Luka 23
Nĩ ũndũ ũcio kĩrĩndĩ kĩu gĩgĩũkĩra kĩrĩ gĩothe hamwe, na gĩkĩmũtwara kũrĩ Pilato
Gĩkĩambĩrĩria kũmũthitanga gĩkiugaga: “Nĩ tuonete mũndũ ũyũ akĩhĩtithia rũrĩrĩ rwitũ, akĩgiragia andũ kũrĩha Kaisari igooti, na akiugaga atĩ we mwene nĩ Messiya mũthamaki.”
Nake Pilato akĩmũũria atĩrĩ: “Wee nĩwe Mũthamaki wa Ayahudi?” Nake akĩmũcokeria: “Wee mwene nĩ woiga.”
Pilato agĩcoka akĩĩra anene a athĩnjĩri-Yahweh na kĩrĩndĩ kĩu atĩrĩ: “Gũtirĩ ihĩtia ndĩrona harĩ mũndũ ũyũ.”
No magĩthiĩ na mbere kuuga: “Nĩ acogagĩra andũ kũgerera ũrutani ũrĩa arutanĩte Yahuda guothe, kuuma o Galili nginya gũkũ.”
Rĩrĩa Pilato aaiguire ũguo, akĩũria kana mũndũ ũcio nĩ Mũgalili
Rĩrĩa aamenyire atĩ ooimĩte kũrĩa Herode aathanaga, akiuga atwarũo kũrĩ Herode, ũrĩa o nake warĩ Yahrushalayim matukũ-inĩ macio.
Rĩrĩa Herode oonire Yahshua, agĩkena mũno. Kwa ihinda iraya nĩ aakoretwo akĩĩrirĩria kuona Yahshua tondũ nĩ aaiguĩte maũndũ maingĩ mamwĩgiĩ, na nĩ eerĩgagĩrĩra kuona akĩringa ciama
Nĩ ũndũ ũcio akĩambĩrĩria kũmũũria ciũria nyingĩ, no Yahshua ndaamũcokagĩria.
O na kũrĩ ũguo, anene a athĩnjĩri-Yahweh na aandĩki-marũa maaikaraga makĩrũgamaga makamũthitanga marĩ na marũrũ maingĩ.
Nake Herode hamwe na thigari ciake makĩmwĩka maũndũ ma kũmũnyararithia, na akĩmũnyũrũria na njĩra ya kũmũhumba nguo ya goro, agĩcoka akiuga acokio kũrĩ Pilato
Mũthenya o ro ũcio Herode na Pilato magĩtuĩka arata, nĩ gũkorũo mbere ĩyo maarĩ thũ.
Nake Pilato agĩcokanĩrĩria hamwe anene a athĩnjĩri-Yahweh, atongoria, na andũ
akĩmera atĩrĩ: “Mũndeheire mũndũ ũyũ atĩ nĩ aracogera andũ matuĩke aregani. No rĩrĩ, niĩ nĩ ndamũhũnga mahũri mbere yanyu na ndinona gĩtũmi o na kĩmwe kĩa maũndũ marĩa mũramũthitangĩra.
O na Herode ndanona, nĩ gũkorũo oigire acokio kũrĩ ithuĩ, ndarĩ ũndũ ekĩte ũngĩtũma atuĩrũo kũũragwo
Nĩ ũndũ ũcio, ngũmũherithia njoke ndĩmuohore.
Tondũ nĩ kwagĩrĩire amohorere mũndũ ũmwe hingo ya Gĩathĩ
No kĩrĩndĩ gĩothe gĩkĩanĩrĩra gĩkiuga: “Ũraga mũndũ ũyũ, ũtuohorere Bar-Abba!”
(Mũndũ ũcio aaikĩtio njera nĩ ũndũ wa kũregana na thirikari thĩinĩ wa itũũra rĩu na kũũragana.)
Pilato akĩmaarĩria o rĩngĩ, tondũ nĩ eendaga kuohora Yahshua.
Nao makĩambĩrĩria kwanĩrĩra makiugaga: “Nĩ acuurio mũtĩ-inĩ! Nĩ acuurio mũtĩ-inĩ!”
Riita rĩa gatatũ akĩmera: “Nĩkĩ? Nĩ ũũru ũrĩkũ mũndũ ũyũ ekĩte? Gũtirĩ ũndũ ndona harĩ we ũngĩtũma oragwo; nĩ ũndũ ũcio ngũmũherithia njoke ndĩmuohore.”
Nao maigua ũguo makĩanĩrĩra na mĩgambo mĩnene mategũtigithĩria makiugaga oragwo, na mĩgambo yao ĩkĩhootana
Kwoguo Pilato agĩtua itua rĩa gwĩka ũguo mooigaga
Akĩohora mũndũ ũcio meetagia, ũrĩa waikĩtio njera nĩ ũndũ wa kũregana na thirikari na kũũragana, no akĩneana Yahshua ekwo ũrĩa meendaga.
Na rĩrĩa maamũtwaraga, makĩnyita mũndũ wa kuuma Kurene wetagwo Simoni akiuma mĩgũnda-inĩ, makĩmũigĩrĩra mũtĩ wa kũnyarirĩrũo aũkuue arĩ thutha wa Yahshua.
Andũ aingĩ nĩ maamũrũmĩrĩire, hamwe na andũ-a-nja arĩa maathiaga makĩĩhũũraga nĩ kĩeha na makarĩra nĩ ũndũ wake
Yahshua akĩĩhũgũra akĩrora andũ-a-nja acio akiuga: “Inyuĩ aarĩ a Yahrushalayim, tigai kũndĩrĩra. Mwĩrĩrĩrei arĩ inyuĩ na mũrĩrĩre ciana cianyu;
tondũ matukũ nĩ maroka rĩrĩa andũ makooiga, ‘Kũrathimwo nĩ andũ-a-nja arĩa thata, nda iria itarĩ ciagĩa mwana na nyondo iria itarĩ ciongwo!’
Na nĩ magaacoka mambĩrĩrie kwĩra irĩma, ‘Tũgũĩrei!’ o na tũthũngũri, ‘Tũhumbĩrei!’
Angĩkorũo mareka maũndũ macio hĩndĩ ĩrĩa mũtĩ ũrĩ mũigũ-rĩ, gũgathiĩ atĩa rĩrĩa ũkooma?”
Ningĩ kwarĩ na arũme erĩ maarĩ eki-naĩ, arĩa o nao maatwaragwo moragwo hamwe nake.
Na rĩrĩa maakinyire kũndũ gwĩtagwo Ihĩndĩ rĩa Kĩongo, makĩmũhũũrĩra mũtĩ-inĩ na mĩcumarĩ kũu hamwe na eki-naĩ acio, ũmwe mwena wake wa ũrĩo nake ũcio ũngĩ mwena wake wa ũmotho
No Yahshua ooigaga atĩrĩ: “Awa, mohere, nĩ gũkorũo matiramenya ũrĩa mareka.” Makĩria ma ũguo, magĩcuka mĩtĩ nĩguo magayane nguo ciake
Nao andũ maarũgamĩte meroreire. No atongoria nĩ maamũnyiiraga makiugaga: “Nĩ arahonokagia arĩa angĩ! Rĩu nĩ ehonokie angĩkorũo nĩwe Messiya wa Yahweh, Ũrĩa Mũthuure!”
Nginya thigari nĩ ciamũnyũrũragia, igĩthiaga harĩ we na ikamũhe ndibei ngagatu
ikĩmwĩraga ũũ: “Angĩkorũo wee nĩwe Mũthamaki wa Ayahudi-rĩ, wĩhonokie!”
Na igũrũ rĩake nĩ haarĩ na maandĩko mooigĩte atĩrĩ: “Ũyũ nĩwe Mũthamaki wa Ayahudi.”
Na ũmwe wa eki-naĩ acio maacuurĩtio hau akĩambĩrĩria kũmũnyũrũria akiugaga: “Githĩ wee tiwe Messiya? Wĩhonokie na ũtũhonokie o na ithuĩ!”
Nake ũcio ũngĩ akĩmũkũũma akĩmwĩra atĩrĩ: “Kaĩ ũtaretigĩra Yahweh o na hanini, kuona atĩ ũraamũkĩra ituĩro rĩmwe na mũndũ ũyũ
Ithuĩ tũraamũkĩra ituĩro rĩrĩa rĩtwagĩrĩire nĩ ũndũ wa maũndũ marĩa twĩkĩte, no gũtirĩ ũndũ o na ũmwe mũũru mũndũ ũyũ ekĩte.”
Agĩcoka akiuga ũũ: “Yahshua, ũkaandirikana rĩrĩa ũkaaingĩra thĩinĩ wa Ũthamaki waku.”
Nake akĩmwĩra: “Ũmũthĩ ndakwĩra atĩrĩ na ma, nĩ ũgaakorũo hamwe na niĩ thĩinĩ wa kũrĩa arĩa amũre mathiaga.”
Gũkinyĩria hĩndĩ ĩyo kwarĩ ta thaa thita cia mũthenya, no gũkĩgĩa nduma bũrũri-inĩ ũcio wothe nginya ta thaa kenda cia mũthenya,
tondũ ũtheri wa riũa nĩ wathirire; nakĩo gĩtama kĩa Hekarũ gĩgĩtarũka na gatagatĩ kuuma igũrũ nginya thĩ
Nake Yahshua akĩanĩrĩra na mũgambo mũnene akiuga ũũ: “Awa, roho wakwa nĩ ndaũiga moko-inĩ maku!” Arĩkia kuuga ũguo, agĩtuĩkana
Na rĩrĩa mũnene wa mbũtũ oonire ũguo, akĩambĩrĩria kũgooca Yahweh akiugaga: “Mũndũ ũyũ nĩ ma ararĩ mũthingu.”
Na rĩrĩa andũ arĩa othe maagomanĩte hau kwĩrorera moonire maũndũ marĩa maahaanĩkire, makĩinũka magegete
Nao andũ othe arĩa maamenyanĩte nake maarũgamĩte handũ haraya. Ningĩ andũ-a-nja arĩa maatwaranĩte nake kuuma Galili maarĩ hau na nĩ meeyoneire maũndũ macio.
Na rĩrĩ, nĩ kwarĩ na mũndũ wetagwo Jusufu, warĩ Mũtaarani, na aarĩ mũndũ mwega na mũthingu
(Mũndũ ũcio ndaanyitĩte mbaru wara wao na gĩĩko kĩao.) Ooimĩte itũũra rĩa andũ a Yahuda rĩtagwo Arimathea, na nĩ eetereire Ũthamaki wa Yahweh
Akĩingĩra kũrĩ Pilato akĩhoya anengerũo mwĩrĩ wa Yahshua.
Akĩũcuurũria na akĩũthaya na gĩtambaya gĩa gatani ĩrĩa njega, akĩũiga mbĩrĩra-inĩ yenjetwo rwaro-inĩ rwa ihiga, ĩrĩa gũtarĩ mũndũ wakoretwo aigĩtwo thĩinĩ wayo
Na rĩrĩ, kwarĩ mũthenya wa Kũhaarĩria, na Thabatũ yarĩ hakuhĩ kwambĩrĩria
No andũ-a-nja arĩa maatwaranĩte nake kuuma Galili o nao magĩthiĩ, magĩcũthĩrĩria mbĩrĩra-inĩ na makĩona ũrĩa mwĩrĩ wake wakometio,
na magĩcoka nĩguo makahaarĩrie mahuti marĩa manungaga wega na maguta manungi wega. No makĩhurũka mũthenya wa Thabatũ kũringana na ũrĩa gwaathanĩtwo.