Luka 24
No mũthenya wa mbere wa kiumia, magĩkinya mbĩrĩra-inĩ rũcinĩ tene mũno makuuĩte mahuti marĩa manungaga wega marĩa maahaarĩirie
No magĩkora ihiga rĩgaragarĩtio rĩkeherio mbĩrĩra-inĩ,
na rĩrĩa maatonyire, matiakorire mwĩrĩ wa Yahshua
O hĩndĩ ĩyo maagegetio nĩ ũhoro ũcio-rĩ, arũme erĩ mehumbĩte nguo irakenga makĩrũgama hau maarĩ
Andũ-a-nja acio makĩmaka na makĩinamia mothiũ mao, nao arũme acio makĩmoria: “Nĩ kĩ kĩratũma mũcarie ũrĩa ũrĩ muoyo gatagatĩ-inĩ ka arĩa akuũ?
Ndarĩ haha, nĩ gũkorũo nĩ ariũkĩtio. Ta ririkanai ũrĩa aamwĩrire atanoima Galili,
atĩ Mũrũ wa mũndũ no mũhaka aneanwo moko-inĩ ma andũ ehia na oragĩrũo mũtĩ igũrũ na mũthenya wa gatatũ ariũke.”
Nao makĩririkana ciugo ciake,
na makĩhũndũka kuuma mbĩrĩra-inĩ na makĩheana ũhoro wa maũndũ macio mothe kũrĩ arĩa Ikũmi na Ũmwe, o na acio angĩ othe.
Andũ-a-nja acio maarĩ Mariamu Mũmagidali, Joana, na Mariamu nyina wa Jakubu. O na atumia arĩa angĩ maarĩ nao nĩ maaheire atũmwo ũhoro ũcio”
No makĩona maũndũ macio ta arĩ ũrimũ, na makĩrega gwĩtĩkia atumia acio.
No Kepha agĩũkĩra agĩtengʼera mbĩrĩra-inĩ ĩyo, na rĩrĩa aainamĩrĩire agĩcũthĩrĩria, no itambaya cia gatani oonire. Kwoguo akiuma hau amakĩtio nĩ ũrĩa gwekĩkĩte.
No rĩrĩ, mũthenya o ũcio arutwo erĩ maarĩ njĩra-inĩ magĩthiĩ gĩcagi gĩetagwo Emau, kĩrĩa kĩarĩ mairo ta mũgwanja kuuma Yahrushalayim,
na nĩ kwarĩrĩria maaragĩrĩria maũndũ macio mothe meekĩkĩte.
Na hĩndĩ ĩyo maathiaga magĩteeretaga ũhoro wa maũndũ macio-rĩ, Yahshua agĩkuhĩrĩria na akĩambĩrĩria gũtwarana nao,
no maitho mao matiigana kũrekwo mamũmenye.
Nake akĩmoria atĩrĩ: “Nĩ maũndũ marĩkũ macio mũraarĩrĩria mũgĩthiĩ na njĩra?” Nao makĩrũgama marĩ na kĩeha
Ũmwe wetagwo Kileopa akĩmũũria atĩrĩ: “Kaĩ wee ũrĩ mũgeni ũraikara arĩ wiki thĩinĩ wa Yahrushalayim atĩ ndũĩ maũndũ marĩa mekĩkĩte kuo matukũ-inĩ maya?”
Nake akĩmoria: “Maũndũ marĩkũ?” Makĩmwĩra atĩrĩ: “Maũndũ megiĩ Yahshua ũrĩa Mũnazarethi, ũrĩa ũrarĩ mũnabii ũrĩ hinya harĩ ciĩko na ciugo maitho-inĩ ma Yahweh na ma andũ othe;
na ũrĩa anene a athĩnjĩri-Yahweh na atongoria aitũ maamũneanire atuĩrũo kũũragwo, na makĩmũhũũrĩra mũtĩ-inĩ na mĩcumarĩ
No tũrerĩgagĩrĩra atĩ mũndũ ũcio nĩwe ũkũhonokia Isiraeli. Na makĩria ma ũguo, ũyũ nĩ mũthenya wa gatatũ kuuma maũndũ macio mekĩka
Igũrũ rĩa ũguo-rĩ, andũ-a-nja amwe gatagatĩ-inĩ gaitũ o nao nĩ matũgegirie, tondũ nĩ megũthiĩte mbĩrĩra-inĩ rũcinĩ tene
na rĩrĩa magire gũkora mwĩrĩ wake, moka makiugaga atĩ ningĩ nĩ mona araika, arĩa mamerire atĩ arĩ muoyo.
Thutha ũcio andũ amwe arĩa tuuma nao nĩ mathiire mbĩrĩra-inĩ ĩyo, na makora gũtariĩ o ta ũrĩa atumia acio mekuugĩte, na matinamuona.”
Nĩ ũndũ ũcio akĩmera: “Inyuĩ andũ aya mũtarĩ na wĩcirio na mũrĩ na ngoro itahiũhaga gwĩtĩkia maũndũ mothe marĩa anabii marĩtie
Githĩ Messiya ndaragĩrĩire kũnyarirũo na maũndũ macio nĩguo atonye riri-inĩ wake?”
Akĩmataarĩria maũndũ marĩa mamwĩgiĩ thĩinĩ wa Maandĩko mothe, ambĩrĩirie na maandĩko ma Musa na ma Anabii othe.
Mũthia-inĩ magĩkuhĩrĩria gĩcagi kĩrĩa maathiaga, nake akĩhaana ta ekũhĩtũka gĩcagi kĩu
No makĩmũringĩrĩria aikare nao makĩmwĩra atĩrĩ: “Ikara gũkũ hamwe na ithuĩ, nĩ ũndũ kũrorete gũtuka na mũthenya ũrĩ hakuhĩ gũthira.” Nake akĩingĩra agĩikara nao
Na rĩrĩa aarĩaga hamwe nao, akĩoya mũgate, akĩũrathima, akĩwenyũranga, na akĩmanengera
Hĩndĩ ĩyo maitho mao makĩhingũka biũ na makĩmenya atĩ nĩwe; no we akĩbuĩria magĩtiga kũmuona.
Na makĩĩrana atĩrĩ: “Na githĩ tũtikũhĩahĩaga ngoro agĩtwarĩria tũrĩ njĩra-inĩ, rĩrĩa egũtũthathaũragĩra Maandĩko?”
Na magĩũkĩra o ithaa rĩu magĩcoka Yahrushalayim, na magĩkora arĩa Ikũmi na Ũmwe na arĩa maagomanĩte hamwe nao,
arĩa mooigire atĩrĩ: “Nĩ ma Yahshua nĩ ariũkĩte, na akoimĩrĩra Simoni!”
Nao magĩtaarĩria ũrĩa gwekĩkĩte marĩ njĩra-inĩ na ũrĩa maamũmenyire nĩ ũndũ wa kwenyũranga mũgate.
Na hĩndĩ ĩyo maaragia ũhoro wa maũndũ macio-rĩ, akĩrũgama gatagatĩ-inĩ kao akĩmera: “Mũrogĩa na thayũ.”
No tondũ meeciragia nĩ kĩũmbe kĩa roho marona, makĩhahũka na makĩmaka
Nĩ ũndũ ũcio akĩmoria: “Mũramaka nĩkĩ, na nĩ kĩ kĩratũma ngoro cianyu igĩe na nganja
Ta rorai moko na magũrũ makwa muone atĩ nĩ niĩ; hutiai na muone, nĩ gũkorũo kĩũmbe kĩa roho gĩtirĩ nyama na mahĩndĩ ta ũũ mũrona ndariĩ.”
Na rĩrĩa aameraga ũguo, akĩmonia moko na magũrũ make
No tondũ o na rĩo matietĩkirie nĩ ũndũ wa gũkena na kũgega-rĩ, akĩmoria atĩrĩ: “Mũrĩ na kĩndũ gĩa kũrĩa hau?”
Nao makĩmũnengera gĩcunjĩ gĩa thamaki hĩhie,
nake akĩoya na akĩrĩa makĩyonagĩra na maitho mao.
Agĩcoka akĩmera atĩrĩ: “Ici nĩcio ciugo ciakwa iria ndamwĩrire rĩrĩa ndakoragwo hamwe na inyuĩ, atĩ maũndũ mothe marĩa mandĩkĩtwo igũrũ rĩakwa Watho-inĩ wa Musa na maandĩko-inĩ ma Anabii na Thaburi no mũhaka mahinge.”
Agĩcoka akĩhingũra meciria mao biũ nĩguo mataũkĩrũo nĩ Maandĩko macio,
na akĩmera, “Kwandĩkĩtwo atĩrĩ: atĩ Messiya nĩ angĩkanyarirũo na mũthenya wa gatatũ ariũkio kuuma kũrĩ arĩa akuũ,
na nĩ ũndũ wa rĩĩtwa rĩake ndũrĩrĩ ciothe nĩ ingĩkaahunjĩrio ciĩrire nĩguo cioherũo mehia—kwambĩrĩria Yahrushalayim
Inyuĩ nĩ mũgaatuĩka aira a maũndũ macio
Na rĩrĩ, nĩ ngũmũtũmĩra kĩrĩa Awa eeranĩire. O na kũrĩ ũguo, ikarai gũkũ itũũra-inĩ nginya rĩrĩa mũkaamũkĩra hinya kuuma igũrũ.”
Agĩcoka akĩmaruta nja akĩmatwara nginya Bethania, akĩoya moko make na igũrũ akĩmarathima
Na o hĩndĩ ĩyo aamarathimaga, akĩmatiga akĩoywo agĩtwarũo igũrũ.
Nao makĩmũinamĩrĩra na magĩcoka Yahrushalayim makenete mũno.
Na hĩndĩ ciothe maakoragwo thĩinĩ wa hekarũ makĩgooca Yahweh.