Kũguũrĩrio Kwa Johana 2

Kũrĩ mũraika wa kĩũngano kĩrĩa kĩrĩ Efeso andĩka atĩrĩ: Maya nĩmo maũndũ marĩa ekuuga ũcio ũnyitĩte njata iria mũgwanja na guoko gwake kwa ũrĩo na ũthiagĩra gatagatĩ-inĩ ka mĩtĩ ĩrĩa mũgwanja ya kũigĩrĩrũo matawa ya thahabu:

‘Nĩ njũũĩ ciĩko ciaku, na wĩra waku o na ũkirĩrĩria waku, na atĩ ndũkiragĩrĩria andũ oru, na atĩ nĩ ũgeragia arĩa moigaga atĩ nĩ atũmwo, no tiguo marĩ, na ũkona nĩ ahenania

Ningĩ nĩ wonanagia ũkirĩrĩria, na wanomĩrĩria nĩ ũndũ wa rĩĩtwa rĩakwa na ndũrĩ worũo nĩ hinya

O na kũrĩ ũguo, ũndũ ũrĩa ngũgũcukĩra nĩ ũyũ, atĩ nĩ ũtigĩte Wendani ũrĩa warĩ naguo kĩambĩrĩria-inĩ.

“‘Nĩ ũndũ ũcio ririkana harĩa uumĩte ũkagũa, na wĩrire na wĩke ciĩko iria wekaga kĩambĩrĩria-inĩ. No ũngĩaga gwĩka ũguo-rĩ, nĩ ngũũka kũrĩ wee, na njeherie mũtĩ waku wa kũigĩrĩrũo matawa handũ haguo, o tiga wĩririre

No rĩrĩ, ũrĩ na ũndũ ũyũ mwega: atĩ nĩ ũthũire ciĩko cia aa-Nikolai, iria o na niĩ thũire

Ũrĩa ũrĩ na gũtũ nĩ aigue ũrĩa Roho ũrera ciũngano: Ũrĩa ũgũtoria nĩ ngaamwĩtĩkĩria arĩe kuumana na mũtĩ wa muoyo, ũrĩa ũrĩ thĩinĩ wa mũgũnda wa Yahweh.’

“Na kũrĩ mũraika wa kĩũngano kĩrĩa kĩrĩ Simurina andĩka atĩrĩ: Maya nĩmo maũndũ marĩa ekuuga, ‘ũrĩa wa Mbere na wa Mũico,’ o ũcio wakuire na agĩcoka muoyo:

‘Nĩ njũũĩ mĩnyamaro na thĩna waku—no ũrĩ gĩtonga—na irumi cia kũruma Yahweh cia arĩa meĩtaga Ayahudi na tiguo marĩ kũna, ĩndĩ makoragwo marĩ thunagogi ya Shaitani

Ndũgetigĩre maũndũ marĩa ũkiriĩ kũnyarirũo namo. Onee, ũrĩa mũũru arĩikaraga agĩikagia amwe anyu njera nĩguo mũgerio biũ, na nĩ mũgũkorũo na mĩnyamaro ihinda rĩa thikũ ikũmi. Ikara ũrĩ mwĩhokeku nginya gũkua, na nĩ ngaakũhe thũmbĩ ya muoyo

Ũrĩa ũrĩ na gũtũ nĩ aigue ũrĩa Roho ũrera ciũngano: Mũndũ ũrĩa ũgũtoria ndarĩ ũndũ mũũru ageekwo nĩ gĩkuũ kĩrĩa gĩa kerĩ.’

“Kũrĩ mũraika wa kĩũngano kĩrĩa kĩrĩ Perigamo andĩka atĩrĩ: Maya nĩmo maũndũ marĩa ekuuga ũcio ũrĩ na rũhiũ rwa njora rũraihu na rũũgĩ rũnooretwo mĩena yerĩ:

‘Nĩ njũũĩ kũrĩa ũtũũraga, ũguo nĩ kuuga, kũrĩa gĩtĩ kĩa ũnene gĩa Shaitani kĩrĩ; ĩndĩ no ũrũmĩtie rĩĩtwa rĩakwa, na ndũigana gũkaana wĩtĩkio waku harĩ niĩ o na matukũ-inĩ ma Antipasi mũira wakwa mwĩhokeku, ũrĩa woragĩirũo kũu mũrĩ, o kũu Shaitani atũũraga.

“‘No rĩrĩ, ndĩ na maũndũ manini ngũgũcukĩra, atĩ ũrĩ na andũ kũu marũmagĩrĩra ũrutani wa Balaamu, o ũcio warutire Balaki kũigĩra ariũ a Isiraeli mũhĩnga, nĩguo marĩe indo irutĩtwo magongona kũrĩ mĩhianano na meingĩrie thĩinĩ wa ũhuri maraya.

O taguo, ningĩ ũrĩ na andũ kũu marũmagĩrĩra ũrutani wa Nikolai

Kwoguo wĩrire. Ũngĩaga kwĩrira, nĩ ngũũka kũrĩ we o narua, na nĩ ngũrũa nao ngĩhũthĩra rũhiũ rũraihu rũrĩa rũrĩ kanua-inĩ gakwa.

“‘Ũrĩa ũrĩ na gũtũ nĩ akĩigue ũrĩa Roho arera ciũngano. Mũndũ ũrĩa ũgũtorania nĩ ngaamũhe maana mamwe marĩa mahithe, na ndĩmũhe kahiga ka rangi mwerũ, na kahiga kau kaandĩkĩtwo rĩĩtwa rĩerũ rĩrĩa gũtarĩ mũndũ ũngĩ ũngĩrĩmenya o tiga ũcio ũgaakamũkĩra.’

“Kũrĩ mũraika wa kĩũngano kĩrĩa kĩrĩ Thiatira andĩka atĩrĩ: Maya nĩmo maũndũ marĩa Mũrũ wa Yahweh ekuuga, ũrĩa ũrĩ maitho matariĩ ta rũrĩrĩmbĩ rwa mwaki na magũrũ mahaana gĩcango kĩrĩa kĩega:

‘Nĩ njũũĩ ciĩko ciaku, na wendani na wĩtĩkio na ũtungata na ũkirĩrĩria waku, na atĩ ciĩko ciaku cia thutha-inĩ nĩ ikĩrĩte iria wekire kĩambĩrĩria-inĩ.

“‘No rĩrĩ, ũndũ ũyũ nĩguo ngũgũcukĩra, atĩ nĩ ũkiragĩrĩria mũndũ-mũka ũcio wĩtagwo Jezebeli, o ũcio wĩĩtaga mũnabii, na arutanaga na akahĩtithia ndungata ciakwa nĩguo ciĩingĩrie thĩinĩ wa ũmaraya na irĩe indo irutĩtwo magongona kũrĩ mĩhianano

Na nĩ ndamũheire ihinda erire, no ndendaga kwĩrira ciĩko ciake cia ũmaraya

Rĩu-rĩ, onee atĩ ndĩ hakuhĩ kũmũikia gĩtanda-inĩ, nao arĩa mekaga ũtharia nake ndĩmaikie thĩna-inĩ mũnene, o tiga meririre ciĩko icio ciake

Na nĩ ngũũraga ciana ciake na mũrimũ wa kũrehe gĩkuũ, nĩguo ciũngano ciothe imenye atĩ nĩ niĩ thuthuragia methugunda ma thĩinĩ biũ o hamwe na ngoro, na inyuĩ nĩ ngaamũrĩha o mũndũ kũringana na ciĩko ciake.

“‘No rĩrĩ, inyuĩ acio angĩ mũrĩ Thiatira, inyuothe arĩa mũtarũmagĩrĩra ũrutani ũcio, o inyuĩ mũtarĩ mwamenya marĩa metagwo “maũndũ marikĩru ma Shaitani,” ngũmwĩra atĩrĩ: Ndirĩ mũrigo ũngĩ o na ũmwe ngũmũigĩrĩra

O na kũrĩ ũguo, thiĩi na mbere kũrũmia kĩrĩa mũrĩ nakĩo nginya njũke

Na mũndũ ũrĩa ũgũtoria na arũmĩrĩre ciĩko ciakwa nginya mũthia, nĩ ngaamũhe wathani igũrũ rĩa ndũrĩrĩ,

nake nĩ agacirĩithagia na rũthanju rwa kĩgera nĩguo acihehenje tũcunjĩ tũcunjĩ o ta indo cia rĩũmba, o ta ũrĩa nyamũkĩrĩte kuuma kũrĩ Awa

Na nĩ ngaamũhe njata ĩrĩa ya rũcinĩ

Ũrĩa ũrĩ na gũtũ nĩ aigue ũrĩa Roho ũrera ciũngano.’