Kũguũrĩrio Kwa Johana 20

Na ngĩona mũraika agĩikũrũka kuuma igũrũ arĩ na cabi ya irima rĩrĩa rĩtarĩ gĩturi na guoko-inĩ gwake anyitĩte mũnyororo mũnene

Akĩnyita ndamathia ĩrĩa, na noyo nyoka ĩrĩa ya tene, o we wĩtagwo Mũcukani na Shaitani, akĩmuoha ihinda rĩa mĩaka 1,000.

Akĩmũikia irima rĩrĩa rĩtarĩ gĩturi, akĩrĩhinga na akĩrĩĩkĩra mũhũri, nĩguo ndagacoke kũhĩtithia ndũrĩrĩ rĩngĩ o nginya mĩaka ĩyo 1,000 ĩthire. Thutha ũcio no mũhaka ohorũo o kahinda kanini.

Ningĩ ngĩona itĩ cia ũnene, na arĩa maacikarĩire makĩheo wathani wa gũtuanĩra cira. Ngĩona mĩoyo ya arĩa manoragwo nĩ ũndũ wa ũira ũrĩa maarutire wĩgiĩ Yahshua na nĩ ũndũ wa kwaria ũhoro wa Yahweh, na arĩa mataathathaĩtie nyamũ ĩyo kana mũhianano wayo na mataamũkĩrĩte ruoro rwayo mathiithi-inĩ na guoko-inĩ kwao. Magĩcoka muoyo na magĩathana marĩ athamaki hamwe na Messiya ihinda rĩa mĩaka 1,000.

Andũ acio angĩ akuũ matiacokire muoyo o nginya rĩrĩa mĩaka ĩyo 1,000 yathirire. Ũcio nĩguo ũriũkio ũrĩa wa mbere.

Kũrathimwo na kwamũrwo nĩ mũndũ o wothe ũkaanyitanĩra harĩ ũriũkio ũcio wa mbere; acio gĩkuũ kĩrĩa gĩa kerĩ gĩtirĩ na wathani igũrũ rĩao, no magaatuĩka athĩnjĩri-Yahweh a gũtungatĩra Yahweh na Messiya, na magaathana marĩ athamaki hamwe nake ihinda rĩa mĩaka ĩyo 1,000.

Na rĩrĩ, mĩaka ĩyo 1,000 yathira, Shaitani nĩ akoohorũo kuuma kĩoho-inĩ gĩake,

nake nĩ agaathiĩ kũhĩtithia ndũrĩrĩ icio irĩ kona-inĩ iria inya cia thĩ, Gogu na Magogu, nĩguo acicokanĩrĩrie hamwe nĩ ũndũ wa mbaara. Mũigana wao ũtariĩ ta mũthanga wa iria

Nao magĩthiĩ kũndũ guothe thĩinĩ wa thĩ na magĩthiũrũrũkĩria kambĩ ya arĩa aamũre o na itũũra rĩrĩa rĩendetwo. No mwaki ũkiuma igũrũ kwĩ Yahweh ũkĩmanina

Nake ũrĩa mũũru ũcio wamahĩtithagia agĩikio thĩinĩ wa iria rĩa mwaki na ũbiriti, kũrĩa nyamũ ĩrĩa hamwe na mũnabii ũrĩa wa maheni maarĩ; na makaaherithio mũthenya na ũtukũ tene na tene.

Na ngĩona gĩtĩ kĩnene mũno kĩa ũnene kĩa rangi mwerũ na Ũrĩa wagĩikarĩire. Nayo thĩ na igũrũ ikĩũra ikĩehera mbere ya ũthiũ wake, na itiacokire kuonerũo handũ rĩngĩ

Na ngĩona akuũ, arĩa anene na anini, marũgamĩte mbere ya gĩtĩ kĩrĩa kĩa ũnene, na mabuku makĩhingũrũo. Na ibuku rĩngĩ rĩkĩhingũrũo; nĩrĩo ibuku rĩa muoyo. Arĩa akuũ magĩtuĩrũo kuumana na maũndũ marĩa maandĩkĩtwo mabuku-inĩ macio kũringana na ciĩko ciao

Narĩo iria rĩkĩruta akuũ arĩa maarĩ thĩinĩ warĩo, na gĩkuũ na Mbĩrĩra ikĩruta akuũ arĩa maarĩ thĩinĩ wacio, na o mũndũ agĩtuĩrũo kũringana na ciĩko ciake

Na gĩkuũ na Mbĩrĩra igĩikio thĩinĩ wa iria rĩu rĩa mwaki. Kĩu nĩkĩo gĩkuũ kĩrĩa gĩa kerĩ, iria rĩa mwaki.

Makĩria ma ũguo, mũndũ o wothe ũtaandĩkĩtwo thĩinĩ wa ibuku rĩa muoyo nĩ aaikirio iria-inĩ rĩu rĩa mwaki.