Kũguũrĩrio Kwa Johana 7

Thutha ũcio ngĩona araika ana marũgamĩte kona-inĩ iria inya cia thĩ, manyitĩte na makarũmia huho iria inya cia thĩ, nĩguo gũtikagĩe rũhuho rũkũhurutana thĩinĩ wa thĩ, kana iria-inĩ kana igũrũ rĩa mũtĩ o na ũmwe

Ngĩcoka ngĩona mũraika ũngĩ akĩambata oimĩte mwena wa irathĩro, arĩ na mũhũri wa Kĩhoti ũrĩa ũtũũraga muoyo; na akĩanĩrĩra kũrĩ araika ana arĩa meetĩkĩrĩtio gũthũkia thĩ na iria,

akiuga atĩrĩ: “Mũtigathũkie thĩ kana iria o na kana mĩtĩ, nginya twambe tũrĩkie gwĩkĩra ndungata cia Yahweh witũ mũhũri mathiithi-inĩ ma cio.”

Na ngĩigua mũigana wa andũ arĩa meekĩrirũo mũhũri, 144,000, arĩa meekĩrirũo mũhũri kuuma mĩhĩrĩga-inĩ yothe ya ariũ a Isiraeli:

Kuuma mũhĩrĩga wa Yahuda 12,000 magĩĩkĩrũo mũhũri; kuuma mũhĩrĩga wa Rubeni 12,000; kuuma mũhĩrĩga wa Gadi 12,000;

kuuma mũhĩrĩga wa Asheri 12,000; kuuma mũhĩrĩga wa Nafitali 12,000; kuuma mũhĩrĩga wa Manase 12,000;

kuuma mũhĩrĩga wa Simeoni 12,000; kuuma mũhĩrĩga wa Lawii 12,000; kuuma mũhĩrĩga wa Isakaru 12,000;

kuuma mũhĩrĩga wa Zebuluni 12,000; kuuma mũhĩrĩga wa Jusufu 12,000; kuuma mũhĩrĩga wa Benjamini 12,000 magĩĩkĩrũo mũhũri.

Na rĩrĩ, thutha ũcio ngĩona andũ kĩrĩndĩ kĩnene, arĩa gũtarĩ mũndũ ũngĩahotire gũtara, kuuma ndũrĩrĩ-inĩ ciothe, na mĩhĩrĩga, na ikundi cia andũ, na thiomi, marũgamĩte mbere ya gĩtĩ kĩrĩa kĩa ũnene na mbere ya Gatũrũme, mehumbĩte kanjũ cia rangi mwerũ; na maanyitĩte makĩndũ na moko

Na maanagĩrĩra na mũgambo mũnene makoiga: “Ũhonokio uumaga kũrĩ Yahweh witũ, o ũcio ũikarĩire gĩtĩ kĩa ũnene, na kũrĩ Gatũrũme.”

Nao araika othe maarũgamĩte mathiũrũrũkĩirie gĩtĩ kĩu kĩa ũnene o hamwe na athuri acio, na ciũmbe iria inya, na makĩĩgũithia magĩturumithia mothiũ mao thĩ mbere ya gĩtĩ kĩu kĩa ũnene magĩthathaiya Yahweh,

makiugaga ũũ: “Amein! Kũrathimwo na riri na ũũgĩ wa ma na ngatho na gĩtĩo na hinya na ũhoti irotuĩka cia Yahweh witũ tene na tene. Amein.”

Na ũmwe wa athuri acio akĩnjũria atĩrĩ: “Andũ aya mehumbĩte kanjũ cia rangi mwerũ nĩa, na moimĩte kũ?”

Na niĩ ngĩmwĩra o hĩndĩ ĩyo atĩrĩ: “Mwathi wakwa, wee nĩwe ũũĩ.” Nake akĩnjĩra ũũ: “Aya nĩ arĩa moimĩte thĩna-inĩ ũrĩa mũnene, na nĩ mathambĩtie kanjũ ciao na thakame ya Gatũrũme igatuĩka cia rangi mwerũ

Nĩkĩo marĩ mbere ya gĩtĩ kĩa ũnene kĩa Yahweh, na mamũrutagĩra ũtungata mwamũre mũthenya na ũtukũ thĩinĩ wa hekarũ yake; nake Ũcio ũikarĩire gĩtĩ kĩa ũnene nĩ agaatambũrũkia hema yake igũrũ rĩao.

Nao matikaahũta kana manyote rĩngĩ, o na matigaacinwo nĩ riũa kana ũrugarĩ o na ũrĩkũ mũnene,

tondũ Gatũrũme, o ũcio ũrĩ gatagatĩ-inĩ ga gĩtĩ kĩrĩa kĩa ũnene, nĩ akaamarĩithagia na akamatongoria akamatwara matherũkĩro-inĩ ma maĩ ma muoyo. Nake Yahweh nĩ akaagiria maithori mothe kuuma maitho-inĩ mao.”