Kũguũrĩrio Kwa Johana 14
Na rĩrĩ, ngĩcoka ngĩona Gatũrũme arũgamĩte Kĩrĩma-inĩ gĩa Zayuni, arĩ hamwe na andũ 144,000 arĩa mandĩkĩtwo rĩĩtwa rĩake na rĩĩtwa rĩa Ithe mathiithi-inĩ mao.
Ngĩigua mũgambo ũkiuma igũrũ ũtariĩ ta mũgambo wa maĩ maingĩ na ta mũgambo wa marurumĩ manene; na mũgambo ũcio ndaiguire watariĩ ta wa aini maraina makĩhũraga inanda ciao cia mũgeto.
Na mainaga rwĩmbo rũtariĩ ta rwĩmbo rwerũ marĩ mbere ya gĩtĩ kĩrĩa kĩa ũnene na mbere ya ciũmbe iria inya irĩ muoyo na athuri, na gũtirĩ mũndũ ũngĩahotire kwĩruta rwĩmbo rũu o tiga acio 144,000, arĩa magũrĩtwo kuuma thĩ
Acio nĩ arĩa matethahirie na andũ-a-nja; nao nĩ thingi. Acio nĩ arĩa marũmagĩrĩra Gatũrũme o kũrĩa guothe athiaga. Maagũrirũo kuuma harĩ andũ matuĩke maciaro ma mbere harĩ Yahweh na harĩ Gatũrũme,
na gũtirĩ maheni moonekire tũnua-inĩ twao; matirĩ kameni.
Na ngĩona mũraika ũngĩ akĩũmbũkĩra igũrũ gatagatĩ arĩ na ũhoro mwega wa tene na tene nĩguo ahunjĩrie andũ arĩa maikaraga thĩinĩ wa thĩ, ndũrĩrĩ ciothe na mĩhĩrĩga na thiomi na ikundi cia andũ
Na ooigaga na mũgambo mũnene atĩrĩ: “Mwĩtigĩrei Yahweh na mũmũgooce, tondũ ithaa rĩake rĩa ituĩro nĩ ikinyu, nĩ ũndũ ũcio thathaiyai Ũrĩa wombire igũrũ na thĩ na iria o na matherũkĩro ma maĩ.”
Na mũraika ũngĩ wa kerĩ, akĩrũmĩrĩra akiuga: “Nĩ igũu! Nĩ igũu! Itũũra rĩu inene nĩ igũu, mũndũ mũka ũcio ũratũmaga ndũrĩrĩ ciothe inyue irĩĩo nĩ ndibei ya mang'ũrĩ ma ũmaraya wake!”
Na mũraika ũngĩ, wa gatatũ, akĩmarũmĩrĩra akiuga na mũgambo mũnene atĩrĩ: “Mũndũ o wothe angĩthathaiya nyamũ ĩyo na mũhianano wayo na ekĩrũo ruoro thiithi-inĩ wake kana guoko-inĩ gwake,
o nake nĩ akaanyua ndibei ya mang'ũrĩ ma Yahweh ĩrĩa ĩgaaitĩrĩrũo gĩkombe-inĩ kĩa mang’ũrĩ Make ĩtatukanĩtio na kĩndũ, na nĩ akaaherithio na mwaki na ũbiriti arĩ mbere ya araika arĩa aamũre na mbere ya Gatũrũme
Nayo ndogo ya iherithia rĩao ĩtũũraga yambataga tene na tene, na mũthenya na ũtukũ matikoragwo na ũhurũko, acio mathathayagia nyamũ ĩyo na mũhianano wayo na mũndũ o wothe wĩkĩragwo ruoro rwa rĩĩtwa rĩayo.
Hau nĩho arĩa aamũre mabataraga ũkirĩrĩria, o acio mamenyagĩrĩra Maathani ma Yahweh na makarũmia wĩtĩkio harĩ Yahshua.”
Na ngĩigua mũgambo woima igũrũ ũkiuga, “Andĩka atĩrĩ: Kũrathimwo nĩ arĩa akuũ, o acio makuaga marĩ na ũiguano na Mwathi kuuma rĩu gũthiĩ na mbere. Ũguo nĩguo Roho ũkuuga, nĩ mahurũke mawĩra mao maritũ, tondũ maũndũ marĩa meekire mathiaga hamwe nao.”
Na rĩrĩ, ngĩcoka ngĩona itu rĩa rangi mwerũ, na haarĩ mũndũ watariĩ ta mũrũ wa mũndũ warĩikarĩire, arĩ na thũmbĩ ya thahabu kĩongo-inĩ gĩake na rũhiũ rũũgĩ rwa kũgetha guoko-inĩ gwake.
Mũraika ũngĩ akiuma harĩa hamũre ha hekarũ, akĩĩra ũcio waikarĩire itu rĩu na mũgambo mũnene atĩrĩ: “Ikia rũhiũ rwaku ũgethe, tondũ ithaa rĩa kũgetha nĩ ikinyu, nĩ gũkorũo magetha ma thĩ nĩ makũrũ biũ.”
Nake ũcio waikarĩire itu agĩikia rũhiũ rwake thĩinĩ wa thĩ, nayo thĩ ĩkĩgethwo.
Na mũraika o ũngĩ akiuma hau hamũre ha hekarũ kũu igũrũ, na o nake aarĩ na rũhiũ rũũgĩ rwa kũgetha.
Ningĩ mũraika ũngĩ akiuma kĩgongona-inĩ, na aarĩ na wathani igũrũ rĩa mwaki. Na akĩanĩrĩra ũcio warĩ na rũhiũ rũũgĩ rwa kũgetha na mũgambo mũnene akĩmwĩra: “Ikia rũhiũ rwaku rwa kũgetha na ũcokanĩrĩrie imanjĩka cia mũthabibũ wa thĩ, tondũ thabibũ ciaguo nĩ njĩru.”
Nake mũraika ũcio agĩikia rũhiũ rwake thĩinĩ wa thĩ na agĩcokanĩrĩria mũthabibũ wa thĩ, akĩũikia kĩhihĩro-inĩ kĩrĩa kĩnene kĩa ndibei kĩa mang'ũrĩ ma Yahweh
Kĩhihĩro kĩu kĩa ndibei gĩkĩrangarangwo nja ya itũũra, na thakame ĩkĩambata kuuma kĩhihĩro-inĩ kĩu kĩa ndibei ĩgĩkinya mĩkwa-inĩ ya kanua ka mbarathi, na ĩgĩtherema itĩna rĩa furongi 1,600.