Kũguũrĩrio Kwa Johana 13

Naniĩ ngĩrũgama mũthanga-inĩ wa iria. Na ngĩona nyamũ ĩkĩambata kuuma iria-inĩ, na yarĩ na hĩa ikũmi na ciongo mũgwanja, na hĩa-inĩ ciayo yarĩ na thũmbĩ ikũmi, no ciongo-inĩ ciayo yarĩ na marĩĩtwa ma kũruma Yahweh.

Na rĩrĩ, nyamũ ĩyo ndonire yahaanaga ngarĩ, no mathu mayo maatariĩ ta ma nduba, nako kanua kayo gaatariĩ ta kanua ka mũrũthi. Nayo ndamathia ĩyo ĩkĩhe nyamũ ĩyo hinya wayo na gĩtĩ kĩayo kĩa ũnene na wathani mũnene.

Ngĩona atĩ kĩongo kĩmwe kĩayo kĩonekaga ta kĩarĩ kĩgurarie na kĩronda gĩa gĩkuũ, no kĩronda kĩu gĩa gĩkuũ nĩ kĩahonete, na thĩ yothe ĩkĩrũmĩrĩra nyamũ ĩyo ĩkenetio nĩyo

Nao magĩthathaiya ndamathia ĩyo tondũ nĩ yaheete nyamũ ĩyo wathani, na magĩthathaiya nyamũ ĩyo makiugaga ũũ: “Nũ ũtariĩ ta nyamũ ĩno, na nũ ũngĩhota kũrũa nayo?”

Nayo ĩkĩheo kanua kaaragia maũndũ manene o na ma kũruma Yahweh, na ĩkĩheo wathani wa gwĩka maũndũ ihinda rĩa mĩeri 42.

Nayo ĩgĩtumũra kanua kayo na irumi kwerekera Yahweh nĩguo ĩrume rĩĩtwa rĩake na gĩikaro gĩake, na arĩa maikaraga igũrũ.

Ĩgĩĩtĩkĩrio kũrũa mbaara na arĩa aamũre na kũmatooria, na ĩkĩheo wathani igũrũ rĩa mĩhĩrĩga yothe na ikundi cia andũ na thiomi na ndũrĩrĩ

Nao arĩa othe matũũraga thĩinĩ wa thĩ nĩ makaamĩthathaiya. Na kuuma o kĩambĩrĩria gĩa thĩ, gũtirĩ o na ũmwe wao ũrĩ wandĩkwo rĩĩtwa rĩake thĩinĩ wa ibuku rĩa muoyo rĩa Gatũrũme o ũcio wathĩnjirũo.

Mũndũ o wothe ũrĩ na gũtũ nĩ aigue.

Mũndũ o wothe ũtahanaga, nĩ agaatahwo. Mũndũ o wothe ũraganaga na rũhiũ rwa njora, no mũhaka akooragwo na rũhiũ rwa njora. Hau nĩho arĩa aamũre mabataraga ũkirĩrĩria na wĩtĩkio.

Ngĩcoka ngĩona nyamũ ĩngĩ ĩkĩambata yumĩte thĩinĩ wa thĩ, na yarĩ na hĩa igĩrĩ ta gatũrũme, no ĩkĩambĩrĩria kwaria ta ndamathia

Nayo ĩhũthagĩra wathani wothe wa nyamũ ĩrĩa ya mbere o ĩkĩonagwo nĩyo. Ningĩ nĩ ĩtũmaga thĩ o hamwe na aikari ayo mathathaiye nyamũ ya mbere, ĩrĩa kĩronda kĩayo gĩa gĩkuũ kĩahonire.

Na nĩ yonanagia imenyithia nene, nginya gũtũma mwaki ũikũrũke thĩ kuuma igũrũ andũ makĩonaga.

Ĩhĩtithagia arĩa maikaraga thĩinĩ wa thĩ kũgerera imenyithia iria yetĩkĩririo kuonania nyamũ ĩyo ĩkĩonaga, o ĩkĩĩraga arĩa maikaraga thĩinĩ wa thĩ mathondeke mũhianano wa nyamũ ĩrĩa yarĩ na kĩronda kĩa rũhiũ rwa njora no ĩkĩhona

Ningĩ ĩgĩĩtĩkĩrio kũhe mũhianano ũcio wa nyamũ mĩhũmũ, nĩguo mũhianano ũcio wa nyamũ warie na ũtũme arĩa othe maregaga gũthathaiya mũhianano ũcio wa nyamũ moragwo.

Na ĩgathanaga atĩ andũ othe —anini na anene, arĩa atongu na arĩa athĩni, arĩa marĩ wĩyathi o na ngombo⁠—atĩ mekĩrwo ruoro guoko-inĩ kwao kwa ũrĩo kana thiithi-inĩ,

na atĩ gũtirĩ mũndũ ũngĩgũra kana endie o tiga mũndũ ũrĩ na ruoro rũu, rĩĩtwa rĩa nyamũ ĩyo kana namba ya rĩĩtwa rĩayo.

Haha nĩho habataraga ũũgĩ: Mũndũ ũrĩa ũrĩ na ũtaũku nĩ atare namba ya nyamũ ĩyo, tondũ nĩ namba ya mũndũ, na namba yayo nĩ 666.