Kũguũrĩrio Kwa Johana 15

Na ngĩona kĩmenyithia kĩngĩ igũrũ, kĩnene na kĩa magegania, araika mũgwanja marĩ na mahũra mũgwanja. Acio nĩo a mũico, tondũ mang'ũrĩ ma Yahweh magaakinyio mũthia kũgerera harĩ o.

Na ngĩona kĩndũ kĩhaana iria rĩa gĩcicio rĩtukanĩtio na mwaki, na arĩa maatoretie nyamũ ĩrĩa na mũhianano wayo na namba ya rĩĩtwa rĩayo maarũgamĩte hakuhĩ na iria rĩu rĩa gĩcicio manyitĩte inanda cia mũgeto cia Yahweh

Maainaga rwĩmbo rwa Musa ndungata ya Yahweh, na rwĩmbo rwa Gatũrũme, makoiga ũũ:

Nũ kũna ũtegũgwĩtigĩra, wee Yahweh, na agooce rĩĩtwa rĩaku tondũ wee nowe wiki mwĩhokeku? Nĩ gũkorũo ndũrĩrĩ ciothe nĩ igooka na ithathaiye irĩ mbere yaku, tondũ matuĩro maku ma ũthingu nĩ maguũrĩtio.”

Thutha wa maũndũ macio ngĩona harĩa hamũre ha hema ya ũira kũu igũrũ hahingũrũo,

nao araika acio mũgwanja maarĩ na mahũra macio mũgwanja makiuma harĩa hamũre mehumbĩte nguo theru na irahenia cia gatani, na makeyoha mĩcibi ya thahabu ithũri-inĩ ciao

Na kĩũmbe kĩmwe harĩ iria inya irĩ muoyo gĩkĩnengera araika acio mũgwanja mbakũri mũgwanja cia thahabu iria ciaiyũrĩte mang'ũrĩ ma Yahweh, ũrĩa ũtũũraga tene na tene

Naho hau hamũre hakĩiyũra ndogo nĩ ũndũ wa riri wa Yahweh na nĩ ũndũ wa hinya wake, na gũtirĩ mũndũ wahotire gũtonya hau hamũre o nginya rĩrĩa mahũra macio mũgwanja ma araika acio mũgwanja maathirire.