Kũguũrĩrio Kwa Johana 21

Na ngĩona igũrũ rĩerũ o na thĩ njerũ; nĩ gũkorũo igũrũ rĩrĩa rĩa mbere o na thĩ ĩrĩa ya mbere nĩ ciathirĩte, na iria rĩtiarĩ kuo rĩngĩ.

Ningĩ ngĩona itũũra rĩrĩa rĩamũre, Yahrushalayim Njerũ, rĩgĩikũrũka riumĩte igũrũ kũrĩ Yahweh rĩhaarĩirio ta mũhiki agemeirio mũthuriwe

Ngĩcoka ngĩigua mũgambo mũnene kuuma gĩtĩ-inĩ kĩrĩa kĩa ũnene woiga: “Tooneei! Gĩikaro kĩa Yahweh kĩrĩ hamwe na andũ, nake nĩ egũikarania nao, nao matuĩke andũ ake, nake Kĩhoti wao. Nake Yahweh we mwene arĩkoragwo hamwe nao.

Na nĩ ekũmagiria maithori mothe mathire maitho-inĩ mao, na gĩkuũ gĩtigaacoka gũkorũo kuo rĩngĩ, o na gũcakaya kana kĩrĩro kana ruo. Maũndũ marĩa ma tene nĩ mathiru biũ.”

Nake Ũrĩa waikarĩire gĩtĩ kĩrĩa kĩa ũnene akiuga: “Oneei! nĩ kwerũhia ndĩrerũhia maũndũ mothe.” Ningĩ akiuga: “Andĩka, tondũ ciugo icio nĩ cia kwĩhokeka na nĩ cia ma.”

Na akĩnjĩra atĩrĩ: “Maũndũ macio nĩ mahingu! Nĩ niĩ Aleph na Taw, kĩambĩrĩria na kĩrĩkĩrĩro. Mũndũ o wothe mũnyotu nĩ ngaamũhe maĩ ma itherũkĩro rĩa maĩ ma muoyo hatarĩ marĩhi.

Mũndũ o wothe ũgũtooria nĩ akaagaya maũndũ macio, na nĩ ngaatuĩka Kĩhoti wake nake atuĩke mũrũ wakwa

No ha ũhoro wa iguoya na arĩa matetĩkagia na eki maũndũ me magigi na oragani na arĩa meingĩragia thĩinĩ wa ngomanio itaagĩrĩire na arĩa mekaga maũndũ ma ũgo na ahoi mĩhianano na arĩa othe maragia maheni, igai rĩao rĩgaakorũo thĩinĩ wa iria rĩrĩa rĩakanaga mwaki na ũbiriti. Kĩu nĩkĩo gĩkuũ kĩrĩa gĩa kerĩ.”

Nake mũraika ũmwe wa arĩa mũgwanja maarĩ na mbakũri iria mũgwanja ciaiyũire mahũra mũgwanja ma mũico agĩũka akĩnjĩra atĩrĩ: “Ũka, na nĩ ngũkuonia mũhiki, mũtumia wa Gatũrũme.”

Kwoguo akĩnguua na hinya wa Roho o nginya kĩrĩma-inĩ kĩarĩ kĩnene na kĩraihu na igũrũ, na akĩnyonia Yahrushalayim itũũra rĩrĩa rĩamũre rĩgĩikũrũka riumĩte igũrũ kũrĩ Yahweh

na rĩarĩ na riri wa Yahweh. Ũkengu warĩo watariĩ o ta ihiga rĩa goro mũno, ta ihiga rĩa njathibi rĩrahenia ta gĩcicio

Rĩarĩ na rũthingo rũnene na rũraihu na igũrũ na ihingo 12 na ihingo-nĩ icio kwarĩ na araika 12, ningĩ ihingo-inĩ icio haandĩkĩtwo marĩĩtwa ma mĩhĩrĩga ĩrĩa 12 ya ariũ a Isiraeli.

Mwena wa irathĩro warĩ na ihingo ithatũ, mwena wa rũgongo ihingo ithatũ, mwena wa mũhuro ihingo ithatũ, na mwena wa ithũĩro ihingo ithatũ

Rũthingo rwa itũũra rĩu ningĩ rwarĩ na mahiga 12 ma mũthingi, na igũrũ rĩamo haarĩ na marĩĩtwa 12 ma atũmwo arĩa 12 a Gatũrũme.

Na rĩrĩ, ũcio waaragia na niĩ aanyitĩte ithanjĩ rĩa thahabu rĩa gũthima nĩguo athime itũũra rĩu na ihingo ciarĩo o na rũthingo rwarĩo.

Itũũra rĩu nĩ rĩiganaine mĩena yothe ĩna, na ũraihu warĩo nĩ mũnene o ta wariĩ warĩo. Nake agĩthima itũũra rĩu akĩhũthĩra ithanjĩ rĩu, na rĩarĩ rĩa furongi 12,000; ũraihu warĩo na wariĩ o na ũraihu wa na igũrũ nĩ ciganaine

Ningĩ agĩthima rũthingo rwarĩo, na rwarĩ rwa mĩkono 144 kũringana na gĩthimi kĩa mũndũ, o kĩo gĩthimi kĩa mũraika.

Rĩu-rĩ, rũthingo rũu rwathondeketwo na njathibi, narĩo itũũra rĩu rĩarĩ rĩa thahabu theru o ta gĩcicio gĩtheru biũ.

Mĩthingi ya rũthingo rwa itũũra rĩu yagemetio na mĩthemba yothe ya mahiga ma goro: mũthingi wa mbere warĩ wa njathibi, wa kerĩ safia, wa gatatũ kalikedoni, wa kana emeradi,

wa gatano sadonikisi, wa gatandatũ saridisi, wa mũgwanja krisolito, wa kanana beroli, wa kenda topazi, wa ikũmi krisoprasi, wa ikũmi na ĩmwe hayacinithi, na wa ikũmi na igĩrĩ amethuthito

Ningĩ ihingo icio 12 ciarĩ ruru 12; o kĩhingo gĩathondeketwo na ruru ĩmwe. Nayo njĩra ĩrĩa nene ya itũũra rĩu yarĩ ya thahabu theru, o ta gĩcicio gĩtheru biũ.

Na ndionire hekarũ thĩinĩ warĩo, tondũ Yahweh El Shaddai o nake Gatũrũme nĩo hekarũ yarĩo

Ningĩ itũũra rĩu rĩtibataraga ũtheri wa riũa o na kana wa mweri, nĩ gũkorũo riri wa Yahweh nĩguo ũrĩmũrĩkagĩra, na tawa warĩo nĩ Gatũrũme.

Nacio ndũrĩrĩ nĩ igaathiaga na ũtheri warĩo, nao athamaki a thĩ nĩ makaarehe riri wao thĩinĩ warĩo.

Ihingo ciarĩo itikaahingwo mũthenya o na rĩ, nĩ gũkorũo kũu gũtigaakoragwo na ũtukũ

Na nĩ makaarehe riri na gĩtĩo kĩa ndũrĩrĩ thĩinĩ warĩo

No kĩndũ o gĩothe kĩrĩ thahu na mũndũ o wothe wĩkaga maũndũ marĩ magigi na mũhenania ndakaarĩtonya o na atĩa; arĩa mandĩkĩtwo ibuku-inĩ rĩa muoyo rĩa Gatũrũme no o magaatonya.