Kũguũrĩrio Kwa Johana 10

Ningĩ ngĩona mũraika ũngĩ ũrĩ hinya agĩikũrũka kuuma igũrũ ahumbĩtwo itu na arĩ na mũkũnga-mbura mũtwe-inĩ wake, na ũthiũ wake wahaanaga riũa, namo magũrũ make makahaana itugĩ cia mwaki,

na guoko-inĩ gwake aanyitĩte gakũnjo kanini gakũnjũre. Na agĩkinyithia kũgũrũ gwake kwa ũrĩo iria-inĩ, no kwa ũmotho thĩ nyũmũ,

na akĩanĩrĩra na mũgambo mũnene o ta mũrũthi ũkũrarama. Na rĩrĩa aanĩrĩire, mĩgambo ya marurumĩ marĩa mũgwanja ĩkĩaria.

Rĩrĩa marurumĩ macio mũgwanja maaririe, ndaarĩ hakuhĩ kwandĩka, no ngĩigua mũgambo kuuma igũrũ woiga: “Cinĩrĩra na mũhũri maũndũ marĩa marurumĩ macio mũgwanja moiga, na ndũkamaandĩke!”

Mũraika ũrĩa ndonete arũgamĩte iria-inĩ o na thĩ nyũmũ agĩtambũrũkia guoko gwake kwa ũrĩo na igũrũ,

na akĩĩhĩta na Ũrĩa ũtũũraga tene na tene, o we wombire igũrũ na indo iria irĩ thĩinĩ warĩo na thĩ na indo iria irĩ thĩinĩ wayo na iria na indo iria irĩ thĩinĩ warĩo, akiuga: “Gũtirĩ gweterera rĩngĩ!

No matukũ-inĩ marĩa mũraika wa mũgwanja agaakorũo akuhĩrĩirie kũhuha coro wake, hitho ĩrĩa nyamũre Yahweh aamenyithanirie harĩ ndungata ciake anabii nĩ ĩkaahingio.”

Na ngĩigua mũgambo kuuma igũrũ wanjarĩria o rĩngĩ ũkiuga: “Thiĩ woe gakũnjo kau gakũnjũre karĩa karĩ guoko-inĩ kwa mũraika ũcio ũrũgamĩte iria-inĩ o na thĩ nyũmũ.”

Ngĩthiĩ kũrĩ mũraika ũcio ngĩmwĩra ahe gakũnjo kau kanini. Nake akĩnjĩra: “Koe na ũkarĩe, na nĩ gegũtũma nda yaku ĩrũre, no kanua-inĩ gaku gegũkorũo na cama o ta ũũkĩ.”

Ngĩoya gakũnjo kau kanini kuuma guoko-inĩ kwa mũraika ũcio na ngĩkarĩa, na kanua-inĩ gakwa kaarĩ na cama o ta ũũkĩ, no rĩrĩa ndakarĩire, nda yakwa ĩkĩrũra

Nao makĩnjĩra atĩrĩ: “No mũhaka ũrathe o rĩngĩ ũhoro wĩgiĩ ikundi cia andũ na ndũrĩrĩ na thiomi na athamaki aingĩ.”