Kũguũrĩrio Kwa Johana 3

“Kũrĩ mũraika wa kĩũngano kĩrĩa kĩrĩ Sadisi andĩka atĩrĩ: Maya nĩmo maũndũ marĩa ũrĩa ũrĩ na maroho marĩa mũgwanja ma Yahweh na njata iria mũgwanja ekuuga: ‘Nĩ njũũĩ ciĩko ciaku, ũkoragwo na rĩĩtwa atĩ ũrĩ muoyo, no ũrĩ mũkuũ

Ikara wĩiguĩte, na wĩkĩre hinya maũndũ marĩa matigarĩte o macio makuhĩrĩirie gũkua, nĩ gũkorũo ndionete ciĩko ciaku ikinyanĩire mbere ya Yahweh

Nĩ ũndũ ũcio, ririkanaga ũndũ ũrĩa waamũkĩrire na ũkĩigua, na ũthiĩ na mbere kũũtũũria na wĩrire. Hatarĩ nganja ũngĩaga kwarahũka, ngoka o ta mũici na ndũkamenya o na hanini ithaa rĩrĩa ngaagũkorerera.

“‘O na kũrĩ ũguo, kũu Sadisi ũrĩ na andũ maigana ũna arĩa matarĩ maathahia nguo ciao, na nĩ megũtwarana na niĩ marĩ na cia rangi mwerũ, nĩ gũkorũo nĩ maagĩrĩire

Nĩ ũndũ ũcio, ũrĩa ũgũtoria nĩ akaahumbwo nguo cia rangi mwerũ, na gũtirĩ hĩndĩ ngaahuura rĩĩtwa rĩake ibuku-inĩ rĩa muoyo, no nĩ ngaamenyithania rĩĩtwa rĩake mbere ya Awa na mbere ya araika ake

Ũrĩa ũrĩ na gũtũ nĩ aigue ũrĩa Roho ũrera ciũngano.’

“Kũrĩ mũraika wa kĩũngano kĩrĩa kĩrĩ Filadefia andĩka atĩrĩ: Maya nĩmo maũndũ marĩa Ũrĩa Mwamũre ekuuga, o we wa ma, ũrĩa ũrĩ na cabi ya Daudi, o ũcio ũhingũraga na gũtigĩe mũndũ wa kũhinga na akahinga gũtarĩ mũndũ ũngĩhingũra:

‘Nĩ njũũĩ ciĩko ciaku—tarora wone, nĩ njigĩte mũrango mũhingũre mbere yaku, ũrĩa gũtarĩ mũndũ ũngĩhota kũũhinga. Na nĩ njũũĩ atĩ ũrĩ na hinya mũnini, na nĩ ũrũmĩtie kiugo gĩakwa na ũkoretwo ũrĩ mwĩhokeku harĩ rĩĩtwa rĩakwa

Atĩrĩrĩ, andũ acio a thunagogi ya Shaitani o acio meĩtaga Ayahudi no tiguo marĩ, ĩndĩ nĩ kũhenania mahenanagia-rĩ, acio nĩ ngaatũma moke mainamĩrĩre magũrũ-inĩ maku na ndũme mamenye atĩ nĩ ngwendete

Tondũ nĩ ũrũmĩtie kiugo kĩgiĩ ũkirĩrĩria wakwa, o na niĩ nĩ ngaakũmenyerera hĩndĩ ya ithaa rĩa kũgerio, rĩrĩa rĩgoka igũrũ rĩa thĩ yothe, nĩ ũndũ wa kũgeria arĩa matũũraga thĩinĩ wa thĩ

Nĩ ngũũka o narua. Ikara ũrũmĩtie kĩrĩa ũrĩ nakĩo, nĩguo mũndũ o na ũrĩkũ ndakanoe thũmbĩ yaku.

“‘Mũndũ ũrĩa ũgũtoria—nĩ ngaamũtua gĩtugĩ thĩinĩ wa hekarũ ya Kĩhoti wakwa, na ndagaacoka kuuma kuo rĩngĩ, na nĩ ngaamwandĩka rĩĩtwa rĩa Kĩhoti wakwa na rĩĩtwa rĩa itũũra rĩa Kĩhoti wakwa, Yahrushalayim Njerũ ĩrĩa ĩraikũrũka yumĩte igũrũ kũrĩ Kĩhoti wakwa, na rĩĩtwa rĩakwa mwene rĩrĩa rĩerũ

Ũrĩa ũrĩ na gũtũ nĩ aigue ũrĩa Roho ũrera ciũngano.’

“Kũrĩ mũraika wa kĩũngano kĩrĩa kĩrĩ Laodikia andĩka atĩrĩ: Maya nĩmo maũndũ marĩa Amein ekuuga, o we Mũira Ũrĩa Mwĩhokeku na Wa Ma, o ũcio Kĩambĩrĩria kĩa ũũmbi wa Yahweh:

‘Nĩ njũũĩ ciĩko ciaku, atĩ wee ndũrĩ mũhehu na ndũrĩ mũhiũ. Na arĩ korũo ũrĩ mũhehu kana ũgĩkorũo ũrĩ mũhiũ

Kwoguo tondũ ũrĩ mũraru no ndũrĩ mũhiũ na ndũrĩ mũhehu, nĩ ngũgũtahĩka uume thĩinĩ wa kanua gakwa

Tondũ uugaga ũũ, “Niĩ ndĩ mũtongu na nĩ ngĩĩte na ũtonga na ndirabatara kĩndũ o na kĩ,” no ndũũĩ atĩ wee ũrĩ na kĩeha na ũrĩ wa kũiguĩrũo tha na mũthĩni na mũtumumu na ũrĩ njaga,

ndĩragũtaara ũgũre harĩ niĩ thahabu ĩrĩa ĩtheretio na mwaki nĩgetha ũtonge, na ũgũre nguo cia rangi mwerũ wĩhumbe nĩguo gĩconoko kĩa njaga yaku gĩtikaguũrio, na ndawa ya maitho ũhake maitho maku nĩguo wone.

“‘Arĩa othe nyendete, nĩ ndĩmarũngaga na ngamaherithia. Nĩ ũndũ ũcio, gĩa na kĩyo na wĩrire

Atĩrĩrĩ, niĩ ndũgamĩte mũrango-inĩ ngĩringaringa. Mũndũ o wothe ũkũigua mũgambo wakwa na ahingũre mũrango, nĩ ngũingĩra thĩinĩ wa nyũmba yake na ndĩanĩre nake irio cia hwaĩ-inĩ nake arĩanĩre na niĩ

Mũndũ ũrĩa ũgũtoria nĩ ngaamwĩtĩkĩria aikare thĩ hamwe na niĩ gĩtĩ-inĩ gĩakwa kĩa ũnene, o ta ũrĩa na niĩ ndatoririe na ngĩikara thĩ hamwe na Awa gĩtĩ-inĩ gĩake kĩa ũnene

Ũrĩa ũrĩ na gũtũ nĩ aigue ũrĩa Roho ũrera ciũngano.’”