Kũguũrĩrio Kwa Johana 8

Rĩrĩa amethũrire mũhũri wa mũgwanja, kũu igũrũ gũgĩkirũo ta nuthu ithaa

Na ngĩona araika mũgwanja arĩa marũgamaga mbere ya Yahweh, na makĩheo macoro mũgwanja.

Nake mũraika ũngĩ wanyitĩte rũgĩo rwa thahabu rwa gũcinĩra ũbumba, agĩũka na akĩrũgama kĩgongona-inĩ, akĩnengerũo ũbumba mũingĩ nĩguo aũrute hamwe na mahoya ma arĩa othe aamũre igũrũ rĩa kĩgongona gĩa thahabu kĩrĩa kĩarĩ mbere ya gĩtĩ kĩa ũnene

Nayo ndogo ya ũbumba ũcio ĩkĩambata kuuma guoko-inĩ kwa mũraika ũcio hamwe na mahoya ma arĩa aamũre ĩgĩthiĩ mbere ya Yahweh

No o hĩndĩ ĩyo mũraika ũcio akĩoya rũgĩo rũu rwa ũbumba, akĩrũiyũria mwaki kuuma kĩgongona-inĩ kĩu na akĩũikia thĩ. Na gũkĩgĩa marurumĩ na mĩgambo na ngwa na heni na gĩthingithia.

Nao araika acio mũgwanja maarĩ na macoro mũgwanja makĩĩhaarĩria kũmahuha.

Wa mbere akĩhuha coro wake. Gũkĩgĩa mbura ya mbembe na mwaki ũtukanĩte na thakame, na igĩikio thĩ; nakĩo gĩcunjĩ gĩa ithatũ gĩa thĩ gĩkĩhĩa, na gĩcunjĩ gĩa ithatũ kĩa mĩtĩ gĩkĩhĩa, o na mĩmera yothe ĩrĩa mĩruru ĩkĩhĩa.

Nake mũraika wa kerĩ akĩhuha coro wake. Na kĩndũ gĩtariĩ ta kĩrĩma kĩnene kĩrahĩa nĩ mwaki gĩgĩikio iria-inĩ. Na gĩcunjĩ gĩa ithatũ kĩa iria gĩgĩtuĩka thakame;

na gĩcunjĩ gĩa ithatũ gĩa ciũmbe iria irĩ muoyo thĩinĩ wa iria igĩkua, nakĩo gĩcunjĩ gĩa ithatũ kĩa meri igĩthũkanga.

Mũraika wa gatatũ akĩhuha coro wake. Na njata nene yaakanaga ta tawa ĩkĩgũa kuuma igũrũ, ĩkĩgũĩra gĩcunjĩ gĩa ithatũ kĩa njũĩ na matherũkĩro ma maĩ

Rĩĩtwa rĩa njata ĩyo nĩ Mũtathia. Nakĩo gĩcunjĩ gĩa ithatũ kĩa maĩ makĩrũra, na andũ aingĩ magĩkua nĩ ũndũ wa maĩ macio, tondũ nĩ maatuĩkĩte marũrũ.

Na mũraika wa kana akĩhuha coro wake. Nakĩo gĩcunjĩ gĩa ithatũ kĩa riũa gĩkĩhũũrũo, o na gĩcunjĩ gĩa ithatũ kĩa mweri na gĩcunjĩ gĩa ithatũ kĩa njata, nĩguo gĩcunjĩ gĩa ithatũ gĩacio kĩgĩe nduma naguo mũthenya ndũkagĩe ũtheri gĩcunjĩ kĩaguo gĩa ithatũ, na ũtukũ o taguo.

Ngĩcoka ngĩona na ngĩigua mũraika ũrombũkĩra igũrũ gatagatĩ akiuga na mũgambo mũnene: “Kaĩ mũrĩ na haaro-ĩ, kaĩ mũrĩ na haaro-ĩ, kaĩ mũrĩ na haaro-ĩ, inyuĩ arĩa mũtũũraga thĩinĩ wa thĩ, nĩ ũndũ wa mĩgambo ĩyo ĩngĩ ya coro ya araika atatũ arĩa matarĩ marahuha macoro mao!”