Kũguũrĩrio Kwa Johana 19
Thutha ũcio ngĩigua kĩndũ gĩatariĩ ta mũgambo mũnene wa kĩrĩndĩ kĩnene kũu igũrũ. Makiuga: “HalleluYah! Ũhonokio na riri na hinya nĩ cia Yahweh Kĩhoti witũ,
nĩ gũkorũo matuĩro make nĩ ma ma na nĩ ma ũthingu. Tondũ nĩ ahingĩtie ituĩro harĩ mũmaraya ũrĩa mũnene ũthũkĩtie thĩ na ũmaraya wake, na nĩ arĩhĩirie thakame ya ndungata ciake ĩrĩa ĩrĩ moko-inĩ ma mũmaraya ũcio.”
O hĩndĩ ĩyo riita rĩa kerĩ makiuga: “HalleluYah! Na ndogo ya mũmaraya ũcio ĩtũũraga yambataga tene na tene.”
Na athuri arĩa 24 na ciũmbe iria inya irĩ muoyo makĩĩgũithia thĩ na magĩthathaiya Yahweh o we ũikaragĩra gĩtĩ kĩa ũnene makiuga: “Amein! HalleluYah!
Ningĩ mũgambo ũkiuma gĩtĩ-inĩ kĩu kĩa ũnene ũkiuga: “Kumiai Kĩhoti witũ, inyuĩ ndungata ciake ciothe, o inyuĩ mũmwĩtigĩrĩte, arĩa anini o na arĩa anene.”
Na ngĩigua kĩndũ gĩatariĩ ta mũgambo wa kĩrĩndĩ kĩnene na ta mũgambo wa maĩ maingĩ na ta mũgambo wa marurumĩ manene. Makiuga: “HalleluYah!, nĩ gũkorũo Yahweh Kĩhoti witũ, o we El Shaddai, nĩ ambĩrĩirie gwathana arĩ mũthamaki!
Nĩ tũkenei na tũcanjamũke mũno na tũmũgooce, tondũ ũhiki wa Gatũrũme nĩ mũkinyu nake mũtumia wake nĩ ehaarĩirie.
Mũtumia ũcio nĩ etĩkĩrĩtio kwĩhumba nguo njororo, theru,na njerũ —nĩ gũkorũo nguo ĩyo njega ĩrũgamĩrĩire ciĩko cia ũthingu cia arĩa aamũre.”
Na akĩnjĩra atĩrĩ, “Andĩka ũũ: Kũrathimwo nĩ arĩa manyitĩtwo ũgeni iruga-inĩ rĩa hwaĩ-inĩ rĩa ũhiki wa Gatũrũme.” Ningĩ, akĩnjĩra: “Icio nĩcio ciugo cia ma cia Yahweh.”
Ndaigua ũguo ngĩĩgũithia thĩ magũrũ-inĩ make nĩguo ndĩmũthathaiye. No we akĩnjĩra: “Wĩmenyerere! Ndũgeke ũguo! Niĩ ndĩ ndungata o tawe o hamwe na ariũ a thoguo arĩa mahetwo wĩra wa kũruta ũira wĩgiĩ Yahshua. Thathaiya Yahweh! Nĩ ũndũ kũruta ũira wĩgiĩ Yahshua nĩguo Roho wa ũnabii.”
Ngĩona igũrũ rĩhingũkĩte, na rĩrĩ, haarĩ mbarathi ya rangi mwerũ. Nake ũrĩa wamĩikarĩire etagwo Mwĩhokeku na wa Ma, na atuanagĩra na akarũa mbaara na ũthingu
Maitho make maatariĩ ta rũrĩrĩmbĩ rwa mwaki, na mũtwe-inĩ wake aarĩ na thũmbĩ nyingĩ. Aarĩ na rĩĩtwa rĩandĩkĩtwo gũtarĩ mũndũ o na ũrĩkũ ũrĩũĩ tiga we mwene,
ehumbĩte nguo ya igũrũ ĩrĩ na tũmeni twa thakame, na etagwo Kiugo kĩa Yahweh.
Ningĩ, mbũtũ cia igũrũ ciamũrũmĩrĩire cikarĩire mbarathi cia rangi mwerũ, na ciehumbĩte nguo cia rangi mwerũ, theru cia gatani njega
Na kanua-inĩ gake hagacomoka rũhiũ rwa njora na rũũgĩ, rwa kũhũra ndũrĩrĩ, na nĩ agaacirĩithia na rũthanju rwa kĩgera. Makĩria ma ũguo-rĩ, nĩ akaaranga kĩhihĩro kĩa ndibei kĩa marakara ma mang’ũrĩ ma Yahweh El Shaddai
Nguo-inĩ yake ya igũrũ, kĩero-inĩ gĩake, arĩ na rĩĩtwa rĩandĩke, Mũthamaki wa athamaki na Mwathi wa athani.
Ningĩ ngĩona mũraika arũgamĩte riũa-inĩ, na akĩanĩrĩra na mũgambo mũnene akĩĩra nyoni ciothe iria ciũmbũkagĩra igũrũ gatagatĩ ũũ: “Ũkai haha, ũnganai hamwe iruga-inĩ rĩrĩa inene rĩa hwaĩ-inĩ rĩa Yahweh,
nĩgetha mũrĩe nyama cia athamaki na nyama cia atongoria a mbũtũ na nyama cia andũ marĩ hinya na nyama cia mbarathi na nyama cia arĩa macihaicĩte, na nyama cia andũ othe, cia arĩa marĩ na wĩyathi na cia ngombo na cia arĩa anini o hamwe na arĩa anene.”
Na ngĩona nyamũ ĩrĩa na athamaki a thĩ na mbũtũ ciao monganĩte hamwe nĩguo marũe na ũrĩa ũikarĩire mbarathi ĩyo na marũe na mbũtũ yake
Nayo nyamũ ĩyo ĩkĩnyitwo o hamwe na mũnabii wa maheni ũrĩa woonanagia imenyithia mbere yayo cia kũhĩtithia arĩa maamũkĩrĩte ruoro rwa nyamũ ĩyo na arĩa mathathayagia mũhianano wayo. Nake mũnabii ũcio arĩ o muoyo, hamwe na nyamũ ĩyo, magĩikio thĩinĩ wa iria rĩa mwaki wa ũbiriti
No acio angĩ makĩũragwo na rũhiũ rwa njora rũrĩa rwacomokete kanua-inĩ ka ũrĩa waikarĩire mbarathi ĩyo. Nacio nyoni ciothe ikĩhũnio nĩ nyama ciao.