Luka 10
Thutha wa maũndũ macio Yahshua agĩthuura angĩ 70 na akĩmatũma marĩ erĩ erĩ mathiĩ mbere yake matũũra-inĩ mothe na kũndũ kũrĩa guothe we mwene aarĩ athiĩ
Agĩcoka akĩmera atĩrĩ: “Magetha nĩ maingĩ, no aruti wĩra nĩ anini. Kwoguo-rĩ, hoyai Mwene magetha atũme aruti wĩra magetha-inĩ make
Thiĩi! Na atĩrĩrĩ, ndĩramũtũma mũtariĩ ta tũgondu gatagatĩ-inĩ ka njũi
Mũtigakuue kamondo ka mbeca kana mondo ya irio kana iratũ, na mũtikageithie mũndũ o na ũ njĩra-inĩ
Kũrĩa guothe mũkũingĩra thĩinĩ wa nyũmba, ambai muuge: ‘Nyũmba ĩno ĩrogĩa na thayũ.’
Na angĩkorũo kũu nĩ kũrĩ na mũrata wa thayũ, thayũ wanyu nĩ ũgũka igũrũ rĩake. No angĩkorũo gũtirĩ, nĩ ũkũmũcokerera
Nĩ ũndũ ũcio, ikarai nyũmba ĩyo, mũrĩe na mũnyue kĩrĩa maramũhe, tondũ mũruti wĩra nĩ agĩrĩire mũcara wake. Mũtigaikare mũgĩthaamaga kuuma nyũmba ĩmwe nginya ĩrĩa ĩngĩ.
“Ningĩ-rĩ, kũrĩa guothe mũkũingĩra thĩinĩ wa itũũra na mamwamũkĩre, rĩai kĩrĩa mekũmũhe
na mũhonie arĩa arũaru kuo na mũmere ũũ: ‘Ũthamaki wa Yahweh nĩ ũmũkuhĩrĩirie.’
No kũrĩa guothe mũkũingĩra thĩinĩ wa itũũra na mage kũmwamũkĩra, umai mũthiĩ barabara-inĩ ciakuo iria nene na muuge atĩrĩ:
‘O na rũkũngũ rwa itũũra rĩanyu nĩ twarũhuura ruume magũrũ-inĩ maitũ. No rĩrĩ, menyai ũũ, Ũthamaki wa Yahweh nĩ ũkuhĩrĩirie.’
Ngũmwĩra atĩrĩ, Sodomu nĩ ĩgeetiiria mũthenya ũcio gũkĩra itũũra rĩu.
“Wee Korazini, kaĩ ũrĩ na haaro-ĩ! Wee Bethisaida, kaĩ ũrĩ na haaro-ĩ! Tondũ korũo mawĩko ma hinya marĩa mwekĩirũo meekirũo Turo na Sidoni, andũ a kuo mangĩeririre tene na magaikara thĩ meehumbĩte nguo cia makũnia na mehurĩirie mũhu
Nĩ ũndũ ũcio-rĩ, Turo na Sidoni nĩ igeetiiria hĩndĩ ya ituĩro kũmũkĩra inyuĩ
Wee nawe Kaperinaumu, hihi nĩ gũtũũgĩrio ũgaatũgĩrio nginya igũrũ? Wee ũgaaikũrũka Mbĩrĩra-inĩ!
“Mũndũ o wothe ũmũthikagĩrĩria inyuĩ, nĩ niĩ athikagĩrĩria. Na mũndũ o wothe ũmũregaga inyuĩ, o na niĩ nĩ andegaga. Makĩria ma ũguo, mũndũ o wothe ũndegaga aregaga nginya Ũrĩa wandũmire.”
Nao acio 70 magĩcoka marĩ na gĩkeno, makiuga: “Rabbi, o na ndaimono nĩ iratwathĩkĩra twaciatha na rĩĩtwa rĩaku.”
Aigua ũguo akĩmera: “Ndĩrona Shaitani arĩkĩtie kũharũrũka ta rũheni kuuma igũrũ
Ta kĩoneei, inyuĩ nĩ ndĩmũhete wathani wa gũkinyangĩrĩria nyoka na tũngʼaurũ, na wa gũtooria hinya wothe wa thũ, na gũtirĩ kĩndũ o na kĩmwe gĩkaamũgera ngero
O na kũrĩ ũguo, mũtigakene tondũ maroho nĩ maramwathĩkĩra, no kenai nĩ gũkorũo marĩĩtwa manyu nĩ mandĩkĩtwo kũrĩa igũrũ.”
Na hĩndĩ ĩyo, akĩiyũrũo nĩ gĩkeno kĩnene nĩ ũndũ wa Roho Mwamũre na akiuga: “Awa, Mũthamaki wa igũrũ na thĩ, ndĩrakũgooca mbere ya andũ, nĩ tondũ maũndũ maya nĩ ũmahithĩte biũ andũ arĩa ogĩ na marĩ ũmenyo, ũkamaguũrĩria tũkenge. Ũguo nĩguo kũrĩ, Awa, nĩ gũkorũo ũguo nĩguo wonete kwagĩrĩire
Nĩ heetwo maũndũ mothe nĩ Awa, na gũtirĩ mũndũ ũĩ Mũriũ tiga Awa, na gũtirĩ mũndũ ũĩ Awa tiga Mũriũ na mũndũ o wothe ũrĩa Mũriũ endaga kũguũrĩria.”
Agĩcoka akĩhũgũkĩra arutwo akĩmera atĩrĩ hatarĩ andũ angĩ: “Kũrathimwo-rĩ, nĩ maitho marĩa marona maũndũ marĩa inyuĩ mũrona
Nĩ ũndũ ngũmwĩra atĩrĩ, anabii aingĩ na athamaki nĩ meeriragĩria kuona maũndũ marĩa inyuĩ mũrona no matiamonire, na kũigua maũndũ marĩa mũraigua no matiamaiguire.”
Na rĩrĩ, mũndũ ũmwe woĩ Watho wega akĩrũgama nĩguo amũgerie akiuga: “Mwathi, ndĩrabatara gwĩka atĩa nĩguo ngaagaya muoyo wa tene na tene?”
Nake akĩmũũria atĩrĩ: “Kwandĩkĩtwo atĩa thĩinĩ wa Watho? Ũthomaga atĩa?”
Akĩmũcokeria ũũ: “‘No mũhaka wende Yahweh Kĩhoti waku na ngoro yaku yothe na muoyo waku wothe na hinya waku wothe na meciria maku mothe’ na ‘Wende mũndũ ũrĩa mũriganĩtie nake o ta ũrĩa wĩyendete wee mwene.’”
Nake akĩmwĩra atĩrĩ: “Nĩ wacokia ũrĩa kũrĩ; ĩkaga ũguo na nĩ ũkoona muoyo.”
No mũndũ ũcio akĩenda kwĩyonania atĩ nĩ mũthingu, akĩũria Yahshua: “Mũndũ ũrĩa tũriganĩtie nake kũna nũ?”
Nake Yahshua akĩmũcokeria akĩmwĩra: “Kwarĩ mũndũ waikũrũkaga oimĩte Yahrushalayim erekeire Jeriko, akĩhobanĩrio nĩ atunyani, makĩmũruta nguo, makĩmũhũũra, na magĩthiĩ, makĩmũtiga arĩ hakuhĩ gũkua
Na gũgĩkinya atĩrĩ, mũthĩnjĩri-Yahweh ũmwe nĩ aaikũrũkaga barabara-inĩ ĩyo, no rĩrĩa aamuonire, akĩhĩtũkĩra mũkĩra ũcio ũngĩ
O nake Mũlawii, rĩrĩa aakinyire hau na akĩmuona, akĩhĩtũkĩra mũkĩra ũcio ũngĩ
No Mũsamaria ũmwe wagereire barabara-inĩ ĩyo agĩkinya harĩ we, na rĩrĩa aamuonire, akĩringwo nĩ tha
Nĩ ũndũ ũcio akĩmũkuhĩrĩria, akĩmũitĩrĩria maguta na ndibei kũrĩa aatihangĩtio na akĩmuoha. Agĩcoka akĩmũhaicia igũrũ rĩa nyamũ yake mwene akĩmũtwara mũkawa-inĩ na akĩmũtungata
Mũthenya ũyũ ũngĩ akĩruta dinari igĩrĩ agĩcinengera mwene mũkawa, na akĩmwĩra: ‘Mũtungate, na kĩrĩa gĩothe ũkũhũthĩra makĩria ma ici, nĩ ngakũrĩha rĩrĩa ngaacoka.’
Harĩ andũ acio atatũ-rĩ, wee ũkuona ta arĩ ũrĩkũ wekĩire mũndũ ũcio wahobanĩirio nĩ atunyani o ta mũndũ mariganĩtie nake?
Akiuga atĩrĩ: “Nĩ ũcio wamwĩkĩire ciĩko cia tha.” Yahshua agĩcoka akĩmwĩra: “Gĩthiĩ na wĩkage ũguo wee mwene.”
Na rĩrĩa maathiaga, akĩingĩra gĩcagi-inĩ kĩmwe. Arĩ kũu-rĩ, mũndu-wa-nja ũmwe wetagwo Maritha akĩmũnyita ũgeni gwake mũciĩ
Ningĩ nĩ aarĩ na mwarĩ wa nyina wetagwo Mariamu, ũrĩa waikarire thĩ magũrũ-inĩ ma Yahshua na nĩ gũthikĩrĩria aathikagĩrĩria ũrĩa ooigaga
No Maritha nake agĩtahwo nĩ mĩhangʼo mĩingĩ. Nĩ ũndũ ũcio agĩthiĩ harĩ we akĩmwĩra: “Rabbi, kaĩ ũtarona atĩ mwarĩ wa maitũ nĩ andigire ngĩhangʼĩra maũndũ ndĩ nyiki? Mwĩre oke andeithie.”
Nake Yahshua akĩmũcokeria akĩmwĩra atĩrĩ: “Maritha, Maritha, ũratangĩka na ũgethĩnia nĩ ũndũ wa maũndũ maingĩ
Ĩndĩ no maũndũ manini marabatarania, kana o ũmwe tu. Ha ũhoro wake-rĩ, Mariamu athuurĩte ũndũ ũrĩa mwega, na ndangĩtunywo.”