wake, o we Ithe⁠—arogĩa na riri o na ũhoti tene na tene. Amein.

Toneei, ũcio nĩ aroka na matu, na gũtirĩ riitho rĩtakamuona, o na arĩa maamũthecire; na mĩhĩrĩga yothe ya andũ thĩinĩ wa thĩ nĩ ĩgakaya ĩrĩ na kĩeha nĩ ũndũ wake. Ũguo nĩguo gũgeekĩka. Amein.

“Nĩ niĩ Aleph na Taw, ũguo nĩguo Yahweh Kĩhoti ekuuga, Kĩambĩrĩria na Kĩrĩkĩrĩro, o we El Shaddai.

Niĩ Johana, mũrũ wa Ithe wanyu, o niĩ nyitanagĩra na inyuĩ harĩ mĩnyamaro na ũthamaki na ũkirĩrĩria ndĩ na ngwatanĩro hamwe na Yahshua, ndaarĩ gĩcigĩrĩra-inĩ kĩrĩa gĩĩtagwo Patimosi nĩ ũndũ wa kwaria ũhoro wĩgiĩ Yahweh na kũruta ũira wĩgiĩ Yahshua Messiya

Ndĩ thĩinĩ wa Roho, nĩ ndekorire thĩinĩ wa mũthenya wa Yahweh, na ngĩigua mũgambo mũnene thutha wakwa ũtariĩ ta wa karumbeta,

ũkiuga: Nĩ niĩ Aleph na Taw, Kĩambĩrĩria na Kĩrĩkĩrĩro, maũndũ marĩa ũkuona, maandĩke ibuku-inĩ na ũtũme kũrĩ ciũngano iria mũgwanja: Kĩrĩa kĩrĩ Efeso, kĩrĩa kĩrĩ Simurina, kĩrĩa kĩrĩ Perigamo, kĩrĩa kĩrĩ Thiatira, kĩrĩa kĩrĩ Sadisi, kĩrĩa kĩrĩ Filadefia, na kĩrĩa kĩrĩ Laodikia.”

Ngĩĩhũgũra nyone ũrĩa waaragia na niĩ, na rĩrĩa ndehũgũrire, ngĩona mĩtĩ mũgwanja ya kũigĩrĩrũo matawa ya thahabu,

na hau gatagatĩ-inĩ ka mĩtĩ ĩyo ya kũigĩrĩrĩrũo matawa haarĩ na mũndũ watariĩ ta mũrũ wa mũndũ, wehumbĩte nguo yakinyĩte nyarĩrĩ-inĩ na akeyoha mũcibi wa thahabu gĩthũri-inĩ

Makĩria ma ũguo, mũtwe wake na njuĩrĩ yake cierũhĩte o ta guoya wa rangi mwerũ, o ta mbarabu, namo maitho make maatariĩ ta rũrĩrĩmbĩ rwa mwaki,

na magũrũ make maatariĩ ta gĩcango kĩrĩa kĩega gĩgĩkenga kĩrĩ mwaki-inĩ, na mũgambo wake watariĩ ta mũrurumo wa maĩ maingĩ

Ningĩ guoko-inĩ gwake kwa ũrĩo aarĩ na njata mũgwanja, na kanua-inĩ gake hagacomoka rũhiũ rwa njora rũraihu na rũũgĩ rũnooretwo mĩena yerĩ, naguo ũthiũ wake watariĩ ta riũa hĩndĩ ĩrĩa rĩarĩte biũ

Rĩrĩa ndamuonire, ngĩgũa thĩ magũrũ-inĩ make ta nguĩte.

na ũrĩa ũtũũraga muoyo, na nĩ ndakuĩte, no rĩrĩ, ngũtũũra muoyo tene na tene, na ndĩ na cabi cia Jehanamu o na cia gĩkuũ

Nĩ ũndũ ũcio-rĩ, andĩka maũndũ marĩa wona, na marĩa marĩ kuo, o na marĩa mageekĩka thutha ũcio

Na ha ũhoro wa hitho ĩrĩa nyamũre ĩgiĩ njata icio mũgwanja wona guoko-inĩ gwakwa kwa ũrĩo na mĩtĩ mũgwanja ya kũigĩrĩrũo matawa ya thahabu: Njata icio mũgwanja irũgamĩrĩire araika a ciũngano icio mũgwanja, nayo mĩtĩ ĩyo mũgwanja ya kũigĩrĩrũo matawa ĩrũgamĩrĩire ciũngano icio mũgwanja.