Kũguũrĩrio Kwa Johana 6

Na rĩrĩa Gatũrũme amethũrire mũhũri ũmwe wa ĩyo mũgwanja, ngĩona na ngĩigua kĩũmbe kĩmwe harĩ icio inya irĩ muoyo kĩoiga ũũ na mũgambo ũhaana marurumĩ: “Ũka!”

Na rĩrĩ, ngĩona mbarathi ya rangi mwerũ, na ũrĩa wamĩikarĩire aarĩ na ũta; na akĩheo thũmbĩ, agĩthiĩ akĩhootanaga nĩguo arĩkie ũhootani wake.

Rĩrĩa amethũrire mũhũri wa kerĩ, ngĩigua kĩũmbe gĩa kerĩ kĩrĩ muoyo kĩoiga: “Ũka!”

Mbarathi ĩngĩ ĩkiumĩra, nayo yarĩ ya rangi ta wa mwaki, nake ũrĩa wamĩikarĩire agĩĩtĩkĩrio kweheria thayũ thĩinĩ wa thĩ nĩguo andũ mathĩnjane, na akĩheo rũhiũ rũnene rwa njora.

Rĩrĩa amethũrire mũhũri wa gatatũ, ngĩigua kĩũmbe gĩa gatatũ kĩrĩ muoyo kĩoiga: “Ũka!” Na rĩrĩ, ngĩona mbarathi njirũ, na ũrĩa wamĩikarĩire aarĩ na ratiri ya gũthima guoko-inĩ gwake

Ngĩigua kĩndũ ta mũgambo gatagatĩ-inĩ ga ciũmbe iria inya irĩ muoyo woiga ũũ: “Kĩbaba kĩa ngano kiumage dinari ĩmwe na ibaba ithatũ cia cairi ciumage dinari ĩmwe; na ndũgathũkie maguta ma ndamaiyũ na ndibei.”

Rĩrĩa amethũrire mũhũri wa kana, ngĩigua mũgambo wa kĩũmbe gĩa kana kĩrĩ muoyo woiga: “Ũka!”

Na rĩrĩ, ngĩona mbarathi ya rangi mũtheũku, na ũrĩa wamĩikarĩire aarĩ na rĩĩtwa Gĩkuũ. Na oimĩtwo thutha nĩ Mbĩrĩra. Na makĩheo wathani igũrũ rĩa gĩcunjĩ kĩa inya gĩa thĩ, morage na rũhiũ rũraihu rwa njora, na ng’aragu, na mũrimũ wa kũrehe gĩkuũ, na nyamũ cia gĩthaka cia gũkũ thĩ.

Rĩrĩa amethũrire mũhũri wa gatano, ngĩona rungu rwa kĩgongona mĩoyo ya arĩa maathĩnjĩtwo nĩ ũndũ wa kiugo kĩa Yahweh na nĩ ũndũ wa ũira ũrĩa maarutĩte.

Makĩanĩrĩra na mũgambo mũnene makiuga: “Wee Yahweh , o wee Mwamũre na Wa Ma, nĩ nginya rĩ ũkwĩgirĩrĩria gũtuanĩra na kũrĩhĩria thakame iitũ harĩ arĩa matũũraga thĩinĩ wa thĩ?”

Na makĩheo o mũndũ kanjũ ya rangi mwerũ, makĩĩrũo mahurũke ihinda rĩngĩ inyinyi, nginya rĩrĩa mũigana ũkaahinga wa ndungata iria ingĩ na ariũ a Ithe wao arĩa maarĩ hakuhĩ kũũragwo o tao.

Ngĩcoka ngĩona rĩrĩa amethũrire mũhũri wa gatandatũ, na gũkĩgĩa gĩthingithia kĩnene; narĩo riũa rĩkĩira o ta nguo ya ikũnia ĩthondeketwo na njuĩrĩ; naguo mweri wothe ũkĩhaana thakame,

na njata cia igũrũ ikĩgũa thĩ o ta ũrĩa mũkũyũ ũitaga ngũyũ itarĩ njĩru rĩrĩa wahurutwo nĩ rũhuho rũnene

Narĩo igũrũ rĩkĩehera o ta gĩkũnjo kĩrakũnjwo, na irĩma ciothe na icigĩrĩra ciothe ikĩeherio handũ hacio

Nao athamaki a thĩ, anene, atongoria a mbũtũ, itonga, arĩa marĩ hinya, ngombo ciothe, na andũ othe arĩa maarĩ na wĩyathi makĩĩhitha ngurunga-inĩ na ndwaro-inĩ cia mahiga irĩma-inĩ

Nao meeraga irĩma na ndwaro icio ũũ: “Tũgũĩrei mũtũhithe kuuma harĩ ũthiũ wa Ũrĩa ũikarĩire gĩtĩ kĩa ũnene na kuuma harĩ mang’ũrĩ ma Gatũrũme,

nĩ gũkorũo mũthenya ũrĩa mũnene wa mang’ũrĩ mao nĩ mũkinyu, na nũ ũngĩhota kũrũgama?”