Kũguũrĩrio Kwa Johana 11

Na ngĩneo ithanjĩ rĩatariĩ ta rũthanju na akĩnjĩra atĩrĩ: “Ũkĩra ũthime harĩa hamũre ha hekarũ ya Yahweh o na kĩgongona hamwe na arĩa mathathayagĩria kuo

No ũhoro-inĩ wĩgiĩ nja ya harĩa hamũre ha hekarũ, ũmĩtige ũguo na ndũkamĩthime, tondũ nĩ ĩheetwo ndũrĩrĩ, na nĩ ikũrangĩrĩria itũũra rĩrĩa rĩamũre rungu rwa magũrũ ma cio ihinda rĩa mĩeri 42.

Nĩ ngaatũma aira akwa erĩ marathe mehumbĩte nguo cia makũnia ihinda rĩa thikũ 1,260.”

Acio mahaananĩtio na mĩtĩ ĩrĩa ĩĩrĩ ya mĩtamaiyũ na mĩtĩ ĩrĩa ĩĩrĩ ya kũigĩrĩrũo matawa na marũgamĩte mbere ya Kĩhoti wa thĩ.

Mũndũ o wothe angĩenda kũmeka ũũru, mwaki uumaga tũnua-inĩ twao na ũkanina thũ ciao. Mũndũ o wothe angĩgeria kũmeka ũũru, ũguo nĩguo agĩrĩire kũũragwo.

Acio marĩ na wathani wa kũhinga igũrũ nĩguo gũtikoire mbura matukũ-inĩ marĩa mararatha, na marĩ na wathani igũrũ rĩa maĩ, wa kũmatua thakame na kũhũra thĩ na mahũra ma mĩthemba yothe maita maingĩ o ta ũrĩa mangĩenda.

Na marĩkia kũruta ũira, nyamũ ĩrĩa yaambatire ĩkiuma thĩinĩ wa irima rĩrĩa rĩtarĩ gĩturi nĩ ĩkaarũa nao na ĩmatoorie na ĩmorage

Nacio ciimba ciao igaakorũo njĩra-inĩ nene ya itũũra rĩrĩa inene rĩĩtagwo na njĩra ya kĩĩroho Sodomu na Misiri, o kũrĩa Mwathi witũ o nake ooragĩirũo mũtĩ igũrũ.

Nacio ikundi cia andũ na mĩhĩrĩga na thiomi na ndũrĩrĩ nĩ ikeerorera ciimba ciao ihinda rĩa thikũ ithatũ na nuthu, na itigeetĩkĩria ithikwo thĩinĩ wa mbĩrĩra.

Nao andũ arĩa matũũraga thĩinĩ wa thĩ nĩ magaakena nĩ ũndũ wao na makũngũĩre, na matũmanĩre iheo mũndũ na ũrĩa ũngĩ, tondũ aira acio erĩ nĩ maanyariraga arĩa matũũraga thĩinĩ wa thĩ.

Thutha wa thikũ icio ithatũ na nuthu, Roho wa Muoyo kuuma kũrĩ Yahweh ũkĩingĩra thĩinĩ wao, makĩrũgama na magũrũ mao, na arĩa maamonire makĩnyitwo nĩ guoya mũnene

Na makĩigua mũgambo mũnene kuuma igũrũ wamera atĩrĩ: “Ambatai mũũke gũkũ.” Nao makĩambata igũrũ marĩ thĩinĩ wa itũ, na thũ ciao ikĩmona.

Ithaa o rĩu gũkĩgĩa gĩthingithia kĩnene, na gĩcunjĩ gĩa ikũmi gĩa itũũra rĩu gĩkĩgũa; na andũ 7,000 makĩũragwo nĩ gĩthingithia kĩu, nao arĩa maatigarire magĩĩtigĩra na makĩgooca Kĩhoti wa igũrũ.

Haaro ya kerĩ nĩ yahĩtũka. Na rĩrĩ, haaro ya gatatũ nĩ ĩgũũka o narua.

Mũraika wa mũgwanja akĩhuha coro wake. Na gũkĩgĩa na mĩgambo mĩnene igũrũ, ĩroiga ũũ: “Ũthamaki wa thĩ nĩ ũtuĩkĩte Ũthamaki wa Yahweh witũ o na wa Messiya wake, nake egwathana arĩ mũthamaki tene na tene.”

Nao athuri arĩa 24 maikarĩire itĩ ciao cia ũnene mbere ya Yahweh makĩĩgũithia magĩturumithia mothiũ mao thĩ na magĩthathaiya Yahweh,

makiugaga atĩrĩ: “Tũragũcokeria ngatho, wee Yahweh El Shaddai, o wee ũkoragwo ho na nowe warĩ ho, tondũ nĩ woete hinya waku mũnene na ũkambĩrĩria gũthamaka.

No ndũrĩrĩ ikĩng’ũrĩka, namo mang’ũrĩ maku magĩũka, o narĩo ihinda rĩrĩa rĩatuĩtwo rĩgĩkinya rĩa gũtuĩra arĩa akuũ na rĩa kũhe ndungata ciaku anabii ngerenwa o na arĩa aamũre na arĩa metigĩrĩte rĩĩtwa rĩaku, arĩa anini na arĩa anene, na rĩa kwananga arĩa manangaga thĩ.”

Naho harĩa hamũre ha hekarũ ya Yahweh kũu igũrũ hakĩhingũka, narĩo ithandũkũ rĩa kĩrĩkanĩro gĩake rĩkĩoneka thĩinĩ wa harĩa hamũre ha hekarũ yake. Na gũkĩgĩa mĩhenũko ya rũheni na mĩgambo na marurumĩ na gĩthingithia na mbura nene ya mbembe.