Kũguũrĩrio Kwa Johana 22

Na akĩnyonia rũũĩ rwa maĩ ma muoyo, rwahenagia ta gĩcicio rũgĩtherera kuuma gĩtĩ-inĩ kĩa ũnene kĩa Yahweh na gĩa Gatũrũme

rũgereire gatagatĩ ka njĩra ĩrĩa nene ya itũũra rĩu. Na o mũkĩra mũkĩra-inĩ wa rũũĩ rũu haarĩ na mũtĩ wa muoyo warutaga maciaro 12 ma matunda, ũgaciaraga o mweri o mweri. Namo mathangũ ma mũtĩ ũcio maarĩ ma kũhonia ndũrĩrĩ.

Na gũtigaakorũo na kĩrumi rĩngĩ. Ĩndĩ gĩtĩ kĩa ũnene kĩa Yahweh o na gĩa Gatũrũme gĩgaakorũo thĩinĩ wa itũũra rĩu, na ndungata ciake nĩ ikamũtungatagĩra;

nacio nĩ ikoona ũthiũ wake, na rĩĩtwa rĩake rĩgaakorũo mathiithi-inĩ ma cio.

Ningĩ gũtigaacoka gũkorũo na ũtukũ, na itikaabatara ũtheri wa tawa o na kana ũtheri wa riũa, nĩ gũkorũo Yahweh Kĩhoti nĩ agaacimũrĩkagĩra, na igaathana irĩ athamaki tene na tene.

Akĩnjĩra atĩrĩ: “Ciugo ici nĩ cia kwĩhokeka na nĩ cia ma; Yahweh, Kĩhoti ũrĩa watongoririe anabii kũgerera Roho wake, nĩ atũmĩte mũraika wake onie ndungata ciake maũndũ marĩa arĩ o mũhaka mekĩke ica ikuhĩ

Oneei! nĩ ngũũka o narua. Kũrathimwo nĩ mũndũ o wothe wathĩkagĩra ciugo cia ũrathi wa ibuku rĩrĩ.”

Niĩ Johana, nĩ niĩ ndaiguaga na ngeyonera maũndũ macio. Rĩrĩa ndamaiguire na ngĩmona-rĩ, ngĩĩgũithia thĩ nĩguo thathaiye magũrũ-inĩ ma mũraika ũcio wanyonagia maũndũ macio

No we akĩnjĩra atĩrĩ: “Wĩmenyerere! Ndũgeke ũguo! Niĩ ndĩ ndungata o tawe o hamwe na ariũ a thoguo arĩa anabii na arĩa maathĩkagĩra ciugo cia ibuku rĩrĩ. Thathaiya Yahweh.”

Ningĩ akĩnjĩra: “Ndũkahinge na gũcinĩrĩra mũhũri ciugo cia ũrathi wa ibuku rĩrĩ, nĩ gũkorũo ihinda rĩrĩa rĩtuĩtwo rĩrĩ hakuhĩ

Ũrĩa ũtarĩ mũthingu nĩ athiĩ na mbere na maũndũ matarĩ ma ũthingu, nake ũrĩa ũkoragwo atarĩ Mwamũre nĩ athiĩ na mbere na ũhoro wake wa kwaga kwamũrwo; no ũrĩa mũthingu nĩ athiĩ na mbere na ũthingu, nake ũrĩa Mwamũre athiĩ na mbere na kwamũrwo.

“‘Rĩu-rĩ, Oneei nĩ ngũũka o narua, na ndĩ na kĩheo kĩrĩa heanaga, nĩguo ndĩhe o mũndũ kũringana na ciĩko ciake

Nĩ niĩ Aleph na Taw, wa mbere na wa mũico, kĩambĩrĩria o na kĩrĩkĩrĩro.

Kũrathimwo nĩ arĩa mamenyagĩrĩra Maathani make, nĩgetha magĩe na kĩhooto gĩa gũkinya mũtĩ-inĩ wa muoyo na mahote kũingĩra thĩinĩ wa itũũra magereire ihingo-inĩ ciarĩo.

Nja nĩ magui marĩ kuo na arĩa mekaga maũndũ ma ũgo na ahũri maraya na oragani na ahoi mĩhianano na arĩa othe mendete na maragia maũndũ ma maheni.’

“‘Niĩ, Yahshua, ndatũmire mũraika wakwa agũkinyĩrie ũira wĩgiĩ maũndũ macio nĩ ũndũ wa ciũngano. Nĩ niĩ mũrita wa Daudi na nĩ niĩ rũciaro rwake na njata ĩrĩa ĩcangararĩte ya rũcinĩ.’”

Na Roho na mũhiki mariuga, “Ũka!” nake mũndũ wothe ũkũigua nĩ oige, “Ũka!” ũrĩa wothe mũnyotu nĩ oke; ũrĩa wothe ũkwenda nĩ anyue maĩ ma muoyo hatarĩ marĩhi.

“Ndĩraruta ũira harĩ mũndũ wothe ũrĩa ũkũigua ciugo cia ũrathi wa ibuku rĩrĩ: Mũndũ angĩongerera ũndũ harĩ maũndũ macio, Yahweh nĩ akaamuongerera mahũra marĩa maandĩkĩtwo ibuku-inĩ rĩrĩ;

na mũndũ o wothe angĩeheria ũndũ o na ũrĩkũ harĩ ciugo cia ibuku rĩa ũrathi ũyũ, Yahweh nĩ akeeheria igai rĩake kuuma harĩ mũtĩ wa muoyo na kuuma harĩ itũũra rĩrĩa rĩamũre, na harĩ maũndũ marĩa maandĩkĩtwo thĩinĩ wa ibuku rĩrĩ.

“Ũrĩa ũrutaga ũira wĩgiĩ maũndũ macio aroiga, ‘Ĩĩ, nĩ ngũũka o narua!’” “Amein! Ũka, Mũthamaki Yahshua!”

Ũtugi wa Mũthamaki Yahshua ũroikara hamwe na arĩa aamũre.