Kũguũrĩrio Kwa Johana 12

Gũgĩcoka gũkĩoneka kĩmenyithia kĩnene igũrũ: Mũndũ-wa-nja wahumbĩtwo riũa, na mweri warĩ rungu rwa makinya make, na igũrũ rĩa mũtwe wake aarĩ na thũmbĩ ya njata 12,

na aarĩ na ihu. Na nĩ aarĩraga nĩ ũndũ wa ruo na agacaya tondũ aarĩ hakuhĩ kũgĩa mwana.

Na gũkĩoneka kĩmenyithia kĩngĩ igũrũ. Atĩrĩrĩ, ndamathia nene yarĩ na rangi mũtune na ciongo mũgwanja na hĩa ikũmi, na igũrũ rĩa ciongo ciayo yarĩ na thũmbĩ mũgwanja ng’emie;

na mũting’oe wayo wakururagia gĩcunjĩ gĩa ithatũ kĩa njata cia igũrũ, na ĩgĩciharũrũkia thĩ. Nayo ndamathia ĩyo ĩgĩikara ĩrũgamĩte mbere ya mũndũ-wa-nja ũcio warĩ hakuhĩ kũgĩa mwana, nĩguo agĩa mwana, ĩtambuure mwana ũcio wake.

Nake akĩgĩa mwana wa kahĩĩ, ũrĩa ũkaarĩithagia ndũrĩrĩ ciothe na rũthanju rwa kĩgera. Na mwana ũcio wake akĩhurio agĩtwarũo harĩ Yahweh na gĩtĩ-inĩ gĩake kĩa ũnene

Nake mũndũ-wa-nja ũcio akĩũra agĩthiĩ werũ-inĩ, kũrĩa ahaarĩirio handũ nĩ Yahweh na no kuo angĩkaaherũo irio thikũ 1,260.

Na gũkiumĩra mbaara igũrũ: Mikaeli na araika ake makĩrũa na ndamathia ĩyo, nayo ndamathia ĩyo na araika ayo makĩrũa

no matiatooririe, o na matiacokire kuonerũo handũ kũu igũrũ.

Nĩ ũndũ ũcio ndamathia ĩyo nene ĩkĩharũrũkio, nĩyo nyoka ĩrĩa ya tene, o we wĩtagwo Mũcukani na Shaitani, ũrĩa ũhĩtithagia thĩ yothe; akĩharũrũkio thĩ, o na araika ake makĩharũrũkio hamwe nake

Ngĩigua mũgambo mũnene igũrũ woiga:

Na makĩmũhoota tondũ wa thakame ya Gatũrũme na tondũ wa kiugo kĩa ũira wao, na matiendire mĩoyo yao o na mang’etheire gĩkuũ

Nĩ ũndũ ũcio-rĩ, kenai igũrũ rĩrĩ o na inyuĩ mũikaraga kuo! Kaĩ thĩ o na iria irĩ na haaro-ĩ, tondũ ũrĩa mũũru nĩ aharũrũkĩte kũrĩ inyuĩ arĩ na marakara manene, akĩmenyaga atĩ arĩ na ihinda inini.”

Hĩndĩ ĩrĩa ndamathia ĩyo yoonire atĩ nĩ yaharũrũkio thĩ, ĩkĩnyarira mũndũ-wa-nja ũcio waciarĩte mwana wa kahĩĩ

No mũndũ-wa-nja ũcio akĩheo mathagu merĩ ma ndiũũ nene nĩguo ombũke athiĩ handũ hake werũ-inĩ, o ho angĩkaaherũo irio kwa ihinda na mahinda na nuthu ihinda haraya na nyoka ĩyo.

Nayo nyoka ĩyo ĩgĩtahĩka maĩ matariĩ o ta rũũĩ kuuma kanua-inĩ kayo thutha wa mũndũ-wa-nja ũcio, nĩguo athererio nĩ rũũĩ rũu

No thĩ ĩgĩteithia mũndũ-wa-nja ũcio, nayo ĩgĩathamia kanua kayo ĩkĩmeria rũũĩ rũrĩa rwatahĩkĩtwo nĩ ndamathia ĩyo kuuma kanua-inĩ kayo

Nĩ ũndũ ũcio ndamathia ĩyo ĩkĩrakarĩra mũno mũndũ-wa-nja ũcio na ĩgĩthiĩ kũrutĩra rũciaro rwake mbaara, arĩa maatigarĩte a mbeũ yake, arĩa marũmagĩrĩra Maathani ma Yahweh na ũira wa Yahshua.