Kũguũrĩrio Kwa Johana 5
Na guoko-inĩ kwa ũrĩo kwa Ũcio waikarĩire gĩtĩ kĩu kĩa ũnene ngĩona gĩkũnjo kĩandĩke mĩena yerĩ, kĩhingĩtwo biũ na gũcinĩrĩrwo mĩhũri mũgwanja.
Na ngĩona mũraika ũrĩ na hinya akĩanĩrĩra na mũgambo mũnene ũũ: “Nũ mwagĩrĩru wa kũhingũra gĩkũnjo kĩu na kũmethũra mĩhũri yakĩo?”
No gũtirĩ mũndũ kũu igũrũ kana gũkũ thĩ o na kana rungu rwa thĩ ũngĩahotire kũhingũra gĩkũnjo kĩu kana gũkĩrora thĩinĩ
Na niĩ ngĩrĩra mũno tondũ gũtionekire mũndũ mwagĩrĩru wa kũhingũra gĩkũnjo kĩu kana gũkĩrora thĩinĩ.
No ũmwe wa athuri acio akĩnjĩĩra atĩrĩ: “Tiga kũrĩra. Onee, Mũrũthi ũrĩa wa mũhĩrĩga wa Yahuda, ũcio mũri wa Daudi nĩ ahootanĩte, nĩguo ahingũre gĩkũnjo kĩu na amethũre mĩhũri yakĩo mũgwanja.”
Na gatagatĩ ga gĩtĩ kĩu kĩa ũnene na ciũmbe iria inya irĩ muoyo na gatagatĩ ka athuri acio ngĩona Gatũrũme koonekaga ta karĩ gathĩnje, karĩ na hĩa mũgwanja na maitho mũgwanja, na maitho macio marũgamĩrĩire maroho marĩa mũgwanja ma Yahweh marĩa matũmĩtwo thĩinĩ wa thĩ yothe
Nake akiumĩra o rĩmwe na agĩthiĩ agĩkĩoya kuuma guoko-inĩ kwa ũrĩo kwa Ũcio waikarĩire gĩtĩ kĩa ũnene
Na rĩrĩa ooire gĩkũnjo kĩu, ciũmbe iria inya irĩ muoyo na athuri acio 24 makĩĩgũithia thĩ mbere ya Gatũrũme, na o ũmwe wao aarĩ na kĩnanda kĩa mũgeto na mbakũri cia thahabu ciyũrĩte ũbumba. (Ũbumba ũcio ũrũgamĩrĩire mahoya ma andũ arĩa aamũre.)
Na nĩ kũina mainaga rwĩmbo rwerũ, makoiga atĩrĩ: “Nĩ wagĩrĩire kuoya gĩkũnjo kĩu na ũmethũre mĩhũri yakĩo, nĩ gũkorũo wee nĩ wathĩnjirũo na kũgerera thakame yaku ũkĩgũrĩra Yahweh andũ kuuma mĩhĩrĩga-inĩ yothe na thiomi na ikundi cia andũ na ndũrĩrĩ,
na ũkĩmatua athamaki na athĩnjĩri-Yahweh matungatagĩre Kĩhoti witũ, na nĩo a gwathana marĩ athamaki igũrũ rĩa thĩ.”
Ngĩcoka ngĩona, na ngĩigua mũgambo wa araika aingĩ mathiũrũrũkĩirie gĩtĩ kĩu kĩa ũnene na ciũmbe iria irĩ muoyo na athuri acio, naguo mũigana wao warĩ ngiri ikũmi maita ngiri ikũmi na ngiri nyingĩ maita ngiri nyingĩ,
na maanagĩrĩra na mũgambo mũnene makoiga: “Gatũrũme o ũcio wathĩnjirũo nĩ agĩrĩire kwamũkĩra hinya na ũtonga na ũũgĩ na ũhoti na gĩtĩo na riri na kĩrathimo.”
Na ngĩigua ciũmbe ciothe igũrũ na thĩinĩ wa thĩ na rungu rwa thĩ na thĩinĩ wa iria, na indo ciothe iria irĩ thĩinĩ wacio, ikiuga: “Ũrĩa ũikarĩire gĩtĩ kĩa ũnene o na Gatũrũme marogĩa na kĩrathimo na gĩtĩo na riri na ũhoti tene na tene.”
Ciũmbe icio inya irĩ muoyo cioigaga: “Amein!” nao athuri acio makĩĩgũithia thĩ na magĩthathaiya.