Kũguũrĩrio Kwa Johana 16
Na ngĩigua mũgambo mũnene woima hekarũ-inĩ ũkĩĩra araika acio mũgwanja atĩrĩ: “Thiĩi mũgaite mbakũri iria mũgwanja cia mang'ũrĩ ma Yahweh igũrũ rĩa thĩ.”
Wa mbere agĩthiĩ na akĩonoreria mbakũri yake igũrũ rĩa thĩ. Nao andũ arĩa maarĩ na ruoro rwa nyamũ ĩrĩa, o hamwe na arĩa maathathayagia mũhianano wayo makĩgĩa na ironda ciarĩ na ruo mũno na itaahonaga.
Wa kerĩ akĩonoreria mbakũri yake thĩinĩ wa iria. Narĩo rĩgĩtuĩka thakame ĩhaana ta ya mũndũ mũkuũ, na ciũmbe ciothe iria ciarĩ muoyo igĩkua, iria ciarĩ iria-inĩ.
Wa gatatũ akĩonoreria mbakũri yake thĩinĩ wa njũĩ na matherũkĩro ma maĩ. Nacio igĩtuĩka thakame
Ngĩigua mũraika ũrĩa wa maĩ oiga atĩrĩ: “Wee, o wee ũrĩ kuo na nowe warĩ kuo, Wee mwĩhokeku, ũrĩ mũthingu, nĩ gũkorũo nĩ ũtuanĩire matuĩro macio,
tondũ nĩ maaitire thakame ya arĩa aamũre na ya anabii, na nĩ ũmaheete thakame nĩguo mamĩnyue; ituĩro rĩu nĩ rĩmaagĩrĩire.”
Na ngĩigua kĩgongona kĩoiga atĩrĩ: “Ĩni, Yahweh, wee El Shaddai, matuĩro maku nĩ ma ma na nĩ ma ũthingu.”
Wa kana akĩonoreria mbakũri yake igũrũ rĩa riũa, narĩo riũa rĩgĩĩtĩkĩrio gũcina andũ na mwaki
Nao andũ magĩcinwo nĩ ũrugarĩ ũcio mũnene, no makĩruma rĩĩtwa rĩa Yahweh, o ũcio ũrĩ na wathani igũrũ rĩa mahũra macio, na matieririre na matiamũgoocire.
Wa gatano akĩonoreria mbakũri yake igũrũ rĩa gĩtĩ kĩa ũnene kĩa nyamũ ĩrĩa. Naguo ũthamaki wayo ũkĩgĩa nduma, nao makĩambĩrĩria kwĩrũma nĩmĩ tondũ wa ruo rwao,
no makĩruma Kĩhoti wa igũrũ tondũ wa ruo rwao na ironda ciao, na matieririre ciĩko ciao.
Wa gatandatũ akĩonoreria mbakũri yake igũrũ rĩa rũũĩ rũrĩa rũnene rwa Farati, na maĩ ma rũũĩ rũu makĩhũa nĩguo njĩra ĩhaarĩrio nĩ ũndũ wa athamaki a mwena wa irathĩro.
Ningĩ ngĩona maroho matatũ me thahu matongoretio nĩ roho itariĩ ta ciũra ikiuma kanua-inĩ ka ndamathia na kanua-inĩ ka nyamũ ĩrĩa o na kanua-inĩ ka mũnabii ũrĩa wa maheni
Macio nĩ maroho matongoretio nĩ ndaimono na nĩ monanagia imenyithia, na mathiaga kũrĩ athamaki a thĩ yothe nĩguo mamacokanĩrĩrie nĩ ũndũ wa mbaara ya mũthenya ũrĩa mũnene wa Yahweh El Shaddai.
Rĩu-rĩ, Oneei ngũũka ta mũici. Kũrathimwo nĩ mũndũ ũrĩa ũikaraga eiguĩte na akamenyagĩrĩra nguo ciake, nĩguo ndagathiĩ njaga nao andũ mone njaga yake.”
Na makĩmacokanĩrĩria hamwe handũ harĩa hetagwo na Kĩhibirania Hari-Magedoni.
Wa mũgwanja akĩonoreria mbakũri yake rĩera-inĩ. Hĩndĩ ĩyo mũgambo mũnene ũkiuma hekarũ-inĩ na kuuma gĩtĩ-inĩ kĩa ũnene, ũkiuga: “Ũhoro ũcio nĩ warĩka!
Na gũkĩgĩa mĩhenũko ya rũheni na mĩgambo na marurumĩ, na gũkĩgĩa gĩthingithia kĩnene gũtarĩ kwagĩa ta kĩo kuuma rĩrĩa andũ maagĩire kuo thĩinĩ wa thĩ, gĩthingithia kĩu kĩarĩ kĩnene na kĩarĩ na hinya mũno.
Itũũra rĩrĩa inene rĩgĩatũkana icunjĩ ithatũ, namo matũũra ma ndũrĩrĩ makĩgũa; na Babuloni Ũrĩa Mũnene akĩririkanwo mbere ya Yahweh, nĩguo aheo gĩkombe kĩa ndibei ya marakara ma mang’ũrĩ make
Ningĩ icigĩrĩra ciothe ikĩũra, nacio irĩma ikĩagwo
Gũgĩcoka gũkĩgĩa mbembe nene mũno cia mbura, o ĩmwe yacio yarĩ na ũritũ wa taranda ĩmwe, ikĩgũĩra andũ kuuma igũrũ, nao andũ acio makĩruma Yahweh tondũ wa ihũra rĩu rĩa mbura ya mbembe, tondũ ihũra rĩu rĩarĩ inene mũno.